¹ Ɗaŋ Festus ta ndai gha kumbai ghǝ yaatli tǝ mbuɗkǝn mai, ata Kaisariya tlii Urshelima. ² Dǝllǝ Pǝrishes tǝ delleŋsǝ mǝn yaatl Yahudawa tǝ tlǝǝr vik Bulus. ³ Tǝ ta kara tǝ cim Bulus tǝ tlii Urshelima durghǝ yo tu tǝ tlǝn ɗu tii gha datǝpm. ⁴ Beɗ tǝ gii Festus ta sushi ɗa tu, Bulus nǝ kun dǝn jaarum kǝ Kaisariya,tǝ gii wo ngaa laa hŋ wo sutu yaan ngǝtn wos ɗa ɗan. ⁵ "Tǝ cig gyagyo ɗaŋ ta ɗyaa ta laaɓǝm ɗi. Ko ǝŋ yaan citǝ malghǝn a dul gamashi she aa caa tǝ vii ɗa ɗan." ⁶ Tǝ mbuɗkǝn taantaan ko dzuɓ ata sutu shii ɗi Kaisariya. Ɗaŋ lǝɓ tlai ata tlǝn tsǝtii gha daan ngǝ ɗǝǝlghǝn vii she shin tǝ tlǝn lǝǝr tǝ Bulus mǝn ɗi. ⁷ Ɗaŋ ata tuliɗi ,she Yahudawa ɗi Urshelima tǝ ta tsǝtn mel ɗaŋ tǝ ngaa mberni yo ɗaŋ tǝ ɗya tǝ caa voi hŋ. ⁸ Bulus dlǝǝr nǝ gamas tu, "Maa fi ngǝtn yo ɗaŋ a maal gha mborki ghǝ Yahudawa, dǝn Cogn, ko Kaisar hŋ." ⁹ Tǝ gii Festus suu Yahudawatǝ suu tǝ fuu Bulus kya suu aa tlii Urshelima mǝ tlǝn ɗǝǝlghǝ vii gyagin mǝn ɗan ɓurugha?" ¹⁰ Bulus wul tu, "Maa dlǝǝr a ken daan ngǝ ɗǝǝlghǝn vii ghǝ Kaisar lǝɓ yo ɗaŋ yini ciɓ tǝ ɗǝǝlǝm vii mǝn ngai. Maa maal Yahudawa mǝn hŋ ɗaŋ gyo ɗaŋ kǝ moɓ yisǝŋngǝn. ¹¹ Ǝŋ yaan maa mal ni ko yaan maa fini ngǝtn won ɗaŋ a kǝǝm mǝskǝni maa nyaŋngas hŋ. Beɗ tǝ gii ǝŋ yaan caaghǝn vii waasǝŋ nǝ mberni gon wo ɗyaa verǝm hŋ. Matlǝǝr vieshii gha Kaisar." ¹² Ɗaŋ Festus ɓan wulghǝ vii tǝ mǝn balgham wos a su ɗa a wul tu, "Ka tlǝǝr vieshii a Kaisar. A Kaisar ghǝn ka tlǝ. ¹³ Tǝ ɓuɓkǝn njwaatn guŋ Agaribas tǝ Barniki tǝ ta tulii Kaisariya sǝmmbǝr kǝ mǝn varanse a Festus. ¹⁴ Ɗaŋ a ngaa mbuɗkǝn monnda, she Festus ta ngaa shini guŋ vies a dulgaam Bulus tu, "Murwon ɗuun nǝ naɗkǝn jaarum ɗaŋ Filikus gaa tǝ. ¹⁵ Ɗaŋ mǝ tayi Urshelima dǝllǝ ghǝ pǝris tǝ mǝn varaŋsǝ Yahudawa tǝ ta lǝǝrǝm vii wos mǝn ɗi monnda, tǝ wul tu mǝ ngertǝ vii ɗughǝn mǝn. ¹⁶ Mǝ wulshi tu gii nǝ ngǝtn yo ɗaŋ Romawa caa yi fi ɓaandǝŋ hŋ. She ko caa vǝr gyo ɗaŋ tǝ lǝǝr vii wos ɗi tǝ nyolar gamas a ken ngǝ mǝn caaghǝn vii wos, beɗ tǝ gii she yaan citǝ ngǝtn yo ɗaŋ wo kon tǝ nyolar gamashi ghai. ¹⁷ Tǝ cig ɗaŋ tǝ man ɓasǝm ɗuun a lǝɓ namboŋ, mǝ ɓuɓ hŋ, tǝ gii ɗaŋ lǝɓ tlai she mǝ ta tlǝn tsǝtn a daan ɗǝǝlghǝn vii she mǝshin tǝ lǝǝr mures ɗi. ¹⁸ Ɗaŋ mǝn caaghǝn vies tǝ ta dlǝǝr ɗaa tǝ caaghǝn vii, maa ta wul tu ko nǝ mgǝtn ngǝ zinzini. ¹⁹ She ghǝn yaan tǝ yir tǝni gha raa a dulgaam vi laaɓkǝn waasǝŋ tǝ kǝ Yesu gyo ɗaŋ ata mǝshii, gyo ɗaŋ Bulus caa wul tu ciɗa gwaam. ²⁰ Mǝ yisǝŋ wurghǝn ma paŋ a gaam vies hŋ, nǝ cig mǝ ceɗ tǝ tu caa suu tǝ tlǝ Urshelima tǝ naa tlǝn ɓuɓ vies ɗania? ²¹ Ɗaŋ Bulus ta ŋal Kaisar tǝ ɗǝǝl vii wos, she mǝ ta wul shi tu tǝ gaa tii hal she mya shinndar tǝ Kaisar mǝn." ²² Agaribas wul Festus tu,"Myan maa ma suu mǝ sǝǝ kǝǝm mures." Festus wul tu jaan ka sǝǝ tǝ kǝǝm." ²³ Ɗaŋ lǝɓ tlai Agaribas tǝ Barniki tǝ man tǝndar zarsǝ tǝ ndai ɗa viin belaghes tǝ mǝn varaŋsǝ maandǝ tǝ gyagyo ɗaŋ caa kon ɗa dǝllǝ ghǝ yaatli. Ɗaŋ Festus shin tǝ lǝǝr Bulus ɗi ɓastǝ. ²⁴ Festus wul tu, Guŋ Agaribas, tǝ buruk zarsǝ,kaa yel mureshi ya; ɗebaɗ Yahudawa kǝ Urshalima tǝ kǝ ɗuun maa tsǝtn cimshi, caa dlaarǝm vi gaam tu, a ndara mǝ gaa murin tǝ naa ɗa gwaam hŋ. ²⁵ Ɗaŋ mǝ yisǝŋ tu murin aa fi ngǝtn yo ɗaŋ a ndra tǝ mǝshii hŋ; beɗ tǝ gii tu a suu tǝ tlǝǝr vieshii Kaisar, mǝ pok ɓitalghǝnetn tu mǝ shinndar tii. ²⁶ Mi tǝ ngǝtn naa zaari ɗaŋ mǝ shinndar Kaisar mǝn hŋ. Tǝ gii ma lǝǝr tǝ ɗi ɓaski, ɓaandǝŋ kyan guŋ Agaribas. Durghǝ yo tu mǝ tu ngǝtn monnda ɗaŋ taa dlyaaɗ a dulgaam vies. ²⁷ A yelghǝnetn a ndara mǝ shin zaar yo ɗaŋ cinǝ nɗkǝni tǝ maraŋgusa ɗaŋ mǝ dlyaaɗ ngǝtn yo ɗaŋ aa fi hŋ.