¹ Murwon ta yi ɗa a giɓkǝ yatl kǝ Kaisariya, ɗaŋ ca cimmtǝ tu Karniliyas, nǝ munvar mǝn manndǝ won ɗaŋ caa cimtǝ tu Italiya. ² Nǝ zaar ya ɗaŋ ca ci vǝr tǝ Cogn, gyo ɗaŋ a vǝr gamashi tə mǝn dənwos nǝ laaghǝ Cogn, ca vǝr wurɓa monnda Yahudawa tǝ som shiɗa nǝ ngǝrshi gya gon fighǝn ca ndǝr tǝ kara Cogn ko dzaŋ gyo. ³ Ɗaŋ suutu ta fi, ɗa kaari, tǝvta futǝ zhiɗkǝn Cogn tu, Zhipti shinngǝn Cogn cigha maghǝndi ɓastǝ. Zhipti shinngǝn Cokes ta wul tǝ tu, ''Karniliyas!'' ⁴ Karniliyas a yaal, yel zhipti shinngǝn Cokes saɗ tǝ raa ghǝ vǝrtǝ, wul tǝ tu, ''Nǝ ni murghǝ dǝnatn? she zhipti shinnghǝn Cokes wul tu, ''karaghǝn Cogn wai tǝ somghǝn zarsǝ ɗa, tǝ naakui.. ⁵ ɗaŋ kya vǝrni Coŋǝi, a tuli tsogn gami, ɗaŋ nǝ ngǝtn ghǝ mbitaghǝn a ken Cogn. Ɗaŋnin, shin zarsǝ Yafa tǝ lǝǝr zaar won ɗaŋ ca cimtǝ tu Saminu gyo ɗaŋ ca cimtǝ tu, Biturus. ⁶ ca tsǝtn tǝ Saminu murghǝ laaɗ monghǝn, gyo ɗaŋ dǝnwos yi ɓill dǝllǝ zha. ⁷ Ɗaŋ zhipti shinngǝn Cokes wul tǝ vi, a tli, Karniliyas a cim mbǝtlǝm a giɓ kǝ mǝn fighǝn laa tǝ dǝn tǝ gya gon ɗaŋ ca yaal tǝ mǝn nǝ dǝn tǝ ndǝr tǝ fi tǝ laa mǝn. ⁸ Karniliyas a fuushi koni ɗaŋ tǝ fi annda a shin shi Yafa. ⁹ Ɗaŋ lǝɓ tlai, adzaŋ ɗaŋ cigha riighǝn, tǝ na mel tǝ dǝllǝ yatl won, she Biturus tai a sumi won tǝ kara Cogn. ¹⁰ She a wum kusǝŋ, ca ŋaal ngǝtn won ɗaŋ wo ci, beɗ tǝ gi mǝnes cigha turghǝn ngǝtn ghǝ cighǝnes, she a yel gon wo a zhiɗkǝn Cogn. ¹¹ A yel tsogn a ŋǝǝri, tǝ koɗ won a shighǝn ɗi tǝ ngǝtn won ɗaŋ pǝri cigha shighǝnɗi a ɗegn, ca dlwaghaɗ tǝ ɗi tǝ banndi wuɓsǝ, ¹² A giɓi wasǝŋ, tluŋsǝ gya gon ɗaŋ ca tlwani vwa yatla ɗǝgn tǝ yetli gami. ¹³ She yerwon a wul vi tǝ yaan, a wul tu, ''shishi Biturus, nger a ci'' ¹⁴ Beɗ tǝ gi Biturus wul tu, ''cik hŋ Daadǝn, ma yi ci ngǝtn won ɗaŋ nǝ ndzǝkkǝnni hŋ'' ¹⁵ Beɗ tǝ gi yeres a mantǝ mǝn ɗa kǝ mbǝtlǝmi tu ''ngǝtn yo ɗaŋ Cogn citǝ ndzǝkkǝn, tǝ man wul tǝ tu nǝ kushi ɗa hŋ'' ¹⁶ Ngǝrshi gin a fi tǝpm mayi, she tǝ mbi koɗe shi gaami. ¹⁷ Ɗaŋ Biturus cigha vuughǝn nǝ zhiɗkǝn Cogn ɗaŋ a yeli, she zarsǝ won ghǝni ɗaŋ Karniliyas a shin shi ɗi cigha dlǝǝrghǝn a ken ɓil dǝni, tǝ ceɗ datǝpm dǝni, ¹⁸ she tǝ tu ken ɓili,Saminu, gi ɗaŋ caa cim tǝ tu, Biturus, a shiɗi ɗuuniya? ¹⁹ ɗaŋ Biturus cigha ɓitalghǝnwos a zhiɗkǝn Cogn, Zhiptivar wul tǝ tu, ''yaal, zarsǝ mayi ci ɓaskǝ ŋaalghǝn. ²⁰ Shishi a laaɓ shi, dǝrtǝ tǝ ngaɓkǝ ghai hŋ, duryo tu myan mǝ shinshi. ²¹ Biturus a shiɗi a man tu mǝnes, a wulshi tu, ''nǝ myaan ɗaŋ kya ŋaalmi, kǝ man nǝ ni? ²² Mǝnvar mǝn mǝn naɗkǝ gǝskǝ vwa, Karniliyas, zaar ghǝ mbuni ɗaŋ ca luu Coŋǝi, Yahudawa ca luu tǝ nǝ ŋaa nyi hŋ, yani ǝŋ zhipti shinngǝn Cogn ɗaŋ ci dzǝk dzǝk ghǝi a shintǝ tǝ shintǝ man ɗaghǝ dǝn tǝ wum vii won ɓaskǝ. ²³ She Biturus tǝ shii vin tǝ tsǝtnni . Ɗaŋ lǝǝɓ tlyaa, she tǝ tlii tǝ yaŋshi. Mǝn wasǝŋ gya gon ɗaŋ tǝ dlaamɗi Yafa tǝ mbǝr tǝ. ²⁴ Ɗaŋ lǝɓ ta tlai ɗa, tǝ ta ndai Kaisariya. Karniliyas ci ɓashi ɓuɓkǝn hal a tuu mǝnwos tǝ gya kamci ɗaŋ ci mel. ²⁵ Ɗaŋ Biturus a ndai ɗi, Karniliyas a tutǝ, a zuɓni a mbuu tǝ. Biturus ngaɓtǝ tǝ shishi. ²⁶ Awul tu, shishi adlǝǝrni ni, ''myan beɗ minǝ zaar.'' ²⁷ A kili daŋ Biturus ci ɓastǝ wulghǝn vii, ɗaŋ a ndai giɓi, a tu zarsǝ monnda ta jwaamshi a lǝɓ namboŋ. ²⁸ A wulshi tu, ''kyani ka yisǝŋ tu Yahudawa caa tsǝtn a lǝǝɓvnamboŋ, tǝ ŋaal, tǝ ndǝr tǝ tlǝ a dǝn zarsǝ gya gon mari mari hŋ. Beɗ tǝ gi Cogn wulǝm tu a ndara mǝ wul gon tu ci tǝ ndzǝkkǝnni hŋ cik, beɗ ma tu dashi nǝ kuskǝ zaar hŋ. ²⁹ Yan a ca mǝ man ki mǝn taŋ taŋ a kili yo ɗaŋ kǝ cimǝ dur yo tu mǝ ceɗ ki tu kǝ cimǝ nǝ ni.'' ³⁰ Karniliyas wul tu, mbuɗkǝn wuɓsǝ ɗaŋ a latsǝ, mya karaghǝn Cogn a kiles ɗa dǝnes hal dwaam toknandam, she mǝ yel gon a dlǝǝrghǝn a kennatn tǝvluu pak pak, ³¹ A wullǝm tu, Karniliyas, Cogn gha wum karaghǝn wai, ngǝtn yo ɗaŋ kya fi gya naa kui mǝn a ca mǝ ɓital ghǝ. ³² durghǝ cik, shin gon Yafa, tǝ cim Saminu gyo ɗaŋ caa cimtǝ tu Biturus ɗaŋ ca tsǝtn a dǝn ghǝ Saminu murghǝ monghǝn laaɗi ɗaŋ ci ɓil zhai. ³³ Ǝŋ ya man wo wul vi tǝ kyan. ³⁴ She Biturus wul tu, ɗaŋnin mǝ yisǝŋ tu Cogn ca yaŋngas gon hŋ. ³⁵ A dulghǝ gi, a giɓkǝ zarsǝ kaɓ, muryo ɗaŋ ca mbu Cogn ndǝr laaɓ ngətn yo ɗaŋ Cogn kon, cinǝ murghǝ kaɓkǝn ɓastǝ. ³⁶ Kyani, kaa yisǝŋ shinngǝn yo ɗaŋ a ga mǝn Isar'ila mǝn, a kili yo ɗaŋ a ta fuushi ngǝtn wusni a giɓkǝ Yesu ɗaŋ nǝ ɓorghǝn Cogn gyo ɗaŋ cinǝ Daadǝn ɗebaɗ. ³⁷ Kyaani ngǝtn wan ka yisǝŋ ngǝtn yo ɗaŋ a na cik gyo ɗaŋ aa fi giɓ Yahudiya ɗaŋ a ngaɓɗi Galilii, a kaar ghǝ konghǝn baɓtisma ghǝ Yohanna ɗaŋ ata fii. ³⁸ Ngǝtn yo ɗaŋ Yesu mǝn Nazareɗ a ta fi, ɗaŋ Cognvon dlǝpmtǝ tǝ Zhipti var kǝ ndzǝkni tǝ vartǝ ǝnndi. A ci ken tǝ fighǝn laaghǝ gyaal tǝ ɓanghǝn gonghǝn zarsǝ mǝn tǝ mǝni yo ɗaŋ Shetan a naɗshi, durghǝ tu Cogn ci tǝ yaan. ³⁹ Mǝ tayi ɗa dan a ghǝn yo ɗaŋ a fi giɓ Yahudiya tǝ Urshelima yan Yesu tǝ ɗuuti a te datǝpm ghǝ hǝmbalghǝn a ŋamtsǝi. ⁴⁰ Murin, Cogn shisher tǝ a giɓkǝ mbuɗkǝn mayi a ndǝr sular tǝ tu ko nu tǝ yisǝŋ ti. ⁴¹ Nǝ ɗeɓaɗ zarsǝ ǝŋ tǝ yeli hŋ , she gya gyo ɗaŋ Cogn bwaashi keni tǝ myaani gamawopm, mǝni yo ɗaŋ mǝ ta ci mǝ ndǝr mǝ tlyaa cimtǝ, ɗaŋ a ta shi shi a mǝn mǝǝskǝn. ⁴² A fuumi tu mǝ fuu zarsǝ vik wusni ghǝ Cognvon mǝǝ ndǝr mǝ fuu shi jom jomi tu, nǝ yani ǝŋ Cogn bwaatǝ tǝ ɗǝǝl vi zarsǝ mǝn tǝ mǝn mǝskǝn tǝ mǝn yo ɗaŋ ci gwaam. ⁴³ Ɓastǝ ghǝn mǝn varaŋsǝ shinngǝn Cogn tǝ yeli tǝ ndǝr tǝ kon, durghǝ tu konu ɗaŋ a c raa wos ɓastǝ ta dlaa tǝ loŋsǝ kusǝŋsǝ ngǝtn wos mǝni. ⁴⁴ Ɗaŋ Biturus ca wulghǝn vi gha dulgam ngǝrshi gya gin, she zhipti var shiɗi, kaɓ a mǝniyo ɗaŋ ca wulghǝn vik wusni ghǝ Cogn. ⁴⁵ Mǝni yo ɗaŋ cigha giɓkǝ mǝn laaɓkǝn, ɗaŋ tǝ kaɓi nǝ sǝrǝghǝn zaar, tǝ mǝni yo ɗaŋ tǝ gya Biturus, ngǝrshes ta kwasarshi nǝ zhipti var ɗaŋ a shiɗi gha mǝni yo ɗaŋ ta yisǝŋ Cogn hŋ. ⁴⁶ Duryo tu tǝ wum gya gi ɗaŋ tǝ ta nyaŋngas kaɓkǝn Yesui ca wul vi tǝ riisǝŋ mari mari caa luu Cogn. ⁴⁷ She Biturus kaɓshi ghai tu, ''Nǝ nu ghǝn wo ɗak gya gin fighǝn baɓtisma tǝ zha, ɗaŋ tǝǝ kaɓ zhipti var kǝ ndzǝkni ɗaŋ myaaniyo? ⁴⁸ She a wul shi tu, motlak tǝ fi baɓtismai a giɓ kǝ sǝǝm Yesu Ɓorghǝn Cogn. She tǝ kara tu tǝ ngale ɓashi nǝ kǝ ŋaa mbuɗkǝn njwaatn.