¹ Ɗaŋ mbuɗkǝn nanndam ata laatsǝi she Ananias Pǝris vari tǝ mǝn varaŋsǝ guagon tǝ murghǝ ɗyaaghǝn vii won sǝm wos tu Tatulus tǝ ta tlii ɗaɗan. Tǝ ta ndar vii ɗi adulgaam Bulus a goɓnai. ² Ɗaŋ Bulus ta shishi dlǝǝrni she Tatalus ta nguɓ tǝ caaghǝn vii, ata wul goɓnai tu, "Nǝ dur wa mi tǝ raa ghǝ wusni naŋ, ɓitalghǝn ken wa alǝǝr mi ndǝǝrghǝn mǝn ɗi monnda a yaatl wopm. ³ Nǝ gii myaa kaɓ ko nii ɗaŋ kǝ fi tǝ nyaarghǝn, Feliks. ⁴ Nǝ durghǝ yo tu mǝ gaa ghǝ a tsǝtnngǝn monnda hŋ, myaa kara tu aa sǝǝm keem mǝ kon vietn njwatn. ⁵ Mǝ tu murin ca lǝǝ lǝɓ mari mari, ca caa Yahudawa a ɗǝn ɗeɓaɗ a jenndalghǝni. ca shisher mǝnvaraŋsǝ mǝn. Cinǝ mǝnvar gam wugn. ⁶ Hal ma aa sular viin Coghǝi nǝ lǝɓ nyaŋ. Nǝ gii ghǝn mǝ ngaɓ tiii ɗi.(Mǝ suu mǝ ɗǝǝl tǝ vii mǝn ɗaŋ gyo ɗaŋ mborki wopm kon). ^{7 8} Beɗ tǝ gii Usaiyas ata man kaɓtii a taas wopm nǝ naa tlyaaghǝni. Ǝŋ kya ceɗ Bulus a dulgaam ngǝrshi gyagin, ka yisǝŋ tu ngǝtn yo ɗaŋ myaa caa tǝ vi ɗa yi jom jomi. ⁹ Yahudawa kaɓ tǝ ta naɗ kaar caaghǝn vies. ¹⁰ A kili yo ɗaŋ gobnai ta fi taas Bulus tu tǝ wul vii, Bulus ta wul tu, "Mǝ yisǝŋǝi tu voni monnda ghǝni kigha guŋndu a yaatlǝn, nǝ gii ma fuughǝ vii gha dul gamatn tǝ polghǝn. ¹¹ Kaa dyaa kǝ yisǝŋǝi tu aa moɓ mbuɗkǝn dzuɓ mbǝtlǝm hŋ ɗaŋ mǝ tlǝ nǝ mbuughǝn Cogn giɓ Urshalima. ¹² Ɗan tǝ tum giɓ viin Cogn, maa ta sǝrɗ yer tǝ gon hŋ, maa ta ca zarsǝ gha ngǝtn won viin laadi Yahudawa ko ɗa giɓ yaatli hŋ, ¹³ nǝ gii citǝ ngǝtn won ɗaŋ ta zhiɗ a dulgamatn ɗaŋ a caami vii ghai yaawon hŋ. ¹⁴ Mǝ kaɓi tu ɗaŋ gyp ɗaŋ caa yeli mǝn nge waari dlaaghǝn gaam, cikkǝn mya mbuu Cogn ngǝ gya daagǝn, mya laaɓ mborki yaatl wopm tǝ ngǝtn yo ɗaŋ mǝn shinngǝn tǝ Cogn tǝ ta dlyaaɗ. ¹⁵ Mi tǝ raa feɗi ɗaŋ mǝnin ɗaŋ tu nǝ mǝni yo ɗaŋ ci taŋ taŋ tǝ mǝni yo ɗaŋ ci taŋ taŋ hŋ. Nǝ gii mya mbǝrǝm tu mǝ nai tǝ raa feɗi a ken Cogn tǝ zarsǝ. ¹⁶ Nǝ gii mya mbǝrǝm tu mǝ naai tǝ raa feɗi a ken Cogn tǝ zarsǝ. ¹⁷ Ɗaŋ voni monnda tǝ ta laatsǝi mǝ man ma som yaati ɗa, mǝ lǝǝr wurɓa mǝn ɗi. ¹⁸ Ɗaŋ mǝ ta fi cig she Yahudawa gyagon ɗaŋ tǝ ta dlam ɗi Asiya tǝ ta tum giɓ dǝn ngǝ Cogn a belak kǝ coɓkǝni, a giɓkǝ zarsǝ hŋ, a mwaaɓkǝn lǝɓ hŋ. ¹⁹ A ndara mǝnin tǝ kon ngǝtn yo ɗaŋ tǝ yirr a dulgaam yaan tǝ yirr. ²⁰ Ǝŋ yaan cik hŋ, she tǝ kon ngǝtn yo ɗaŋ tǝ tu a dul gamatn ɗaŋ mǝ ta dlǝǝr a ken mǝn varaŋsǝ Yahudawa. ²¹ She ko yaa yini gha dul gaam ngǝrshi gin namboŋ ɗaŋ mǝ ta dlǝǝrni mǝ kon tlyaa tlyaa ɗaŋ mǝ ta dlǝǝr a dlei waasǝŋ, 'A ta yi gha dulgaam mǝn mǝǝskǝn yaan a caa ci ɓasǝm ɗǝǝlghǝn vii mǝn a ken wa yaawonǝn. ²² She Festus, gyo ɗaŋ aa ta yisǝŋ vieshii mbun mbun ata ɓǝtar vies kai ken wul tu, "Ǝŋ Lisiyas, komandai ɗaŋ ci Urshalimai ya sutǝɗi, ma paŋ vii waai. ²³ She ata wul mǝnvar soja ɗa ɗan tu tǝ lyaa Bulushii, beɗ tǝ gii tǝ vǝr sǝgkǝn tǝ ɗag gya kamtsashi ɓastǝ yelghǝn hŋ. ²⁴ Ɗaŋ ata mbuɗii njwaatn, she Festus ta man tǝ gǝɗi wos Briskila, ŋaa Yahudawa, a ta shin tǝ lǝǝr Bulus ɗi, she a ta wum durghǝ caaghǝn raa a Daadǝn ɓastǝ. ²⁵ Beɗ tǝ gii ɗaŋ Bulus ata wul vii a dulgaam zaari zaari tǝ ngaɓkǝn gaam, tǝ maaghǝn ɗi dzaŋ ɗǝǝlghǝn vii, she vǝrtǝ ta ngaɓ Festushii, ata wul tǝ tu, "Tlǝ ngǝtnwaa, ǝŋ mya tu dǝǝli gon ɗa ma cimngǝ ɗi." ²⁶ A ta ya gaa raa tu Bulus wo vǝr tǝ wurɓa, nǝ gii a ta ya cim Bulus kyaaɗ kyaaɗ tǝ wul vi cim tǝ. ²⁷ Ɗaŋ voni mbǝtlǝm tǝ ta laatsǝi, she Borkiyas Festus ta naai nǝ Goɓna a kaar Filikus, beɗ tǝ gii Festus a taya suu tǝ tu kaɓkǝni a a Yahudawa she ata ci ken tǝ gaaghǝn Bulus nǝ yetlkǝn.