¹ Nina arufu inu iza kan demiru beit ta nina al ta Ard al nina gi geni fogo, nina indu mebni min Allah, al howo beit al ma salau bi edan ta insaan lakin beit al abadiya fi sama. ² Leanu fi keima de nina bi demiru mushtagiin, ashan bi lebisu fogo biyut ta nina al fi sama. ³ Nina mushtagiin leanu iza kan nina lebisu nina ma bi kun areyaniin. ⁴ Leanu fi hagiga fi zaman al nina lesa fi keima de, nina gi kore ma arufu haja al tegili nina ma deiru ashan bi agaila lakin deiru kali lebisu nina, ashan biga haja al mutu bi agdeir alau bi wasat haya. ⁵ Lakin zol al jahizu nina le haja de howo Allah, al howo yahu wodi, le nina al Roho ze arbone le haja al gi ja. ⁶ Ashan keda keli nina indu sega daiman. Keli nina amulu hesab ze ma nina lesa gi geni fi beit al howo jesim, nina daiman min Rabuna, ⁷ leanu nina gi duwuru bi imaan, ma bi uyun, ⁸ Fa keli nina indu sega, nina bi beyid min jased wa bi geni ma Rabuna. ⁹ Biga hasa nina harisin , iza kan nina gi geni fi beit wala kan nina bara bes keli sibu Allah geni farahan. ¹⁰ Leanu lazim nina kulu bi wogifu gedam kursi ta hukum ta Yesua al Mesi ashan bi hakimu kulu wahid hasab hajat al howo amulu fi jased hasab ma al howo amulu kan kwes wala batal. ¹¹ Ashan keda, nina arufu kafu ta Rabuna, nina gi agna nas ashan Allah kutu nina zahiriin le howo. ana gi itawaka kaman inu howo zahir fi demir takum. ¹² Nina ma gi hawil ashan bi asuru intum tani mara ashan bi ainu nina kwesiin . Lakin nina gi wodi le intum forsa ashan intum bi dala ma nina. ashan biga intum bi agdeir juwabu nas al gi dala fi jesim wa lakin ma an haja al fi geliba. ¹³ Leanu iza kan afkar ta nina karabu, de ashan Allah, wa iza kan afkar ta nina kwes, de ashan intum ¹⁴ leanu muhaba ta al Mesi limu nina, leanu nina mutuakidiin bi kalam de, inu wahid zol mutu ashan nas kulu, wa ashan keda nas kulu mutu. ¹⁵ Howo mutu ashan nas kulu, ashan nas al hai al gi ish biga ma bi ish le nufus tomon lakin le howo zol al mutu le ajili homon wa gum. ¹⁶ Ashan kalam de min hasa le gedam nina ma bi hukumu ai zol hasab mustawa ta insaan hata kan nina arufu al Mesi kan bi teriga de. lakin hasa nina ma bi hkumu ai zol bi teriga de tani mara. ¹⁷ Ashan keda, iza kan ai zol fi al Mesi howo kaliga jedid. al hajat al gediim fat wa kulu hajat biga tala jedid. ¹⁸ Kulu hajat del min Allah al howo salihu nina le nefsa tou bi wasat al Mesi, wa wodi le nina khedma ta musalaha. ¹⁹ De fi al Mesi Allah gi salihu al alam le nefsa tou, ma gi hasibu kataya tomon did homon, howo kuu fi nina kelima ta musalaha. ²⁰ Biga azilu nina ze sufara ta Mesi, ze ma kan Allah gi bashiru bi wasat nina, nina gi talabu min intum le ajili ta al Mesi: lakin salau takum ma Allah, ²¹ al howo wodi al Mesi zebiha le katiya ta nina. al howo kulu, kulu ma amulu katiya, howo amulu kalam de, ashan nina bi kun adil le Allah fi howo.