¹ Kan melik Siliman melik le Israel kulu. ² Wa de kan dubat bito: Azariya jena ta saduk kan kahin, ³ Alihorif wa akiya iyal ta shisha, humon sikirter. Yahu shafat jena ta nas tesjilat. ⁴ Benaiah jena ta Yahoyada mosul ta jesh. Saduk wa abiasar gasawusa. ⁵ Azariya jena ta Nathan mosul ta dubat. Zabut jena ta Nathan humon kahana wa sabihat ta melik. ⁶ Ahishar reis ta kadamin adoniram jena ta abda muragib ta umal. ⁷ Siliman kan indu itnashar dubat fi Israel kulu, al bi jahizu akil ta melik wa kadamin bito. Ai zol bi gedimu wordia wahid shahar fi sena. ⁸ Wa de yau asami tomon: Ben-hur, fi bilad al fijebel ta Ephraim; ⁹ Ben-Deker fi makaz, Shalbim, Bet shemis, wa Alon bazhanan. ¹⁰ Ben-hesad, fi Arubot (sokoh kulu bito wa kulu wata ta hefer): ¹¹ Ben-Abinadad, fi kulu jebel dor (Tafa biniya ta Siliman mara bito): ¹² Banana jena ta Akilud, fi tank wa mejidu, wa kulu Bet shan al Janbu Surtan Tehet Yazrail, min Bet shan lahadi Abel Mahaula, beid ze Yakmaam. ¹³ Ben jabir fi Ramut Jelaad (al kulu itnin medina ta yair jena ta manasa, al fi jalaad wa wilaya ta Ajob kulu bito, al fi bashan, sitin medina kubar al indu heta wa bab min nihas); ¹⁴ Akinadab jena ta iddo, fi mahanain; ¹⁵ Akimaaz fi naph tali (huwo raman jouzu basma biniya ta Siliman mara bito): ¹⁶ Baana jena ta Hushai, fi Asir wa baalot. ¹⁷ Yahushafat jena ta Faruh, fi Yasaker. ¹⁸ Shemei jena ta Elia, fi Benjamin, ¹⁹ Jabir jena ta uri, fi wata ta jalaad, fi medina ta sihon melik ta Amorin wa og melik ta Bashan, wa kan huwo yau wokil al wahid fi wata. ²⁰ Yahuza wa Israel humon kutar ze romla ta taraf bahar. Humon kan bi akulu wa bi asurubu wa kan mokosutin. ²¹ Siliman hukumu fi kulu mamlak min bahar lahadi fi wata ta Falastinin wa lahadi fi hudud ta Masir. Humon kan bi jibu hadiyat wa bi saudu Siliman kulu ayam ta haya bito. ²² Akil ta Siliman ta yom wohid kan teletin kura ta degig fina wa sitin kura ta degig. ²³ Ashara tor suman, wa Ishirin tor shilu min mura, wa miya koruf, wa ganamayat, ma mi riyal gazal wole gazal, zieb, wa wozin. ²⁴ Huwo kan indu sulta fi kulu wilayat fi safa ta taraf Bahar, min tafsa lahadi Gaza, wa fok kulu muluk al fi safa ta taraf bahar, wa huwo kan indu salam fi kulu tisafa huwo fogo. ²⁵ Yahuza wa Israel geni fi haya al kuwes, ai zol tehet shejera balah bito wa tehet shejera tin, min dan lahadi beershoka, fi kulu ayam ta Siliman. ²⁶ Siliman kan indu Arbein Alf mahal ta kutu husan ta nas bito al bisugu husanat, wa itnashar alf nas suwagin ta husan. ²⁷ Dubat de bi jahizu akil le melik Siliman wa le kulu nas al bi ja akulu sawa fi tarbiza ta melik siliman, ai zol fi shahar bito. Humon kan mafi haja bi kalasu al humon deriu. ²⁸ Humon kan Kaman bi jibu fi mahal al kuwes sheir wa gesh le husan al bi sugu wa al bi juru ze Arabiya, as wahid bi jibu godu al huwo bi agder. ²⁹ Wodi le Siliman ashen hikma wa marafa, wa fahimu hajat ketir ze romla ta taraf bahar. ³⁰ Hikma ta Siliman futu kulu hikma ta nas alfi sherik wa kulu hikma ta Masir. ³¹ Huwo kan negit futu nas kulu-min Ethan ta Ezrahi, Heman, kalkol, wa Darba, iyal ta mahal arufu huwo fi kulu mahal wan as haul huwo. ³² Huwo wonusu talata aif masal wa 1,005 guna. ³³ Huwo wosifu ashjar, min rus al fi lebnan lahadi lifa al bi raba fi taraf heta. Huwo Kaman wonusu be kalam ta haiwanat, tiyur, hajat al bi douru be batna, wa asmag ³⁴ Nas bi ja min kulu duwal ashan bi asuma hikma ta Siliman. Humon min kulu mulur ta wata al asuma be hikma bito.