¹ Wokit biga Daud ajuz wa gerib le nihaya ta haya bito, huwo kutu Siliman jena bito melik fok Israil. ² Huwo limu kulu kada ta Israil sawa, ma kahana wa Lawin. ³ Lawin al timu teletin sena le fok hasibu, Adad tomon tamaniya wa teletin alf. ⁴ Min del, arba wa ishirin alf kan bi ragibu shokol fi bet ta Yahwa, wa sita alf dubat wa hukam. ⁵ Arba alf gafir, wa arba alf nas ta tesbih le Yahwa be alat al ana salau le tesbih," Daud kelim. ⁶ Huwo gesimu humon fi mojmuwat al binasib iyal ta Lawi: Gershon, Kohath, wa Merai. ⁷ Min gebila al tala min Gershon, kan fi Ladan wa Shemei. ⁸ Kan fi talata min iyal ta Ladan: Jehiel yau kaid, Zetham wa Yueil. ⁹ Kan fi talata min iyal ta Shemei: Shelomoth, Hazail, wa Haran. Del yau kan kada fi gebila ta Ladan. ¹⁰ Kan fi arba min iyal ta Shemei: Jahath, Ziza, Jeush, wa Beriah. ¹¹ Jahath yau al kebir, wa Ziza nimira itnin, lakin Jeush wa Beriah ma indu iyal ketir, biga hasibu humon ze gebila wahid wa be nefs shokol. ¹² Kan fi arba min iyal ta Kohath: Amram, Izhar,Hebron, wa Uzziel. ¹³ Del yau iyal ta Amram: Harun wa Musa. Harun hazilu ashan bi nizamu hajat ta kuds akdas, huwo ma iyal bito ashan bi gedimu bokhur gidam Yahwa, bi ishtakal le Huwo wa bi bariku Huwo lel abad. ¹⁴ Lakin Musa zol ta Allah, iyal bito hasibu be iyal ta Lawi. ¹⁵ Iyal ta Musa yau Gershom, wa Eliezer. ¹⁶ Iyal ta Gershom kan yau Shubael yau kebir. ¹⁷ EIyal ta Eliezer yau Rehabiah. Eliezer ma indu iyal tanin, lakin Rehabiah indu iyal ketir. ¹⁸ Iyal ta Izhar yau Shelomith al kaid. ¹⁹ Iyal ta Hebron yau Jeriah, al kebir, Amariah nimira itnin, Jahaziel nimira talata, wa Jekamim nimira arba. ²⁰ Iyal ta Uzziel yau Mikha yau kebir, wa Ishijah nimira itnin. ²³ Iyal ta Merari au Mahli wa Mushi. Iyal ta Mahli yau Eleazar wa Kish. ²¹ Eleazar mutu wa ma indu awlad. Huwo bes indu banat. Iyal ta Kish ja jouzu humon. ²² Iyal ta Mushi talat yau Mahli, Eder, wa Jerimoth. ²⁴ Del yau kan iyal ta Lawi hasab gabail tomon. Humon yau kan kada, hasibu humon, wa katibu isim tomon, hasab gabail al ishtakal fi khidma ta bet ta Yahwa, min ishirin sena le fok. ²⁵ Ashan Daud kelim, "Yahwa, Allah ta Israil, wodi raha le shaab Bito. Huwo salau bet Bito fi Orshelim lel abad. ²⁶ Nas Lawin tani ma bi arfa sonduk ta tifagiya wa kulu afash al istamilu fi khidma." ²⁷ Wa min akir kalam ta Daud hasibu nas Lawin, min ishirin sena le fok. ²⁸ Shokol tomon ashan bi saudu iyal ta Harun fi khidma ta bet ta Yahwa. Humon bi kutu bala fi midan, juwa, wa fi tethir ta kulu hajat ta bet ta Yahwa, wa ai shokol tani fi khidma ta bet ta Allah. ²⁹ Humon kaman bi kutu bala fi esh ta hudur, wa degig gemeh ta tegdima, fetira, kabis, degig ajinu be zet, wa kulu magasat ta kimiya wa hajim ta hajat. ³⁰ Humon kaman bi wogif kulu sabah ashan bi shukuru wa mejidu Yahwa. Humon kaman bi amulu zede be misa ³¹ wa kan haragu zebiha le Yahwa, fi sebit wa fi haflat ta gamara kan jedid wa ayam ta faska. Adad sabit, hazilu be karar, yau daiman bi wogif gidam ta Yahwa. ³² Humon mosulin fi khema ta ijtima, mahal al mukadas, wa bi saudu zumala tomon iyal ta Harun fi khidma ta bet ta Yahwa.