¹ Murwon ɗa sǝǝmwos tu Hananiya ci tǝ Safiratu gǝɗi wos, tǝ ɗiɓar ŋaa kitn wasǝŋ won, ² she a nga wurɓes waɗi tǝ (tǝ yisǝŋghǝn gǝɗi wos) tǝ lǝǝr wurɓes ɗi man gaa a ken mǝn shinngǝnes. ³ Beɗ tǝ gi Biturus a wultu, ''Hananiya ni a ca ǝŋnnda shetan yughǝ raa mǝn nǝ ɓerni ngaghǝn zhipti var mǝn ɗaŋ kǝ nga wurɓ kitn was ɗaŋ kǝ ɗiɓar kǝ waɗiya? ⁴ Ɗaŋ ka ta ɗiɓar hŋ, nǝ gwa hŋaan? wuri ǝnnda kǝ ɓital gin a raa wa cighǝye? kǝ ngani ɓerni zaar mǝn hŋ, beɗ tǝ gi nǝ Cogn'' ⁵ Ɗaŋ a wum cik, Hananiya ndaɗ mǝshi, vǝrtǝ ngaɓ ɗeɓaɗ mǝn yo ɗaŋ tǝ wum ngǝrshes. ⁶ Tlǝɓǝrsǝ won tǝ ta shiɗi tǝ man karghaɗti tǝ mbi tii tǝ tlǝ tlǝn giiti ɗi. ⁷ Ɗaŋ a ngalei ŋaanjwaan gǝɗiwos ndai ɗi, a yisǝŋ ngǝtn yo ɗaŋ ca riighǝn hŋ. ⁸ Biturus a wul tǝ tu, ''fuumɗi kǝ ɗiɓar kitn wanes wuri?'' sheba futǝ tu ''ai mǝ ɗiɓar tsǝni'' ⁹ She Biturus a wul tu, ''wuri ǝnnda kǝ kaŋ vii tu a diɓ zhipti var ghǝ Daadǝne? yeli yasǝŋ mǝn yo ɗaŋ tǝ tli g turwaɗi ǝŋ cigha ken ɓiil ǝnndi, ta mbi ghǝ ta nyolari cik daŋ. ¹⁰ kyaɗ ɗa ɗan a ta ndaɗ mǝshi. Ɗaŋ tlǝɓǝrsǝ tǝ ndaɗi, tǝ tu a mǝshi, tǝ mbitǝ tǝ nyolari tǝ tlǝn giiti mel tǝ turwos. ¹¹ Dǝllǝ vǝrtǝ ngaɓ mǝn vin ladeshi tǝ muryo ɗaŋ ngǝrshi gin. ¹² Ngǝtn ghǝ kwasarghǝ monnda a fi a te tas ghǝ mǝn shinngǝnnes. Tǝ ta jwaamshi a ɗiidlǝŋ dǝn ghǝ Sulemanu. ¹³ Beɗ tǝ gi, gon won ta ɗya mbǝrtǝ tlǝn tushi hŋ; nǝ yo tu zarsǝ caa luushi nǝ ŋaanyi hŋ. ¹⁴ Hal ghǝnni mǝn caghǝn raa ca daɗakkǝn mangǝnɗi a Daadǝn, zarsǝ monnda mǝn monci tǝ guɗi, ¹⁵ Nǝ yo tu caa nyom mǝn gonghǝnɗi tǝ lǝǝr shiɗi a datǝpm a lǝǝɓ mbuɗkǝn wasǝŋ tu yan Biturus ya man nǝ latsǝghǝ zhipti wos tǝ tǝǝnshi. ¹⁶ Saɗɗa zarsǝ monnda tǝ manɗi a gya yatlǝi, gya gon daŋ ciɗi te Urshelima, ciyi lǝǝr gya gonghǝn ɗi tǝ gya ɗaŋ mǝndǝŋsǝ tǝ ngaɓshi, ɗeɓaɗ tǝ byatlii. ¹⁷ Beɗ tǝ gi, pǝris vari shishi tǝ mǝn yo ɗaŋ ci cimshi ɗeɓaɗ (gya Sadukiyawa ǝnnɗi); ¹⁸ tǝ ngaɓ kashi she tǝ ngaɓ mǝnshinngǝnnes, she tǝ njyak shi washi jarum. ¹⁹ Ɗa kaviɗi murghǝ shinnghǝn Cogn kǝ Daadǝn a ɗǝrǝ ɓiil jarumeshi a nyolarvshi washi awul tu, ²⁰ Tlǝnni a ɗǝrǝ vinladi a kon afuu zarsǝ ɗeɓaɗ vik wusni kǝ fuuɗkǝn.'' ²¹ Ɗaŋ tǝ wum cik tǝ ndai viin lades a dlǝk zdaŋ tǝ kuɓar. Beɗ tǝ gi ɗaŋ dǝllǝk pǝrishes man tǝ mǝnwos, a cim mǝn balgham wasǝŋes ɗi, tǝ gya mǝn varaŋsǝ zarsǝ ghǝ Isar'ila tu, tǝ tlǝŋ nyolar mǝn mǝnshinngǝnes ɗi ɗa jarumes. ²² Beɗ tǝ gi ɗaŋ mǝn varaŋshes tǝ tlǝ tu mǝn shinngǝnnes ɗa jarumes hŋ, she tǝ sushi ɗi tǝ man kon tǝ fuushi tu, ²³ ''Ɗaŋ mǝ tlǝ mǝ tu jarumes nǝ yatlǝkǝn, mǝn yalghǝn cigha dlǝrghǝn ɗa ɓiili, beɗ tǝ gi ɗaŋ mǝ ɗrǝ mǝ tu gon ɗa giɓi hŋ.'' ²⁴ Ɗaŋ mǝnvar ghǝ vinlades tǝ pǝris vares tǝ wum ves, she tǝ ta vuui ndzarɗ, tǝ wul tu ni ǝŋ wo laaɓ kaari. ²⁵ Cighai cik gon won man wulshi tu, ''mǝni ɗaŋ kǝ shin shi giɓ jarumi yan ci ɗi a dlǝǝrghǝni viinladi a durghǝ giɗkǝn zarsǝ ǝnndi.'' ²⁶ Ɗa cik mǝnvar vinlades tǝ mǝn wos gya gon tǝ tlǝŋ sularshi ɗi, gin tǝ shisher ghǝn raadhai hŋ, nǝ yo tu ca ci vǝrtǝ zarsǝ ta lliɗshi tǝ puus. Ɗaŋ tǝ ta lǝǝr shi ɗi. ²⁷ she tǝ ta gashi ɗa balgham jwaamngǝnnes. She pǝris kǝ vares ngaɓ shi ceɗ kǝn ²⁸ tu, ''ma ca ki yir tu a man kuɓar a giɓkǝ sǝǝmǝn ɗa hŋ, hal ghǝni ka man yugn Urshelima tǝ giɗkǝn wan, kya ndǝr kǝ ndǝr kǝ ŋaal voraŋ muri shii ɓasmi.'' ²⁹ She Biturus tǝ gya mǝn shinngǝnni gya gon tǝ suɗ tu, ''A na ciɓ mǝ laɓ ngǝtn yo ɗaŋ Cogn kon, ɗaŋ mǝ fi nǝ kǝ zarsǝ. ³⁰ Cogn ghǝ Daawopm ghǝ a shishir Yesu, gyo ɗaŋ kǝ ta ɗutii kǝ ghǝmbaltii a gwas. ³¹ Cogn ɓital tǝ a taaghǝ zariwos tǝ na nǝ ŋaa guŋ tǝ murghǝ kaɓkǝn tǝ kaɓkǝ ndaaɗ kǝn Isar'ila tǝ dlaaghǝn loŋsǝ kusǝŋsǝ ngǝtn. ³² Ma tlya zha ngǝrshi gya gin ɓuruk, cikǝn Zhipti var gyo daŋ caa wum kǝǝm viwoshi. ³³ Beɗ tǝ gi, mǝn Farisawa ca cimtǝ tu Gamaliyel. ³⁴ murghǝ giɗ kǝn mborki yo ɗaŋ Musa dlyaaɗ muryo ɗaŋ zarsǝ caa luu tǝ ŋaanyi hŋ, a shishi dlǝrni,a wul tu, mǝnshinngǝnnes tǝ nywalib ɓǝdlǝŋ gham ŋaa njwaatn. ³⁵ She a wulshi tu, ''mǝnwopm Isar'ila, ɗakghǝn ɗa tǝ ngǝtn ɗaŋ kya ŋaal a fi mǝnin. ³⁶ A mbuɗkǝn wan murwon tu Tadiyas ca mbi gamashi tu cinǝ gonwon, zarsǝ monnda ɗaŋ tǝ ta kuri wuɓsǝ tǝ ta laaɓtǝ ɗaŋ tǝ ta ɗutii, mǝn laaɓkǝn wos tǝ ta pashi tǝ na nǝ ngǝtn won ɗa hŋ. ³⁷ A kili muri gin, Yahuza mǝn Galilii won ata shishi ɗi a jinnɗi kwaanghǝn zarsǝi,a ta man mor zarsǝ monnda. Yan beɗ a ta laaɓ zha, ɗeɓaɗ mǝn wos ɗaŋ caa laaɓ tǝ ta pashi ɗaŋ. ³⁸ Ɗaŋnin mya wulki tu, janki kar a mǝnin a gashi saɗ, nǝ yo tu, yan ngǝtn won ɗaŋ caa fighǝn zarsǝ wo man malari. ³⁹ Beɗ tǝ gi,ǝŋ yan nǝ kaɓkǝ Cognvon, ɗeɓaɗ wan gon wo ɗyaa sughǝɗtǝ hŋ, wo na tuvkya finǝ mandǝ tǝ Cognvon. Ɗani ǝŋ mures ta jaa shi raa mǝni ⁴⁰ Ɗaŋ tǝ ta ciim mǝn shinngǝnnesɗi giɓi tǝ ta voɗshi washi tǝ ndǝr tǝ caashi yir tu tǝ man wul vii tǝ sǝǝm Yesui ɗa hŋ, she tǝ ta gashi tǝ tlǝi. ⁴¹ Mǝn shingǝnnes tǝ ta ga balghame jwaamngǝnneshi tǝ polghǝn tu tǝ tuli ɗaŋ tǝ tlyavforǝm nǝ sǝmmes. ⁴² Ɗa kari gi ko dzaŋ gyo a giɓ vin lades tǝ yi laɓ dǝn-dǝn tǝ ciken tǝ giɗkǝn tǝ fuughǝn zarsǝ tu Yesu yan cinǝ Ɓorghǝnni kǝ Cogn.