¹ Adu gum wogif gidam ta Israil wa shejau Daud ashan bi hasibu Israil. ² Daud kelim le Yuab wa le kada ta jesh, "Ruwa takum, hasibu shaab ta Israil min Beersheba lahadi Dan wa taal takum wori le ana, ashan kede ana arufu adad tomon." ³ Yuab kelim, "Kede Yahwa gowi jesh Bito miya marat min ta hasa. Lakin ya sidi tai al melik, humon sei kulu ma bi kadimu sidi tai? Le sidi tai deir kida? Le bi jibu zanb le Israil?" ⁴ Lakin kalam ta melik kan did Yuab. Yuab gum tala wa ruwa lifu Israil kulu. wa huwo rija wara lahadi Orshelim. ⁵ Biga Yuab wori kulu adad ta nas al bi agder shakil le Daud. fi Israil kan fi 1,100,000 nas al bi dugu sef. Yahuza barau fogo 470,000 junud. ⁶ Lakin Lawi wa Benyamin ma hasibu fi nus tomon, ashan talimat ta melik kan ma ajibu yuab. ⁷ Allah kan agid be kalam de, Huwo hajimu Israil. ⁸ Daud kelim le Allah, "Ana amulu katiya kebir kalis ashan ana amulu zede. Hasa shilu zanb ta kadam Taki bara, ashan ana amulu be shokol belid." ⁹ Yahwa kelim le Jad, Nebi ta Daud. ¹⁰ "Ruwa wori le Daud, 'De Yahwa yau kelim: Ana bi wodi le inta talata hajat. Hazilu wahid min fogo'" ¹¹ Jad biga ruwa le Daud wa kelim le huwo, "Yahwa kelim zede, 'hazilu wahid min del: ¹² aw talata sena jiyan, talata shahar adu bi geni turudu inta wa bi gobudu inta be sef tomon, wole talata ayam sef ta Yahwa, al huwo yau, waba fi wata, be malaikat ta Yahwa bi demiru kulu wata ta Israil.' Hasa biga, yatu juwab al ana bi shilu le zol al rasulu ana." ¹³ Daud kelim le Jad, "Ana fi mushkila kebir! kede ana waga fi idan ta Yahwa min idan ta zol, ashan rahma Bito kebir kalis." ¹⁴ Biga Yahwa rasulu waba fi Israil, wa sebein alf nas mutu. ¹⁵ Allah rasulu malika fi Orshelim ashan bi demiru. Wokit huwo biga gerib ashan bi demiru, Yahwa aynu wa geiru muk Bito be sabab kusarat al bi hasil. Huwo kelim le malaika al bi demiru de, "Kifaya! hasa juru idan taki wara." Fi zaman dak malaika ta Yahwa kan bi wogif fi tahuna degig ta Ornan ta Yabusi. ¹⁶ Daud aynu fok wa aynu malaika ta Yahwa bi wogif fi nus beina wata wa sama, huwo juru sef jahiz fi idan bito arfau fok fi Orshelim. Biga Daud wa shiyukh, libisu milayat, wa dengir wusa tehet fi wata. ¹⁷ Daud kelim le Allah, "de ma sei ana yau wodi talimat ashan kede idu jesh? Ana yau amulu haja batal de. Lakin korufat del, humon amulu sunu? Yahwa Allah tai! kede idan Taki dugu ana wa bet tai, lakin mata sibu waba de kede fadulu le shaab Taki." ¹⁸ Biga malaika ta yahwa wodi talimat le Jad ashan bi wori le Daud, gali Daud lazim kede ruwa fok wa abinu le Yahwa mazbah fi tahuna degig ta Ornan ta Yebusi. ¹⁹ Daud ruwa fok ze awamir ta Jad le huwo ashan bi amulu be isim ta Yahwa. ²⁰ Wokit Ornan kan bi atanu degig, huwo lifu wa aynu malaika. Huwo ma arba iyal bito dusu jisim tomon. ²¹ Daud wokit wosulu le Ornan, Ornan aynu wa aynu Daud. Huwo sibu atanu degig wa dengir le Daud be wusa fi wata. ²² Daud kelim le Ornan, "Biyu le ana tahuna de, ashan ana bi abinu mazbah le Yahwa. Ana bi dafa taman bito kulu, ashan kede shilu waba de min saab." ²³ Ornan kelim le Daud, "Shilu ze taki, sidi tai al melik. amulu be huwo haja al kuwes fi safa taki. Aynu, ana bi wodi le inta bagara ta zebiha al bi haragu, hajer tahuna le kasab, wa degig le tegdima; Ana bi wodi kulu le inta." ²⁴ Melik Daud kelim le Ornan, "La, ana lazim bi biyu be taman kamil. Ana ma bi shilu haja taki wa gedimu ze zebiha le Yahwa kan ana ma dafa fogo haja." ²⁵ Daud dafa sutumiya shakel ta dahab fi mahal dak. ²⁶ Daud abinu hinak mazbah le Yahwa wa gedimu fogo zebiha al haragu wa zebiha ta salama. Huwo nadi fogo Yahwa, al juwabu huwo be nar min sama fi mazbah le zebiha al haragu. ²⁷ Biga Yahwa wodi talimat le malaika, wa malaika de gum rijau sef bito wara fi mahal bito. ²⁸ Wokit Daud aynu Allah juwabu huwo fi tahuna degig ta Ornan ta Yebusi, huwo amulu zebiha hinak fi nefsu zaman. ²⁹ Fi zaman dak, sonduk tifagiya , al kan Musa salau fi sahara, wa mazbah ta zebiha al bi haragu, kan fi mahal al fok Jabaun. ³⁰ Wa Daud kan ma agder ruwa hinak ashan bi asalu irshad min Allah, ashan kan huwo bi kafu min sef ta malaika ta Yahwa.