¹ Yala yaweh rasulu le Daud Natan .Huwo ja le huwo ,” Hinak kan fi rajil fi medina .wahid rajil kan ganiyan wa altani kan miskin . ² al rajil al ganiyan indu korfan ketir wa abgar , ³ lakin al rajil al miskin ma indu haja ile wahid koruf towo entaya ,al huwo biu wa rabau .biga raba sawa ma huwo wa adfal towo . Al koruf gi akulu mahu wa ashrab min kubaya towo , wa gi num fi mahal towo ze bina towo ⁴ yom min al ayam difan ja le rajil alganiyan de ,al rajil alganiyan ma deiru ashan shilu wahid min korfan towo au abgar ashan jahisu al gada le huwo . bel ax , huwo shilu koruf entaya ta rajil al miskin de wa rakabu le difan towo de.” ⁵ Daud kan sukun ma zalan did al rajil al ganiyan de ,wa huwo kelim le Natan ,” ze Yahweh aish , al rajil al amulu de bi istehik mot. ⁶ Huwo bi dafa wara koruf de aktar min arbaa maraad ashan huwo amulu haja ze de ,wa ashan huwo ma indu rahma le zol al miskin .” ⁷ yala Natan kelim le Daud ,”ita yau zol de , al Allah ta Israel ,kelim ana masahu ita min kulu Israel ze Melik ,wa ana kalisu ita min yeden ta Shaul . ⁸ Ana wodi le ita bed ta said taki ,wa nasawin ta said taki maak . wa ana Kaman wodi le ita bed ta Israel wa yahuza . lakin iza dak suker ,ana kan bi wodi le ita hajat ketir zeyada . ⁹ yala le ita alisu ganun ta Yahweh , ashan amulu al sar fi ena towo ? ita katulu Uriah al Hittite ma sef wa shilu mara towo ashan kun mara taki .ita katulu huwo ma sef ta jesh ta Ammon. ¹⁰ yala hasa keli sef ma sibu bed taki ,ashan ita alisu ana wa shilu mara ta Uriah al Hattite ze Mara . ¹¹ Yahweh kelim , shuf ana bi arfa fok damar did ita min bed taki .fi gidam ta ena taki , ana bi shilu nasawin taki wa wodi humon le jeranat taki ,wa huwo bi num mahumon be nahar. ¹² ita amulu katiya taki fi sir lakin ana bi amulu de fi gidam kulu Israel ,fi ena shemish.” ¹³ Yala Daud kelim le Natan ,” Ana amulu katiya did Yahweh .” Natan kelim le Daud “ Yahweh Kaman jizu katiya taki ita ma bi katulu . ¹⁴ Ashan kida ,ashan be ameliya de ita fokuru Yahweh , jena al weledu le ita de hagiga ma bi ish bi mut, ¹⁵ yala natan ruah le bed .Yahweh hajimu jena al mara ta Uriah weledu le Daud, wa huwo tala ayan shedid. ¹⁶ Daud kore le Allah ashan weled de .Daud sayim wa ruah juwa wan um tull lel fi wata . ¹⁷ el shiuk al fi bed towo gum wa wogif jambu ,ashan gowimu fok min wata ,lakin huwo ma bi gum fok ,wa huwo ma bi akul mahum . ¹⁸ ja biga fi saba yom al jena de mat . kadamiin gi kafu ashan wori le huwo gal jena de mutu ,humon gal “ shuf , iza kan jena de kan hai ena kelim le huwo hu ma asuma le sot tena ,huwo bi amulu sunu le nefsu iza ena wori gal weled de maat ? ! “ ¹⁹ lakin wokit Daud ainu kadamiin towo gi waswas ma baad , Daud lahizu gal jena de mutu .Huwo kelim le kadam towo .” Hall jena maat ? “ Humon juwabu ,”huwo maat .” ²⁰ Daud yala gum min wata wa kasulu nefsu ,masa nefsu ,wa geiru gumash towo .wa huwo ruah le Tabut al Ahat ta Yahweh wa mejidu hinak ,wa huwo ja wara le kasri towo .wokit huwo sal lo ,humon jahizu akil gidam towo ,wa huwo akulu. ²¹ ya kadamiin towo kelim le huwo “ le ita amulu de ? “ ita sum wa kore wokit jena de hai ,lakin wokit jena de maat ita gum fok wa akulu ? ²² Daud juwabu ,” wokit jena de kan hai ana sum wa kore ,ana kelim ,ma ma ruf imkin au la Yahweh bi kun rahmaan le ana ,ashan jena de bi hai ? ²³ lakin hasa maat ,yala le ana bi sum ? hal ana bi jibu huwo wara ? ana yau bi ruah le huwo ,lakin huwo mabi rija le ana “ ²⁴ Daud arshidu mara towo Bathsheba , wa ruah le hia wan um ma hia . baad dak hia weledu weled , wa al jena de semi Solomon .Yahweh hibu huwo ²⁵ wa huwo rasulu kelima le Natan al nebi keli semi jena de , hu semi jedidiah ,ashan Yahweh hibu huwo. ²⁶ Hasa Joab shakil did Rabbah ta Ammonitiin ,wa huwo seitar le medina ta melik . ²⁷ yala Joab rasulu murasulat le Melik Daud wa gal , “ Ana shakil did Rabbah ,wa ana shilu mahal masdar ta moya tomon ²⁸ Hasa limu kulu bagi jesh sawa wa amulu muaskar gerib washilu al Medina le anu iza ana shilu ,bi semi ma isim tai .” ²⁹ yala Daud limu kulu jesh sawa wa ruah le Rabbah , huwo harib did al medina wa seitar ³⁰ .Daud shilu al Taj dahab min min raas ta Melik tomon – wozin towo ashara wogiya , wa kan fi hajer aljemil fogo . al Taj de kutu fi raas ta Daud . yala huwo jibu hajat ketir min medina de ³¹ huwo jibu bara nas al kan fi medina de wa kutu humon be guwa ashan istakal fi munshar ,hadid ,wa fas ; wa huwo kutu humon istakal fi dugu tuup .Daud talabu kulu medina ta Ammon keli amulu shokol de . yala Daud wa kulu jesh towo rija le Orshelim .