¹ Shawulu beɗ tə gi ata ci ken tə wulnyən Vik gəmngən vərtə nə duryotu wo tlaa gyaa mən Shinngən Daadəni, a tli a dəllə pəris. ² A Karatə ndər tlyaaɗ tagarta vər viin laadi yahudawa daŋ ci Dimaskus, nə duryotu yaa tu gon tə ɗan, gəɗ ko məmmwaan, wo tləərshi waashi Urshalima naaɗ shi waashi. ³ Ɗaŋ ci ɗa təpes, anaa mel tə Dimaskus, aa ngaalaŋ she ləɓ yaaliwon a mbwaadi tsogn gəmti dlei. ⁴ A ɖaaɗi yatl ndər wuum vi won tu "Shawulu, Shawulu, ni caa kya Vərəm Forəmme?" ⁵ Shawulu wul tu, "nə kyan nuu, Daadəna? Daadən wul tu" nə myaan Yesu gii ɗaŋ kyaa nyaanngas mi; ⁶ Beɖ tə gi shi shi a ndaai giiɓ dəllə yatles, ta fuughə ngətnwon ɗaŋ ciiɓ aa fii. ⁷ Mənes ɗaŋ caa riighən cimtii tə dləəri Saɗ tə tu ngətn konngən hŋ, caa səə kəəm ves, beɗ tə gii tə yel gon hŋ. ⁸ Shawulu ɗaŋ aa shii shii ɗa yatles, aa bəə yiir wos, a ɗyaa yel ngətn won hŋ; tə ngaaɓ taas wos tə ndaai giɓ dəllə yalt Damaskus. ⁹ A fi ɓuuɗ kəni maayi aa yaal hŋ, aa ɗyaa ci hŋ kənnda tə naa nə tlyaaghən zha. ¹⁰ Mərədən won taayi Damaskus ɗaŋ səəm wos tu Hananiya; Daadən ta wul tə vii a giɓ kə konngən ngətn jaan, a wul tu "Hananiya" a wul tu "yeli, myaan miin Daadən". ¹¹ Daadən wul tə tu, "shi shi tlə aa datəpii ɗaŋ ca cimtu taŋ-taŋəi, dən gya Yahuza cet murwon ɗan nə mən Tarsus Səəm wos tu Shawulu; nə duryo tu cigha Karaghən cogn. ¹² A yel a giɓkə konngən gətn jaan gon ɗaŋ səəm wos tu Hananiya ci gha ndaghən ɗi dur yotu tə gaa tə taas gaam, nə yo tu yiir wos tə ɗərəi". ¹³ Beɗ tə gi Hananiya wul tu, "Daadən, maa wuum dur wos aa zarsə monnda, tə kuuskən yo ɗaŋ a fi a zarsə waa mən dzikkən ɗaŋ ci Urshalima. ¹⁴ Dəllə pəris vərtə dəəl nə dur yo tu tə ngaɓ beɗ mur yo ɗaŋ ca cim səəm waa". ¹⁵ Beɗ tə gi Daadən wul tu, tlə, nə dur yo tu maa bwaatə tə fim laa mən, gyo ɗaŋ wo tlər vetn a zarsə ɓuuruk tə gya Guŋsə tə mən Israila; ¹⁶ Nə dur yo tu ma giɗ tə buŋ ngən yo ɗaŋ wo tu tə nə səəmatn". ¹⁷ Hananiya taa tlii, tləəŋ ndai ɗa dənes. A gaa tə taas gaam, wul tu "ngaa naa Shawulu, Daadən Yesu gyo ɗaŋ aa giiɗ gaamas ɓaskə a kili yo ɗaŋ kigha təpm manngənɗi, aa shiinəm di nə duryo tu aa yaali zhipti var tə maan ɓaskə. ¹⁸ A ngaalaŋ ngərwon vuunnda ɗi a yir Shawulu, a nɗər yaali; aa shii shii tə fii tə baftismai. ¹⁹ A cii ngətn tə nɗər tə tyaatə moɗ. A tsətn tə mərədən ɗa Dimaskushes kə mbuuɗkən monnda. ²⁰ A ngaalaŋ aa ngub ngalar ngən səəm Yesu giɓ vin laadi Yahuzawa, caa wul tu yan ci nə kuni cogn. ²¹ Gyaa gyo ɗaŋ ci ɖa ɗaan ɓuuruk tə səətə kəəm hal a kosarshi tə wul tu " Gin ghən ci gyo ɗaŋ caa tlaa zarsə Urshalima nə cim ngən səmatn hŋaan? aa maan ɗuun nə durtu tə naaɗ mii tə tləər pəris mən. ²² Beɗ tə gii Shawulu a tu vartə monnda, beɗ tə gii kənnda caa ləər vuughənɗi aa dlek Yahudawa yo ɗaŋ cii Damaskus nə giɗ kən tu Yesu yaan ghən ci ɓorghən cogn . ²³ Ɗaŋ aa ɓuuɗi monnda, Yahudawas tə mbərshi waashi duryo tu tə ɗuuti. ²⁴ Beɗ tə gi shawulu yisəŋ ngətn yo ɗaŋ cighai aa duul gaamashi. Ci muudtəni aa te ken ɓiil ghə yatles dzaŋ tə kaaviɗ, duryo tu tə duuti. ²⁵ Beɗ tə gii kaaviɗ məridənwos tə gəmtii giiɓ buŋgli, tə nyolaar ti a lantargha yatles. ²⁶ Kili yo ɗaŋ a tuli Urshalima, Shawulu taa suu tə jwaam gaam tə məri dən, beɗ tə gi vərtə ngaab shi waashi ɗeɓaɗ, duryo tu tə caa vwaawos hŋ, duryotu ci naamboŋ a giɓ kə mərədən hŋ. ²⁷ Beɗ tə gi Barnabas mbii tə tləri a mənshingən. Afuushi nə yo ɗaŋ Daadən giɗ gaamas a Shawulu ɗaŋ cigha datəpm, hal Daadən wul vi tə yaan, Shawulu ndər fuu vik cogn giɓ Dimaskus səriiɖ tə səəm ngə Yesu. ²⁸ Kili yo ɖaŋ cigha ndaghən tə nyolghən giɓ Urshalima. A fuushi vik cogn səərid a giɓ kə səəm Daadən Yesu. ²⁹ Caa sərɗ yər tə Yahudawa kə Helenanci, Beɗ tə gi tə ci ken nə dur ɗuughənwos. ³⁰ Mənwos ɗaŋ tə yisəŋəi cik, tə tlərti kaisariya, tə ndəər tə ɓətaartə ngai Tarsus. ³¹ A kiles mən laaɓkən yo ɗaŋ tə ta yi yatl kə Yahudawa, Galili tə Samariya tə tu tsətn ngən wuusni tə tuughən, tə ci kən tə riighən a giɓkə vərtə kə Daadən, tə wuum ngən mbutaarghən raa a giɓkə zhipti var, Jwaamghən mən laaɓkən ata ləəɗi. ³² Hal ata tuli, ghənda Biturus taa ngyəlaŋ ɓuuruk te yatleshi , ndəər suutə di a mən laaɓkənyo ɗaaŋ ci yatl kə Lidda. ³³ Ɗa ɗaani ata tuu murwon ɗaŋ səəmwos tu Iniyasu gyo ɗaŋ ci nə pwaaghəni, cigha ɓuuɗ kən a daandal nəghə voni taantan. ³⁴ Bitutus wul tə tu "Iniyasu, Yesu ɗaŋ nə mborghəni aa fuuɗ kəi. Shi shi a karghaɗ ləəmbuɗ waai" swaaɗ a shi shi. ³⁵ Ɓuuruk mən yatl kə Lidda tə yalt kə Sarona tə yel mures, tə ndəər tə suu shi di a Daadən. ³⁶ Gəɗ won Yafa ɗaŋ nə murshinngən, səəmwos tu Tabita, dei tu "Dokas" gəɗes nə murghə fighən gyaal tə yelghən gwaandə gyaa naa kui. ³⁷ A ta tuli nə yo tu a mbuɗ kə nəs ata gon hal məshi; ɗaŋ tə coɓ ghəmbəle shi tə gaati ɗa suumes. ³⁸ Nə duryo tu Lidda yi mel tə Yafa, Məridən Biturus ɗaŋ tə wum tu Biturus ci ɗan, tə shin zarsə mbatləŋ mɓastə.Ca karatə , tu tə vaatəɗi. ³⁹ Biturus tə ta shi shi tə tli cim shi, tə tulghən wosɗi, tə tar tii ɗa suumes. Ɗeɓaɗ guiɖi yo ɗaŋ gyaa turwaasəŋ taa məəshi tə dləər mel ɓastə cii gwaar, tə nyom gyaa luuɗi tə gyaa ləŋsə ɗaŋ Dokas ta riiɓ shi mən a kili yo ɗaŋ ata yi gwaam. ⁴⁰ Biturus ta nyolar shiwaashi ɗa giɓ vines, ata zuuɓni, kara cogn, ata suutə a te ghəmbəles wul tu " Tabita, shi shi ". Ata ɗərə yirwoshi, ɗaŋ a yel Biturus, a tsətnni. ⁴¹ Biturus ta tataaswos shishertə; a kiles ata ciim mənlaaɓkən tə gyaa guɗi yo ɗaŋ gyaa turwaasəŋ taa məəshi, a vərshi Tabitas gwaam. ⁴² Ata na nə ngətn ngǝ yisəŋən ɓuruk giɓ Yafa beɗ tə gi zarsə monnda tə ta caa raa wasəŋəi a Daadən. ⁴³ Ata naai tu, Biturus tə tsətn ɗa Yafai nəghə mbuɗkənmonnda cii tə murwon ɗaŋ səəmwos tu saminu murghə monngən laaɗ.