¹ A kili gi ɗaŋ Biturus tǝ Yohanna cigha wulghǝn vii tǝ zarsǝ, gya sǝŋwaari (Priest) tǝ gya mǝn varaŋshi ghǝ viin laadi tǝ gya Sadukiyawa tǝ man ɗaashi. ² Taa ta vuyi ndzarɗ nǝ durghǝ yo tu gya Biturus tǝ Yohanna cigha zhiɗkǝn ngǝtn tǝ fuughǝn zarsǝ a dulgaam ngǝ shishighǝn Yesu a mǝn mǝskeni. ³ Tǝ ta nyom shi waashii tǝ tlǝn yetlii giɓ jaarum tǝ gaa shi waasǝŋǝi tu she lǝɓ yaa tlaa gham durghǝ tu suutu a ta fii. ⁴ Beɗ tǝ gii zarsǝ monnda te wum vies tǝ kaɓ tǝ gaai ɗa raai; yugngǝn mǝn yo ɗaŋ tǝ kaɓ tǝ gaa ɗa raas tǝ ta fii zaŋngu nanndam. ⁵ Gya guŋsu tǝ mǝn varaŋsǝ tǝ gya mǝn dlyaaɗkǝn waasǝŋ tǝ jwaamshi waashii giɓ Urshelima. ⁶ Annas dǝllǝ ghǝ sǝŋwaari (Priest) ata yi ɗa ɗan. Kefas tǝ Yohanna tǝ Aleksanda, ɗeɓaɗ gya wusuli ngǝ dǝllǝ sǝŋwaares (Priest). ⁷ Ɗaŋ tǝ gǝm gya Biturus tǝ Yohanna a dlei waasǝŋ, tǝ ceɗ shi tu, "Tǝ vartǝ gyo ko tǝ sǝm ngǝ nuu ghǝn kǝ fi ngǝrshi ginno?" ⁸ She Biturus nǝ yugngǝn te zhipti var, a wulshi tu, "Kyaani guŋsǝ ghǝ zarsǝ tǝ mǝnvaraŋsǝ, ⁹ ǝŋ yaan yaawon kyaa ndami nǝ ngǝ mbuni yo ɗaŋ mǝ fi murghǝ gonngǝnin mǝn-tu tǝ wur ghǝnnda murin a fuɗi ye? ¹⁰ Gin tǝ naaki mǝn tǝ yisǝŋngǝn ɗeɓaɗ waan tǝ mǝn Isar'ila tu, a giɓkǝ sǝm ngǝ Yesu ghǝ Nazarat, Ɓorghǝn kǝ Cogn, gyo ɗaŋ kǝ hemmbal tii, gyo ɗaŋ Cogn ata shisher tǝ agiɓkǝ mǝn mǝskǝn nǝ dur wos kǝn murin caa dlǝǝrghǝn ɗin byaatl byaatl a ken waan. ¹¹ Yesu Ɓorghǝn kǝ Cogn kǝn cinǝ puus gyo ɗaŋ kyaani mǝn nalghǝn viin kǝ nyaŋngas tǝ, beɗ tǝ gii yaan nguŋ a naa nǝ puus getle viines. ¹² "Ka tu kaɓkǝn a gon hŋ ɓar, nǝ durghǝ yo tu taa vǝr sǝm won a ɗǝgn ɗaŋ wo ɗyaa kaɓmi hŋ." ¹³ Ɗaŋ tǝ ta yel ŋaskǝn raa gya Biturus tǝ Yohanna, ɗaŋ tǝ yisǝŋǝi tu cinǝ gyagon won toɗak, mǝn gaam jii, she ata kwasarshi,tǝ man yisǝŋei tu gya Biturus tǝ Yohanna tǝ ta yi tǝ gya Yesu. ¹⁴ Nǝ durghe yo tu tǝ yel murii ɗaŋ tǝ fuɗ tii cigha dlǝǝrghǝn ɓashi, tǝ yir ngǝtn yo ɗaŋ ta ko hŋ. ¹⁵ Beɗ tǝ gii ɗa kaari tǝ ta caa mǝn shinngǝn tu tǝ nywaali ɗa balghami te ta wul gha gama waasǝŋ. ¹⁶ Tǝ ta wul tu, "Nǝ nii ghannda ma fi mǝnin ne? Nǝ durghǝ yo tu nǝ jom jomi dǝllǝŋsǝ ngǝtnngǝ kwasarghǝn yo ɗaŋ tǝ fi, ko nuu a yaatl kǝ Urshalima aa yisǝŋǝi, ma kǝǝm ma nyaŋngas hŋ. ¹⁷ Beɗ tǝ gii ǝŋ yaan myaa suu tǝ ciken a dlǝk zarsǝ hŋ, a naa ciɓ mǝ motsar shi tǝ man wul vii gin gon tǝ sǝmǝn ɗa hŋ. ¹⁸ Tǝ cim gya Biturus tǝ Yohanna ɗi giɓi tǝ caashi yirr tu tǝ man kon viin ko tǝ giɗ gya gon ngai a giɓkǝ sǝm Yesu ɗa hŋ. ¹⁹ Beɗ tǝ gii Biturus tǝ Yohanna tǝ sushi ɗa tǝ wulshi tu, "Ko yi ndaraara a ken Cogn mǝ laaɓ gwaanii tǝ moɓ goshii, ngerǝn ngetnwaan. ²⁰ Ma ɗyaa ma dlǝǝlar konngǝn ngǝtn yo ɗaŋ maa yeli mǝ ndǝr mǝ wumi hŋ. ²¹ Ɗan tǝ ɓan sǝǝɗkǝn vii gya Biturus tǝ Yohanna tǝ gaa shi tǝ tlii. Durghǝ yo tu tǝ tushi tǝ ngǝtn yo ɗaŋ wo caa ta vershi forǝm hŋ, nǝ durghǝ yo tu ɗeɓaɗ zarsǝ cigha luughǝn Cogn nǝ ngǝtn yo ɗaŋ a fi. ²² Murin ɗaŋ ata yisǝŋ ngǝtn ngǝ kwasarghǝn aata moɓ voni tashi wuɓsǝ ²³ Ɗaŋ tǝ ta dlaa shi waasǝŋǝi ,Biturus tǝ Yohanna tǝ ta man nga men waasǝŋ tǝ fuushi ɗeɓaɗ ngǝtn yo ɗaŋ gya sǝŋwaari varashi tǝ fuushi ɗi. ²⁴ Ɗaŋ tǝ ta wumii tǝ ta wul ɗeɓaɗ waasǝŋ tlyaa tlyaa tu, "Daadǝn kyan kǝ ndǝr gaami tǝ ɗǝgn tǝ dǝllǝŋsǝ zha tǝ ɗeɓaɗ gya ngǝtn yo ɗaŋ ciɗa giɓi, ²⁵ kyan ɗaŋ kǝ ta wul vi a te zhipti var a te vii mon wa, dawopm Dauda, tu, "Nǝ nii a caa mǝn ɗǝgn ca fi tliiti yer, ɓitalghǝn zarsǝ yigha ɓenndǝmi a ko nii?" ²⁶ Kǝ wul tu guŋsǝ kǝ ɗegn taa jwaam gama waasǝŋǝi lǝɓ namboŋ. Guŋsu taa jwaamshi waashii a lǝɓ namboŋ caa gaa gǝǝɓ tǝ Daadǝn tǝ Ɓorghǝn woshii.' ²⁷ Taŋ taŋ, gya Hiridus tǝ Bilatus ɗeɓaɗ tǝ gya mǝn ɗǝgn tǝ gya mǝn Isar'ila tǝ jwaamshi a yaatlǝn nǝ gaaghǝn gǝǝɓ tǝ mon wa Yesu, Murghǝ Ndzǝkkǝnii gyo ɗaŋ kǝ ɓor tǝ. ²⁸ Taa jwaam shi ɓuruk tǝ fi ngǝtn yo ɗaŋ taas wa kǝ fuɗkǝn a zhiɗ ngǝtn ngǝ giɗkǝn tǝ kwasarghǝn a giɓkǝ sǝm kǝ ndzǝkkǝn mon waa Yesu." ²⁹ Ɗaŋngǝni Daadǝn, yaal aa yel sǝǝɗkǝn vii waasǝŋ a vǝr monsǝ wa varte kǝ konngen vii waa tǝ ŋaskǝn raa. ³⁰ Taa taas wa kǝ fuɗkǝn aa giɗ ngǝtn ngǝ giɗkǝn tǝ kwasarghǝn a giɓkǝ sǝm ndzǝkkǝn kǝ mon wa Yesu. ³¹ Ɗaŋ tǝ ta ɓan karaghen Daadǝnii lǝɓ yo ɗaŋ tǝ ta jwaamshi ghai ɗeɓaɗ waasǝŋǝi ta zhighǝɗii. Zhipti var ta yugn shi waashii tǝ ngaɓ vik Cogn kwaanngǝn tǝ ŋaskǝn raa. ³² Mǝnes monnda ɗaŋ tǝ ta caa rrai gaam waasǝŋ tayi namboŋ. Gon waasǝŋ ta wul tu ngetn yo ɗaŋ yir nǝ gos hŋ, nǝ ko nii waasǝŋ ta yi namboŋ. ³³ Tǝ tlyaaghǝn vartǝ mǝn shinngǝnes cigha konngǝn tlyaghǝn zha waasǝŋ dul gaam shishighǝn Daadǝn Yesu, gyaal vari ta yi ɓashi laaɓkǝni. ³⁴ Gon a giɓi waasǝŋ ɗan tu a naa ngǝtn won nii hŋ, ɗeɓaɗ mǝn yo ɗaŋ tǝ yir lǝɓ tǝ dǝnsǝ tǝ ɗiɓarii ³⁵ tǝ lǝǝr wurɓas ɗi tǝ man gaa a kenngǝ mǝn shinngǝnes, tǝ ɓǝǝlii ko nuu kaɓ ko nii ɗaŋ caa suu. ³⁶ Yusufu, muryo ɗaŋ ca fi laa dǝn Cogn, nǝ mǝn Kubrus, gyo ɗaŋ mǝn shinngǝnes caa cim tǝ tu Barnabas (tu murghǝ tlyaaghǝn raa) ³⁷ Yir kitn wos ɗaŋ ɗiɓari a lǝǝr a lǝǝr wurbas ɗi a ken mǝn shinngǝnes.