¹ Ɗaŋ Biturus tǝ Yohaana tǝ ta ya man vin Cogn a kili karaghǝn Cogn kili kǝ toknanndami. ² Murwon ta yi ɗaŋ te ta ɓwaatǝ nǝ gurum, caa mbi tǝ ko dzaŋgyo tǝ tlǝǝr tǝ a ken ɓiil dǝn Cogn gyo ɗaŋ caa cim tu ndaraara ci kara wurba a mǝn ndaghǝn ɗa viin Coghes. ³ Ɗaŋ a ta yel gya Biturus tǝ Yohanna cigha ndaghen ɗa dǝn Cokes, she ata kara shi nǝ wurɓa. ⁴ Biturus ta caa yirr yel tǝ ghai, cikkǝ Yohanna ata wul tǝ tu, "Yaal aa yel mi." ⁵ Gurumes ta yaal yelshi ca gaa raa tu wo tu ngǝtn won ɓashi. ⁶ Beɗ tǝ gii Biturus ta wul tu, "Mii tǝ azurfa ko jinari hŋ, beɗ tǝ gii ngǝtn yo ɗaŋ mǝ yir ma vǝrghǝ, "A giɓkǝ sǝm Yesu kǝ Ɓorghǝnii mǝn Nazaraɗii,myaa wulghǝ tu shishi aa riini." ⁷ Biturus ta ngaɓ tǝ gha taas kǝ zaari wos shishertii,kyaaɗ ɗa ɗani yaasǝŋ wos tǝ gorgwaatl wos tǝ ta tlyaa. ⁸ Gurumes ata diim shishi dlǝǝrni nguɓ riighǝn, ata laaɓ gya Biturus tǝ Yohanna giɓ dǝn ngǝ Cokes, cigha riighǝn, cigha diimngǝn cigha luughǝn Cogn ⁹ Buruk zarsǝ tǝ ta yel tǝ ɗaŋ cigha riighǝn chigha nyaarghǝn Cogn. ¹⁰ Tǝ ta yisǝŋǝi tu nǝ murii ɗaŋ ca yi tsǝtn a ken ɓiil kǝ ndaraara kǝ dǝn Coghǝi yi kara wurɓai, ngǝtn yo ɗaŋ tǝ yeli ata kwasarshi naŋ. ¹¹ Ɗaŋ ata ciken tǝ ngaɓkǝni gya Biturus tǝ Yohanna, ngǝrshi ta kwasar zarsǝ kaɓ she tǝ ta ɓǝɗ shi ɗi mel ɓashi mel ɓashi a dǝǝli gii ɗaŋ nǝghǝ Suleimanui. ¹² Ɗaŋ Biturus yel cig she a wulshi tu, Kyaani mǝn Isar'ila, ngǝrshi gin a kwasarki nǝ nii? Nii caa kya caacyir kǝ yel mi daŋkutu mǝ caa murin tǝ vartǝ wopm ko nǝ ngǝtn ngǝ mbuni wope? ¹³ Cogn ngǝ Ibrahim tǝ Ishaku tǝ Yakub, Cogn ngǝ gya dawopm a luu mon wos Yesui, yaani ghen kǝ ta vǝrtii, kǝ nyaŋnhas tǝ a ken Bilatus ɗa awul tu wo gǝm tii. ¹⁴ Kǝ ta nyaŋngas tǝ, yaan murghǝ ndzǝkkǝni tǝ zaar ghǝ zaari, a bamvi gii tǝ ta gǝm ki murghǝ ɗughǝnzaar mǝn ¹⁵ Kǝ ɗu gyo ɗaŋ a ɓwalar rai ɗi gyo ɗaŋ Cogn ta shisher tǝ ɗi a mǝskǝni, myaani ghǝni mǝn tlyaghǝ zha ngǝrshi gin. ¹⁶ Ɗaŋngǝnin nǝ caaghǝn raa a sǝm wos murin ɗaŋ kya yel tii ɗaŋ kaa yisǝŋǝn tǝ ɓeɗ, a sǝmi gineskǝn a ca ci tlyaa tlyaa. Caaghǝn raa a sǝm ngǝ Yesu a vǝrtǝ dlii wusni wos a ken waan ɓuruk. ¹⁷ Ɗaŋngǝ gua ŋaaghǝ naa, mǝ yisǝŋ kǝ fi gii gha maalghǝni ɗaŋ gii ɗaŋ gya guŋsu waan tǝ fii. ¹⁸ Beɗ tǝ gii gya ngǝtn yo ɗaŋ Cogn ata kon a vii mǝn shinngǝn wos ɗi yaan tu, gii ɗaŋ nǝ Ɓorghǝnii wo buŋ a yugngarii ɗaŋngǝnin. ¹⁹ durghǝ yo tu ta saaɗ ki kusǝŋsǝ ngǝtn waan mǝnii, durghǝ yo tu kili yo ɗaŋ Daadǝn wo sularki nǝ muuri a ken ngǝ Daadǝn ²⁰ aa tuliɗi durghǝ yo tu tǝ shinndar gii ɗi nǝ ɓorghǝnii gyo ɗaŋ a bwaa tii nǝ durghǝ waanii, Yesu. ²¹ Yaani ghǝn a naa ciɓ gaami Tsogn tǝ kaɓ tii hal dǝǝl ghǝ sulargheni ko nii tǝ gya ngǝtn yo ɗaŋ aa ta kon ɓaandǝŋ ɓaandǝŋ a vii mǝn shinngen wos kǝ ndzǝk ndzǝki. ²² Musa ta wul tu, ciɓ Daadǝn Cogn wo shisher murghǝ shinngen wos a dlei waan ɗaŋ myan, a dlei gya yes waan, seen tǝ kǝǝm a ko nii ɗaŋ wo fuu ki. ²³ Wo man maan tu gyo ɗaŋ ya sese keem Murghǝ Shinngǝn Coki gii hŋ ta datsǝ tii a dlǝk zarse wos.Eh ²⁴ Eh! kaɓ mǝn shinngǝn Cogn ɗaŋ a ngaɓ ɗi a Samaila tǝ gya gyo ɗaŋ tǝ man a kaar wos tǝ kon tǝ ndǝǝr tǝ wul vii nǝ mbuɗkǝni gyagin. ²⁵ Kyaani ghǝn ki mǝǝri ɗaŋ mǝn shinngǝnes tǝ ɓwaa tǝ ghǝ mǝn mbighǝn ɗa rai ɗaŋ Cogn ta fi tǝ gya jiɗ waan, ɗaŋ gii ɗaŋ ata fuu Ibrahim tu, "Ɓaskǝ ghǝn kaɓ dǝnsǝ ɗegn ta tu shiɗshiɗi.' ²⁶ Ɗaŋ Cogn ta shisher mon wos ata shinndar tǝ ɓaski keni durghǝ yo tu tǝ shin ki shiɗshiɗi wos mǝn ɗaŋ ata nyolar ko nuu waanii ɗi buŋngǝn kusuŋsǝ ngǝtn wos.