¹ Wa Daud biga kelim, "De yau mahal al bet ta Yahwa Allah bi kun fogo, fi fogo mazbah ta haragu zebihat ta Israil." ² Wa Daud amiru kadamin bito kede limu sawa ma kulu ajanib al fi Israil. huwo wodi le humon ashan bi kun nas ta gata hujar, ashan bi gata hujar murabat, al bi abinu ma bet ta Allah. ³ Daud zidu adad kebir min hadid le salau masamir ta abuwab wa bawabat, wa ta mafasil. Huwo kaman zidu nihas ziyada ma bi agder wozinu, ⁴ wa ashjar ta rus ziyada ma bi agder hasibu. (Sidonin wa tyrians jibu kaman akhshab ta rus le Daud ashan bi hasibu). ⁵ Daud kelim, "Jena tai Siliman lisa suker wa ma indu khibra, wa bet al bi abinu le Yahwa de lazim bi kun azim wa giyafa, wa bi arufu wa bi mejidu fi kulu mahalat tanin. Ashan kida ana bi jahizu fi abinu bito," Wa Daud gum jahizu be teriga kebir gubal mutu bito. ⁶ Biga huwo nadi Siliman jena bito wa amiru huwo ashan bi abinu bet le Yahwa, Allah ta Israil. ⁷ Daud kelim le Siliman, "Ya jena tai, niya tai kan der abinu bet de be nefsa tai, le isim ta Yahwa Allah tai. ⁸ Lakin Yahwa ja le ana wa kelim, "Inta kubu dom ketir wa shakil ketir fi harb. Inta ma bi abinu bet le isim Tai, ashan inta kubu dom ketir fi wata gidam Tai. ⁹ Wa ile, inta bi indu jena al bi kun zol ta salam. Ana bi wodi le huwo raha min kulu adu bito min kulu safa. Isim bito bi kun Siliman, wa Ana bi wodi salam wa sukut le Israil fi ayam bito. ¹⁰ Huwo bi abinu bet le isim Tai. Huwo bi kun jena Tai, wa Ana bi kun Abu bito. Ana bi sabitu kursi ta mamlaka bito fok Israil le nihaya. ¹¹ Hasa, ya jena tai, kede Yahwa kun ma inta wa saudu inta ashan bi najah. Kede inta abinu bet ta Yahwa Allah taki, ze huwo kelim inta bi agder. ¹² Bes kede Yahwa wodi le inta ruwia wa faham, ashan inta bi ihterim ganun ta Yahwa Allah taki, kan Huwo kutu inta fi mahal ta mosuliya le Israil. ¹³ Biga inta bi najah, kan inta kutu bala fi kalam wa talimat al Yahwa wodi le Musa be kalam ta Israil. Kun gowi wa shuja. Mata kafu wole niya taki gofulu. ¹⁴ Hasa, aynu, be guwa shedid ana jahizu le bet ta Yahwa 100,000 mowahib ta dahab, wahid miliyon mowahib ta fida, wa nihas wa ta hadid be kimiyat kebir kalis. Ana kaman jahizu khashab wa hujar. Inta lazim bi zidu tanin le del kulu. ¹⁵ Inta indu nas ta shokol ketir ma inta: nas ta gata hujar, nahatin, najarin, wa nas al indu maharat fi amulu hajat bidun adad ta ai haja, ¹⁶ al bi ishtakal be dahab, fida, nihas, wa hadid. Gum bada shokol, wa kede Yahwa kun ma inta." ¹⁷ Daud kaman amiru kulu kada ta Israil ashan kede saudu Siliman jena bito, gali, ¹⁸ "Yahwa Allah taki fi ma inta wa wodi le inta salam fi kulu safa. Huwo wodi nas ta mahal de kulu fi idan tai. Nas del kulu bi akhda gidam ta Yahwa wa nas Bito. ¹⁹ Hasa fetisu takum Yahwa Allah bitakum be kulu geliba takum wa nefsa takum. Gum takum fok wa abinu takum mahal al mukadasta ta Yahwa Allah. Wa biga intakum bi jibu sonduk ta tifagiya ta Yahwa wa hajat kulu al ta Allah fi bet al abinu be isim ta Yahwa."