¹ Siliman halifu nefsa to be jouzu ma faraun melik ta Masir. Huwo shilu biniya ta Faraun wa jibu fi medina ta Daud lahad huwo kalasu abinu bet bito, bet ta Yahwa, wa hosh haul orshelim. ² Shaab kan bi gedimin zebiha fi mahalat al fok, ashan kan mafi lisa bet abinu le isim ta Yahwa ³ Siliman beinu muhaba bito le Yahwa be douru fi sika ta Daud abu bito, bes Kaman huwo bi gedimu zebiha fi mahalat al fok ⁴ Melik gum ruw fi jabaun ashan bi gedimu zebiha hinak, ashan dok kan mahal fok al kuwes, Siliman gedimu alf zebiha al haragu fi mazbah dak. ⁵ Yahwa beinu fi hilim le Siliman fi jabaun be bilel, huwo kelim, “Asalu! Sunu kede ana wodi le inta?” ⁶ Siliman kelim, inta beinu le kadam taki ashen tifagiya wa be amana, Daud abu tai, ashan huwo kan douru gidam taki adil, be adala, wa geliba nedif. Inta hafisu le huwo waad al kuwes de be adala wa inta wodi le huwo woled al bi geni fi kursi alela. ⁷ Hasa de ya Yahwa Allah tai, inta kutu kadam taki melik fi mahal ta Daud abu tai, ashan kida ana bes jena suker. Ana ma bi aruf ruwa bara wole dakalu juwa. ⁸ Kadam taki fi nus ta nas al inta yau hazilu, shaab kebir, ketir kalis ashan bi hasibu. ⁹ Wodi le kadam taki geliba ta fahimu ashan bi hukumu shaab taki, al ana bi agidaer ferigu hajat al kuwes wa al batal. Ashan de munu yau bi agider hukumu nas taki al ketir del?” ¹⁰ Talab ta Siliman de ajibu Rabuna. ¹¹ Biga Allah kelim le huwo, “Ashan inta asalu haja de wa inta ma asalu le nefsa taki haya towil wole ganiyan wole haya ta adu taki, bes inta aslu le nefsa taki fahim ashan inta bi hokum be adala, ¹² Aynu hasa ana bi amulu kulu al inta asalu min ana wokit inta jibu le ana talab taki. Ana wodi le inta hikma wa geliba ta fahim, ashan ma bikun fi zol gubal inta, wa ma bikun fi zol baad inta. ¹³ Ana Kaman wodi le inta haja al inta asalu, kulu ganiyan wa suma kuwes, ashan ma bi kun fi nus muluk kulu ze inta kulu ayam taki. ¹⁴ Kan inta bi dowru fi sika tai wa hafisu teriga ta wa gawanin tai, ze abu taki Adud dowru, wa Kaman ana bi kutu ayam taki towil” ¹⁵ Siliman gum, wa torau de kan hilim. Huwo ja fi Orshelim wa wogif gidimu zebiha al haragu wa zebiha ta salam, wa amulu munasaba le kulu kadamin bito. ¹⁶ Fi itnin nusuwan saramutat ja le melik wa wogit gidam bito. ¹⁷ Wahid min humon bada kelim, “oh ya sidi tai, mara de wa ana mina bi geni fi juwa wahid, ana weledu jina fi nefsu juwa al huwo fogo de. ¹⁸ Hasil baad talata yom baad ma ana weledu, Kaman mara de weledu. Nina kan sawa. Mafi zol tani ma nina fi juwa hinak, bes nina kulu itnin fi juwa. ¹⁹ Biga be bilel jena ta mara de mutu, ashan huwo num fi ras bito. ²⁰ Fi nus bilel huwo gum wa shilu jena tai min janbu ana, zaman kadam taki bi num, huwo noumu fi dus bito, wa nowumu jena bito al meit de fi sudar tai. ²¹ Wokit ana gum sabah ashan bi radau jena tai, huwo meit. Lakin wokit ana aynu jena de birah kida fi sabah, de ma jena tai, al ana weledu” ²² Min hinak mara tani de bada kelim, “la, jena al hai de jena tai, al meit de yau jena taki, wa al hai de yau jena tai,” de yau humon wonusu zede gidam ta melik. ²³ Bad dak melik kelim, “wahid min intakum bi kelim, “jena tai yau al hai, wa jena taki yau al meit de’ wa tani Kaman kelim, “la, jena taki yau al meit, wa jena tai yau al hai de” ²⁴ Melik kelim, jibu takum le ana sef” wa jibu sef gidam ta melik. ²⁵ Biga melik kelim, “Gesimu takum jena al hai de le itnin, wodi takum nus le mara de wa nus le tani de” ²⁶ Wa mara al jena bito hai de gum wonusu le melik, “ashan geliba bito maliyan be hanan le jena bito, wa huwo kelim, “oh ya sidi tai, kalas wodi le uwo jena al hai de, kede ma katulu,” lakin mara tani de kelim, “huwo ma bi kun tai wole taki. Gesimu jena de.” ²⁷ Wa melik bada kelim, “wodi takum jena al hai de le mara nimira wahid de, kede ma katulu. Huwo yau uma ta jena de” ²⁸ Wokit Israel kulu asuma be hokum al melik hukumu, humon kafu min melik, ashan humon aynu hikma ta Allah fi huwo fi gata gediya.