¹ Bulus ta yaal taŋ taŋ a mǝn balghammes a ta wul tu, ''mǝnwopm maa fi riighǝn a ken Daadǝn tǝ raaghǝ mbuni hal nǝ kǝ yaawon.'' ² Dǝllǝ pǝris Ananiya ta caa gya gyo ɗaŋ tǝ dlǝr cimtǝ tǝ voɗtǝ a viwos. ³ Ǝnda Bulus ta wultǝ tu, Cogn wo voɗkǝ kyaan murghǝ kuskǝ raa. kya tsǝtn tu a ɗǝǝlǝm vii mǝn tǝ mborki, beɗ tǝ gi kǝ caa tǝ voɗǝm, a konngǝn mborki hŋaa.?'' ⁴ Gya gyo ɖaŋ tǝ ta dlǝǝr a laŋshi tǝ ta wul tu, tǝ cik ǝŋ ka ver dǝllǝ pǝris kǝ Coŋaa?'' ⁵ Bulus wul tu, maa yisǝŋ hŋ, mǝn wopm, tuvcinǝ dǝllǝ pǝris. Dur yo tu yi nǝ dlyaaɗkǝn, kon ngǝtn kushi won a dulgam murghǝ guŋndu zarsǝwa hŋ.'' ⁶ Ɗaŋ Bulus ta yel tu kunɓe mǝn balghammes nǝ Sadukiyawa, te kumɓe gon nǝ Farisawa. a ta wul tlya tlya tu, ɗa giɓ balghami.. ''Mǝn wopm, mi nǝ Bafarise, ŋaa ghǝ Farisawa. Nǝ duryo tu myaa ŋaas raa nǝ gaaghǝn yir shishighǝn mǝn mǝǝskǝn ǝŋ kyaa dǝǝlǝm viimǝn. ⁷ Ɗaŋ a ta kon gin, sǝrɗkǝn yer ta ndai a dlei Farisawa tǝ Sadukiyawa, she jwaamngǝnes ta ɓǝǝli dǝni mbǝtlǝm. ⁸ Dur tu, sadukiyawa tǝ wul tu, ''Shinshighǝn mǝn mǝǝskǝn ɗa hŋ, Zhipti shinngǝn Cogn ɗa hŋ, Zhiptivar ɗa hŋ, beɗ gi Farisawa tǝ wultu ngǝrshi gya gin ɓuruk ciiɗa. ⁹ Nǝ gii sǝrɗkǝn yer ta shishi nǝ ŋaa nyii hŋ, mǝn dlyaaɗ kǝ Farisawa tǝ gyaa gon tǝ ta shishi tǝ sǝrɗyer tu, '' mǝǝ tu maalghǝn won a muri hŋ. Ko nǝ Zhipti shinngǝn Cogn a tǝ Zhipti var ghǝn tǝ wul vii tǝ yaania?'' ¹⁰ Ɗaŋ dǝǝl sǝrɗkǝn yer ta shishi, munvar mǝn manndǝ vǝrtǝ ta ngaɓ ti tu kaɗ tǝ dlaatǝ Bulushi hŋ, a ta caa mǝn manndǝi tǝ ngaɓtiivɗi tǝ ɗi a giɓ mǝn balgham, tǝ ndaarti ɗi giɓdǝn. ¹¹ Ɗa kaviɗ kǝ dzaŋes Daadǝn ta dlǝǝr mel ɓastǝ wul tu ''wum vǝrtǝ hŋ, ɗaŋ ya ɗaŋ kǝ tlyam zha mǝn Urshelima.. a naa ciɓ a tlyam zha mǝn Roma ɗa'' ¹² Ɗaŋ lǝǝɓ ta tlaai Yahudawa gya gon tǝ ta kaŋ viwasǝŋǝi tǝ mbi laŋngǝneshi a gama wasǝŋ tu, taa ci ko taa tlyaa ngǝtn won hŋ, hal she caa ɗuu Bulushi. ¹³ Mǝnyo ɗaŋ tǝ ta kaŋ vii gin tǝ ta moɓ tashi wuɓsǝ. ¹⁴ Tǝ ta tlii a fǝllǝ pǝris tǝ munvaraŋsǝ tǝ wul tu, ''maa gamawopm a laŋngǝn tu mǝǝ ci ko mǝǝ tlyaa ngǝtn won hŋ, hal she myaa ɗu Bulushi. ¹⁵ Ɗaŋngǝnnin, nǝ gi gaan balgham tǝ wul mǝnvar mǝn mannɗǝ tǝ vǝr dǝǝl tǝ lǝǝr tǝ ɗi ɓaski, ɗaŋ tu ɓa wo nger viishitaŋ taŋ'' ¹⁶ Beɗ tǝ gi kuni waatsǝ Bulus ta wummi ɗaŋ cigha muɗkǝn she a ta tlǝn ndai ɗa dǝnes fuu Bulus. ¹⁷ Bulus ta cim mǝnvar mǝn manndǝ gonɗi wul tu, ''mbi tlǝɓǝrǝn a tlǝǝr tǝ a munvar mǝn manndǝ duryo tu ci tǝ ngǝtn won ɗaŋ wo fuu tǝ.'' ¹⁸ Nǝ gi murghǝ manndǝ ta mbi ŋaa tlǝɓǝres tlǝǝrtǝ a munvar mǝn manndes wul tu, ''Bulus ɗaŋ ci jarum i a cim mǝ wulǝm tu mǝ lǝǝrghǝ ŋaaghǝ tlǝɓǝrǝn mǝnɗi. ci tǝvngǝtn won ɗaŋ wo fuughǝ'' ¹⁹ Munvar mǝn manndes ta ngaɓtǝ jalari lǝǝɓ waaɗi ceɗ tǝ tu, nighǝn kyaa suu a konne?'' ²⁰ Ŋaa ghǝ tlǝɓǝres wul tu, ''Yahudawa taa kaɓi tǝ karaghǝn a lǝǝrshi Bulus mǝn balgham jaan ɗaŋ tu ta paŋ nǝ ves na jom jomni. ²¹ Beɗ tǝ gi sǝǝshi kǝǝm hŋ, durghǝ tu zardǝ tǝ ta moɓ tashi wuɓsǝ ɗaŋ cigha ɓuɓkǝnwos, taa mbi laŋngǝnni a gamawasǝŋ tǝ ci ko tǝ tlyaa ngǝtn won hŋ, hal she caa ɗuuti, ko ɗaŋngǝnni maa taa mbǝǝrshi washi cigha ɓuɓkǝn a vǝr shi dǝǝl.'' ²² Nǝ gii munvar mǝn manndes a ta gaa ŋaa tlǝɓǝres tǝ tlii ɗa kaari ɗaŋ a ta caa tǝ yir, ''ɓak fuu gon tu kaa fuum ngǝrshi gyaa gin hŋ.'' ²³ She a ta cim mǝnvarasǝŋ mǝn manndi mbǝtlǝm wul tu, mbǝrǝn mǝn manndǝ kuri mbǝtlǝm, mǝn mbighǝn gwaar kuri mbǝtlǝm tǝ tlii Kaisariya a dwaam mayi kǝ kaviɗ'' ²⁴ A ta ndǝr caashi tǝ ŋaal tluŋsǝ gyo ɗaŋ Bulus wo taghai tǝ tlǝǝrti byatl byatl a Filikus goɓna. ²⁵ She a ta dlaaɗ shinngǝn ɗaŋ gin ²⁶ ''Myaa wuru Kuludiyas Lisiyes tǝ murghǝ vartǝ goɓna Filikus. ²⁷ Yahudawa tǝ ngaɓ muri gin caa suu tǝ ɗuuti, mǝ nɗashi mǝnɗi tǝ mǝn manndǝ mǝǝ vuumtii, ɗaŋ mǝ ta yisǝŋǝi tu cinǝ mǝn Roma. ²⁸ Mǝ ta suu mǝ yisǝŋ ɗek yo ɗaŋ tǝ caa tǝ vii, sshe mǝ ta lǝǝrtii ɗashi balgham. ²⁹ Mǝ yisǝŋǝi tu tǝ caa tǝ ni vii tǝ ceɗkǝnni a dulgam mborki wasǝŋ, beɗ tǝ gi nǝ caaghǝn viiwon ɗaŋ aa kǝǝm tǝ ɗuutii ko naɗti hŋ. ³⁰ Ɗaŋ tǝ ta wuum tu cigha ɓumtsǝghǝn kuskǝ raa a dulgam mures, she swaaɗ mǝ shinndartǝ ɓaskǝ, mǝ ndǝr mǝ caa mǝn caaghǝnwos vii tǝ tlǝǝr vii wasǝŋ abken wa. Mǝ ngaale gham . ³¹ Nǝ gii mǝn manndes tǝ ta laaɓ vii yo ɗaŋ tǝ ta caa shi ɗa: Tǝ ta mbi Bulus tǝ tlǝrtii lǝɓ Antibatris tǝ kaviɗ. ³² Ɗaŋ lǝɓ ta tlaai, mǝn pǝrshi tǝ ta tlǝǝrtii she ɓanci mǝm manndes tǝ ta sushiɗi dadǝǝl. ³³ Ɗaŋ mǝn pǝrshes tǝ ta tulli Kaisariya, tǝ ta vǝr shinngǝn dlyaaɗkǝn goɓna tǝ ndǝr tǝ vǝr tǝ Bulus ghai. ³⁴ Ɗaŋ goɓna ta kwaan shinngǝn dlyaaɗkǝnes, she a ta ceɗ tu Bulus mbwaaɗi te yatli gyo. Ɗaŋ a ta yisǝŋ tu a mbwaa ɗi te kilikiya, ³⁵ a ta wul tu, ''Ma sǝǝghǝ kǝǝm nyaŋ nyaŋ ǝŋ mǝn caaghǝn wa caa tuliɗi.'' she a ta caa tǝ yetltii a balgham guŋndu Hiridus.