¹ Bulus ta kaɓii tǝ mǝskǝn wos. A dzany forǝm mes ta ciken tǝ lǝǝdkǝn a viin laadi yo ɗaŋ ata yi Urshalima; she mǝn laaɓkǝnes ɓuruk tǝ ta basaŋǝi ko te ɗo a yaatl kǝ Yahudiya tǝ Samariya, mǝn shinngen wos kurum ngǝn tǝ ta naa. ² Zarsǝ kǝ mbuni tǝ ta gii Istifanus, tǝ waa dǝllǝ ghǝ miitsǝ nǝ yaani. ³ Beɗ tǝ gi Shawulu ta fir mǝ laaɓkǝn nyaŋ nyaŋ; ata laaɓ dǝdǝn annda yi nyolar zarsǝ mǝnmonci tǝ guɗi, yi yetl shi giɓ jaarum. ⁴ Beɗ tǝ gii mǝn laaɓkǝn ɗaŋ tǝ ta basaŋǝi, ta tlǝn ciken tǝ fuughǝn vik wusni ghǝ Cognvon. ⁵ Filibus ta tlii Samariya tlǝn fuushi vik Ɓorghǝn kǝ Coghǝi. ⁶ Ɗaŋ jwaamngǝn zarsǝes tǝ wum tǝ ndǝr tǝ yel ngǝtn yo Filibus taya fi, ɗeɓaɗ waasǝŋ tǝ ta sǝǝ kǝǝm a ngǝtn yo ɗaŋ ata ya wul. ⁷ Kusuŋsǝ zhipti tǝ nywal ɗ a zarsǝ monnda ɗaŋ tǝ ta sǝǝ tǝ kǝǝm, cii gǝǝm riiŋ tlyaa tlyaa,vgya mǝn pwaaghǝn tǝ gurumsǝ tǝ ta byaatlii. ⁸ Nǝ gii polghǝn monda tayi ɗa yaatli. ⁹ Beɗ tǝ gii murwon ta yi ɗa yaatli ɗaŋ caa cim tǝ tu Siman, ɓanndǝŋ cinǝ murghǝ zugn; ca yi fi ngetn kwasarghǝn zarsǝ mǝn Samariya, anda yi cim gamas tu, "Zaar ghǝ mbuni." ¹⁰ Ɗeɓaɗ mǝn Samariya mǝn varaŋsǝ tǝ mǝǝri, tǝ taya sǝǝ tǝ kǝǝm ci wul tu, "Cinǝ vartǝ Coghǝi ɗaŋ caa cim tu vartǝ Cogn." ¹¹ Tǝ ta see tǝ kǝǝm dur yo tu aa ta ngalai a kwasarghǝn waasǝŋ tǝ gya ngǝtn ngǝ zugn wos. ¹² Beɗ tǝ gii ɗaŋ tǝ ta caa raai a vik wusni kaɓkǝ Filibus a dulgaam guŋndu Cognvon tǝ sǝm Yesu, Ɓorghǝn kǝ Coghǝi, tǝ ta fishi Baptisma menii mummonci tǝ guɗi. ¹³ Hal Siman tǝ gamas ata caa raai,ɗa kaari ɗaŋ tǝ ta fitǝ baptisma mǝnii tǝ ta tsǝtn tǝ Filibus ɗaɗdaɗaɗ. Ɗaŋ ata yel ngǝtn tǝ dǝllǝŋsǝ ngǝtn, ata kwasar tǝ. ¹⁴ Ɗaŋ mǝn shinngǝnes gyagyo ɗaŋ tǝ tayi Urshalima tǝ wum Samariya taa kaɓ vik Coghǝi, tǝ ta shinndar shi Biturus tǝ Yohanna mǝn. ¹⁵ Ɗaŋ tǝ ta tuliɗi, tǝ ta karashi Cogn mǝn, durghǝ yo tu tǝ kaɓ zhipti varii. ¹⁶ Durghǝ yo tu a kili gii zhipti var aa ta shiidi gha gaam gon waasǝŋ hŋ. Taa ta fishini baptisma mǝn kurum a giɓkǝ sǝm Daadǝn Yesu. ¹⁷ She Biturus tǝ Yohanna tǝ ta gaa shi taas mǝn anda tǝ kaɓ zhpti var. ¹⁸ Ɗaŋ Siman ta yel mǝn shinngǝnes caa vǝr zhipti var a te lǝɓ gaaghǝn taas waasǝŋ, ata vǝrshi wurɓa. ¹⁹ A ta wul tu, "Vǝrmǝn vartǝ, durghǝ tu myan ma ɓuruk muryo ɗaŋ mya gaa tǝ taas tǝ kaɓ zhipti varii." ²⁰ Beɗ tǝ gii Biturus wul tǝ tu, "Azurfa waa tǝmalarii tǝ kyani ghai, durghǝ yo tu ɓital tu ka ɗiiɓ vǝrghǝn kǝ Cghǝi ǝ wurɓa. ²¹ Ki tǝ ngǝtn won ko ngǝtn ngǝ mbiighǝn won a dei gin hŋ, durghǝ yo tu raa waa nǝ napti gha Cogn. ²² Nǝ durghǝ gii nyom yaatl nǝ kuskǝ raa wai, aa kara Daadǝn, durghǝ tu dlaaghǝ loŋsǝ kuskǝ raa waa mǝnii. ²³ Durghǝ yo tu maa yeli kigha giɓkǝ raa malarghǝn tǝ kuskǝ ngǝtn. ²⁴ Siman sutuɗa a wul tu, "Ɗeɓaɗ ngǝtn yo ɗaŋ kǝ kwaan kara Cogn tǝ tum hŋ." ²⁵ Ɗaŋ Biturus tǝ Yohanna tǝ zhiɗ tlyaghǝn zha tǝ ndǝr te kwaan vik Daadǝn, tǝ ta sushi Urshalima, cii fuushi vik wusni a mǝrǝ yaatl Samariya ɓuruk. ²⁶ Ɗaŋngǝnin zhipti shinngǝn Cogn a wl Filibus vii tu, "Shishi aa tlii te banndi gǝshi a tǝpi gii ɗaŋ ambi te Urshelima tlǝghǝn Gaazai." (Tǝpi gin yini dlǝk ndǝǝr). ²⁷ Ata shishi tlii, she murwon ngǝni ɗaŋ a dlamɗi Habasha, cinǝ puutlkǝn, dǝllǝ murghǝ vartǝ gha Kandakatu, guŋ won ɗaŋ cinǝ gǝɗ Habasha. Yaan ata yi tǝ guŋndu buruk a ngǝtn ngǝ taas kǝ gǝɗes. A ta man Urshalima nǝ mbuughǝni. ²⁸ Ata yigha sughǝn wos ɗi cigha tsǝtnngǝn a keke mǝnndǝ,annda yi kwaan vik dlyaaɗkǝn kǝ murghe shinngǝn Cogn Ishaya. ²⁹ Zhipti var ta wul Filibus tu, "Tlǝ aa tsǝtn mel tǝ keke mǝnndǝi. ³⁰ "She Filibus ta kir tlii ɓastǝ ata wum tǝ cigha kwanngǝn vik dlyaaɗkǝn kǝ Ishaya murghǝ Shinngǝn Cogn. A ta wul tǝ tu, "Kǝ yisǝŋ ngǝtn yo ɗaŋ kya kwaani ya." ³¹ Mǝn Habashas ta wul tǝ tu, "Wur ghannda ma yisǝŋe, she gon ya zhiɗǝm ngai hŋaan. A ta Filibus to nda ɗa keke mǝnndes tǝ tsǝtn cimtǝ ³² Gin ngǝn nǝ mbǝres ɗaŋ mǝn Habashas taya kwaan, "Tǝ ta tlǝǝr tii ɗaŋ tǝǝm a lǝɓ ngyerghǝn, ɗaŋ ŋaa tǝǝm a taas kǝ mǝn ɓǝǝlghǝn a mwaali, a ɗǝ vii wos hŋ. ³³ Agiɓkǝ mbutarghǝn gaam wos tǝ naɗ tii tǝ yel gwaandǝ wos hŋ. Nuu ghǝn wo ɗyaa kon ɓwaaghǝn wusuli wosso? Durghǝ tu aa mbi rai woshii a ɗǝgn. ³⁴ She zaarghǝ puutl kǝnes ceɗ Filibus a wul tu mya karaghǝ, "Nuu ghǝn Murghǝ shinngǝn Coghǝi ca wul vii ghai yo, nǝ gamassa ko gon mari?" ³⁵ Filibus ta ngaɓ wulghǝn vii, ata ngaɓ tǝ dlyaaɗkǝn kǝ Ishaya ndǝr fuu tǝ vii a dulgaam Yesu. ³⁶ Ɗaŋ tǝ ta yi gha tǝpm, tǝ man a lǝɓ won ɗaŋ zha ghaizaar ghǝ puutlkǝnes ta wul tǝ tu, "Yeli,zha ghǝni ɗuun, nii ghǝn wo ɗag tu aa fim baptisma mǝne?" ³⁷ Filibus wul tu, "Ǝŋ kya caa raai, tǝ raa wa ɓuruk, ta ɗya ta fighǝ baptisma mǝnii." ³⁸ Mǝn Habashas a wul tu, "Maa caa raai tu Yesu Ɓorghǝn ngǝ Cogn nǝkuni Cognvon." Nǝ gii mǝn Habashas ta ca keke mǝndes tǝ dlǝǝrii. Tǝ ta shii tǝ ndai ɗa zhas bet waasǝŋ she Filibus ta fitǝ batisma mǝnii. ³⁹ Ɗaŋ tǝta nywaali ɗi ɗa zhais zhipti Daadǝn ta mbi Filibus tlǝǝrii. Murghǝ puutlkǝnes ta man yel tǝ ɗa hŋ, ata ci ken tǝ riighǝn wos anda yi pol tǝ. ⁴⁰ Beɗ tǝ gii Filibus ta mbwaɗi Azotus annda yi fuu vik wusni dǝllǝŋsǝ yaatles, hal annda ata tul ɗi Kaisariya.