¹ Wa kan fii mara ta wahid min abna ta anbiya jaa gi kore le Elisha, wa kelim, kadam taki al huwo rajil tai mutu wa inta arufu kadam taki huwo zol al gi kafu yahwah, hasa zol ta dayin jaa ashan shilu itniin iyal tai ashan bi kun abide tou ² Biga Elisha kelim le hiya keli ana amulu le inta shunu? Wori le ana inta indu shunu fi biet? Hiya kelim, kadam taki ma indu ayi haja biet, ella guruma ta ziet. ³ Yala Elisha kelim, ruwa dayinu gurumat min jeranat taki, gurumat al fadi, dayinu ketir kan inta bi a geter ⁴ Wa keli inta dakalu fi auda taki wa kufulu nesfa taki wa iyal taki juwa auda, wa kubu ziet fi gurumat de kulu wa tala gurumat al mala bi taraf." ⁵ Biga hiya tala min Elisha wa ruwa gofulu nefsa tou wa iyal tou, humon jebu gurumat de le hiya, wa hiya malau bi ziet ⁶ Zaman gurumat de biga maliyan, hiya kelim le jena tou, jibu le ana guruma tani, lakin huwo kelim le hiya, gurumat de kalasu wa ziet de wogif main dofugu. ⁷ Biga hiya jaa wa kelim le rujal allah. Huwo kelim, ruwa beyou ziet, wa dafa dayin takin, wa esh inta wa iyal taki ma bagi de." ⁸ Fi yom tani Elisha ruwa le shunem wa kan fi mara azima gi iesh hinak; hiya talabu min huwo ashan bi akulu ma hiya ze kulu ma Elisha gi ruwa huwo gi amulu, huwo gi wogif hinak wa gi akulu ⁹ Mara de kelim le rajil tou, asuma hasa, ana arufu inu zol de huwo mukadas, rujul allah al dayiman huwo gi jaa ruwa min hini. ¹⁰ Keli nina amulu auda sukeir fok tabiet le elisha wa nina bi wodi seiri fogo wa teribeza wa kursi wa lamba ashan kan huwo jaa le nina , huwo bi geni hinak. ¹¹ Wa fi yom tani elisha jaa tani mara wa huwo wogif hinak, huwo geni fi auda de wa akudu raha. ¹² Elisha kelim le Gehazi kadam tou, nadi mara al min shunamit de wa zaman huwo nadi hiya, hiya jaa wa wogif gedam tou ¹³ Elisha kelim le huwo, kelim le hiya, inta taabu nefsa taki kulu ashan bi ihtam ma nina. Keli amulu shunu ashan inta, keli nina wonusu le melik ashan inta aw le ghaed ta jesh, hiya juwabu, ana gi geni fi wasat shaab tai." ¹⁴ Biga elisha kelim, keli nina amulu shunu le hiya, gehazi juabu, hagiga hiya ma indu jena, wa rajil biga ajuz ¹⁵ wa elisha juwabu, nadi hiya. Zaman nadi hiya, hiya wogif fi bab ¹⁶ Elisha kelim baad sena wahid fi nefsa al zaman, inta bi kun indu jena, hiya kelim laa, said tai wa rujul allah, ma keli inta kabasu kadam. ¹⁷ Wa mara de hamil wa weledu jena weled fi nefsu zaman fi sena al baadu. Ze elisha kelim le hiya ¹⁸ Zaman jena de raba, fii yom tani huwo ruwa le abu tou, huwo kan ma al hassa deen ¹⁹ Huwo kelim le abu tou, ras tai, ras tai, abu tou kelim le khadim tou, shilu huwo le uma tou ²⁰ Zazman khadim de shilu weled le uma tou, jena de geni fi rukuba ta uma tou lahadi nus ta nahar wa huwo mutu. ²¹ Biga mara gum fok wa ragidu jena de fi serir ta rujul allah wa gofulu bab wa tala bara, ²² Hiya nadi rajil tou wa kelim, min fadlak rasulu le ana wahid khudam wa humar ashan ana bi jere le rujul allah wa bi rejaa." ²³ Rajil tou kelim, malu inta deeru ruwa le huwo allela? De ma shahar jedid wa ma yom sebit? Hiya juwabu, kulu haja bi kun kwes ²⁴ Biga hiya jahizu humar de wa kelim le kadim tou, sugu be sura, ma keli inta ruwa biraha lahadi ana yau bi kelim. ²⁵ Biga hiya ruwa wa jaa le rujul allah fi jebel karmal. Zaman rujul allah ainu hiya bi masafa, huwo kelim le gehazi kadam tou, ainu yamdhak mara al shunamit gi jaa ²⁶ Min fadlak jere le hiya wa kelim le hiya gal, hal kulu haja kwes ma inta wa rajil ma jena taki? Hiya juwabu kulu kwes." ²⁷ Zaman hiya wosulu le rujul allah fi jebel, hiya amsuku kuraa tou. Gehazi jaa wa midu hiya beid lakin rujul allah kelim, sibu hiya ashan hiya tabaan wa yahwah dusu mushkila de min ana, wa ma wori le ana." ²⁸ Biga hiya kelim, hal ana asalu min inta jena, ya said tai? Ana kan ma kelim gal, ma keli inta kabasu ana. ²⁹ Wa elisha kelim le gehazi, jaisu nefsa le safar wa shilu hajat(asaya) tai fi ida taki. Ruwa le beit tou, iza inta ligo ayi zol, keli inta ma selemu wa iza ayi zol selemu inta, keli inta ma juwabu wa kutu asaya tai de fi wosa ta jena de." ³⁰ Lakin uma ta jena de kelim, yahwah hai wa inta kaman hai, ana ma bi sibu inta. Biga elisha gum fok wa ruwa wara hiya ³¹ Gehazi jere gedam min humon wa wodi asaya de fi wosa ta jena de, lakin jena de ma wonusu wa ma asuma wa gehazi rejaa le elisha wa kelim jena de ma gum." ³² Zaman elisha wosulu fi beit,jena de kan mutu wa huwo lisa kan fi serir ³³ Biga elisha ruwa juwa wa gofulu bab wara huwo wa jena de wa huwo seli le yahwah ³⁴ Huwo ruwa fok wa num fi gisim ta jena de, huwo wodi kasma tou fi kasma, wa ena fi ena, wa iden fi iden tou wa huwo midu gisim tou fi gisim ta jena de, wa gisim ta jena de tala sukun. ³⁵ Biga elisha gum fok wa douru fi juwa ooda wa tani mara huwo ruwa midu gisim tou fi gisim ta weled de. Biga jena de atis saba marat wa huwo fata ena tou ³⁶ Wa elisha nadi gehazi wa kelim, nadi mara al min shunamit de, nadi hiya wa hiya jaa fi ooda. Elisha kelim, arfa jena taki ³⁷ Biga hiya dengiri wosa ta hiya le tehet fi kura tou wa dengiri fi al ardi wa biga shilu jena tou wa ruwa le bara. ³⁸ Elisha jaa tani mara le gehazi wa kan fi majaa fi beled, wa abna ta anbiya kan gi gedam huwo, huwo kelim le kadim tou, wodi guruma kebeir fi nar wa rakabu mulah seliga le abna ta anbiya ³⁹ Wahid min humon ruwa fi gaba ashan bi legetu khuda rawal huwo ligu karma ta gaba wa huwo limu garaa ta gaba ketier fi gita ta gumash tou. Humon gata kudurawat de wa wodi fi mulah seliga de, wa humon kan man arufu noeya ta khudarawat de shunu. ⁴⁰ Biga humon gesimu seliga de le rujal de ashan bi akulu, baad zaman wa humon kan gi akulu, humon kore shedid wa kelim ya rujal allah, fi mutu fi guruma de. Wa humon ma bi agdeer akulu seliga de tani mara. ⁴¹ Lakin elisha kelim, jiibu takum degig, huwo kubu degig de fi guruma de wa kelim, gesim takum le shaab, ashan keli humon akulu, wa biga kan mafi ayi haja al bi augu humon fi guruma. ⁴² Kan fi rajil jaa min baal shalisha le rujal allah wa huwo jebu bakura(hasad jedid) ta ishriin esh ta shaer wa bakura ta dura huwo kelim, wodi de le shaab ashan humon bi akulu ⁴³ Khadim tou kelim, shunu, ana bi agdeer gesimu de le miya rujal? Lakin elisha kelim wodi de le shaab, ashan humon bi akulu, leanu yahwah yau kelim gal humon bi akulu wa humon bi fadulu bagi ⁴⁴ Biga khadim tou gesimu le humon, humon akulu wa humon sibu gabi besh ze kalam ta yahwah kan waadu.