¹ Zarsǝ gya gon tǝ ta dlanɗi Yahudiya tə man Antakiya tǝ man giɗ gya gon ŋaa na tu, ''ka tu raai nǝ kǝ ndok ndoki hŋ, ǝŋ yan ta sǝǝri ki a kon a duul Musa hŋ.'' ² Ɗaŋ gya Bulus tǝ Barnabas tǝ ndashi sǝrɗkǝn yer, she gya ŋaa naa tǝ ta ngyer vi gya Bulus tǝ Barnabas tǝ gya gon tǝ tlii Urshelima a lǝɓ shinngǝn tǝ mǝnvaraŋsǝ yatl nǝ dul gaam vii gin. ³ Tǝ gi ɗaŋ nǝ vinladi shinshi washi, she tǝ ta nyol te Finikiya tǝ te Samariya tǝ kon kaɓkǝn vik wusni mǝn dǝgn mǝn. Tǝ ta lǝǝr dǝllǝ polghǝn ɗi a lǝɓ gya ŋaa naa. ⁴ Ɗaŋ tǝ ta tuli ɗi Urshelima, mǝn laaɓkǝn tǝ mǝn shinngǝn tǝ mǝn varaŋsǝ kon kaɓ ngǝtn yo ɗaŋ Cogn fi tǝ yaŋshi. ⁵ Beɗ tǝ gi, zarsǝ gya go ɗaŋ tǝ ta caa raa ɗaŋ cigha giɓ Farisawa, tǝ ta shishi tǝ wul tu, yi ciɓ tǝ sǝǝrǝ shi wasǝŋǝi tǝ ndǝr tǝ laaɓ mborki Musa.'' ⁶ She mǝn shinngǝn tǝ mǝn varaŋsǝ tǝ ta jwaamshi dur yo tu tǝ paŋ ngǝtn wan ves. ⁷ A kaar sǝrɗkǝn yer monnda, Biturus ta shishi wul shu tu, ''mǝn wopm kaa yisǝŋ ŋaa dǝǝl gin ɗaŋ a laatsǝ, Cogn ta fi bwaaghǝn giɓi waan, tu te ven mǝn dǝgn ta tu wumghǝn vik wusni tǝ ndǝr tǝ caa raa. ⁸ Cogn, murghǝ yisǝŋngǝn raa, a tlyashi zha mǝn, ndǝrvǝr shi Zhiptivar ɗaŋ gi ɗaŋ a fimi mǝni; ⁹ a warmi ɓashi hŋ, a te caaghǝn raa a coɓshi raa mǝni kaɗ kaɗ. ¹⁰ Tǝ cik, nii caa kya ɗiiɓ Cogn, kiyi caa mǝri dǝn mǝn shinngǝn a yer yer gya gyo ɗaŋ ɗaŋ jiɗ wom tǝ myaani beɗ maaɗyaa mǝ mbi hŋaa? ¹¹ Beɗ tǝ gi maa caa raai tu ma tu kaɓkǝ ni, a te lǝɓ gyal ghǝ Daadǝn Yesu, ɗaŋ gwasǝŋǝi ɗaŋ cii. ¹² Ɓuruk jwaamngǝn zarshes tǝ ta mwali kyalak tǝ sǝǝkǝǝm gya Bulus tǝ Barnabas ɗaŋ caa kwaan ngǝtn giɗkǝn tǝ ngǝtn kwasrghǝn yo ɗaŋ Cogn a fi mǝn ɗǝgn mǝn te ɓashi. ¹³ Ɗaŋ tǝ taɓan vii wulghǝnni, Yakuɓ ta suɗa wul tu, ''mǝn wopm,sǝǝ mǝn kǝǝm. ¹⁴ Siman aa kon yo ɗaŋ Cogn ta ngaɓ giɗ kǝn gyaa mǝn ɗǝgn duryo tu tǝ mbii zarsǝi a giɓ wasǝŋ nǝ durghǝ sǝǝm wos. ¹⁵ Vii mǝn shinngǝn Cogn a kaɓ ginni ɗaŋ gyo ɗaŋ nǝ dlyaaɗkǝnni, ¹⁶ A kaar ngǝrshi gya gin ma sumɗi ma nal dǝn Dauda mǝn ɗa, gyo ɗaŋ a ndaaɗi yatl, mǝ man nal karguɓte shi ɗa mǝ dlǝlartii. ¹⁷ Duryo tu ɓanci zarsǝ tǝ ŋal Daadǝn, hal tǝ mǝn ɗǝgn ɗeɓaɗ ɗaŋ caa cimshi tǝ sǝmǝn. ¹⁸ Ngǝrshi ǝŋ Daadǝn kon gyo ɗaŋ aa fi ngǝrshi gya gin ɗaŋ zarsǝ tǝ yisǝŋ ɓanɗǝŋ. ¹⁹ Durghǝ gii, a yelghǝnnatn, ɓak mǝ matsǝ mǝn ɗǝgn gya gii mǝn ɗaŋ tǝ sushi ɗi a Cogn hŋ. ²⁰ Beɗ tǝ gii maa dyaaɗ shi mǝn tu dyaaɗǝn nǝ malarghǝn gamawasǝŋ tǝ waar, tǝ mbǝllǝ, tǝ gǝmmbǝli tǝ voraŋ. ²¹ Ɓanɗǝŋ caa giɗ mborki Musa ko yatli gyo a viin ladi Yahudawa ko dzaŋ wolngi gyo.'' ²² A ta ndara mǝn shinngǝnnes mǝn tǝ mǝn varaŋsǝ, tǝ ɓuruk mǝn viin lades, tǝ bwaa Yahuza ɗaŋ caa cim tǝ tu Barsabas, tǝ Sila, gyaa gyo ɗaŋ tǝ ta yi nǝ mǝn varaŋsǝ viin lades, tǝ shin shi Antakiya tǝ Bulus tǝ Barnabas. ²³ Tǝ ta dlyaaɗ gini, ''Gin yi gha mǝn shinngǝn tǝ mǝn varaŋsǝŋ, gyaa ŋaa naa waar, tlǝghǝn a mǝn ɗǝgn, gyaa ŋaa naa ɗaŋ ci Antakiya, tǝ Suriya tǝ Kilikiya, myan wurǝ ki monnda. ²⁴ Mǝ wum tu zarsǝ gyaa gon a giɓ wopm ɗaŋ maa gashi ɗa hŋ, taa nywaali a giɓ wopm ta giɗ ki a ngǝtn won ɗaŋ a mbii ki raa mǝni. ²⁵ Gin yi cik, ɗaŋ ɓuruk wopm mǝ kaɓi mǝ bwaa zarsǝ mǝ shinndarshi ɓaski Bulus tǝ Barnabas, ²⁶ Zarsǝ yo ɗaŋ tǝ vǝr raa wasǝŋi nǝ durghǝ sǝmngǝ Daadǝn Yesu Ɓorghǝn kǝ Cogn, ²⁷ Durghǝ gii mya shin Yahuzatǝ Sila gya gyo ɗaŋ ta fuuki daɓak ngǝrshi gya gin yaŋshi ngǝtn wasǝŋ tǝ vii wasǝŋ. ²⁸ Nǝ durghǝ gi anda Zhipti var tǝ myaani, ɓak mǝ caa ki laɓkǝ hŋ hal tǝ moɓ ngǝrshi gya gin hŋ. ²⁹ Tu gaan fighǝn ngǝtn vaaghǝn nyaarghǝn waar mǝni, tǝ voraŋ, tǝ gǝmmbǝli, tǝ mbǝllǝ. ǝŋ kyaa ɓǝǝlki tǝ fighǝn ngǝrshi gyaa gin ka tsǝtn byatl byatl. mǝ ngaale gham. ³⁰ Ɗaŋ tǝ ta gaashi tǝ tlii, she tǝ ta tlii Antakiya. Ɗaŋ tǝ ta jwaam zarsǝ she tǝ ta vǝrshi tagardes. ³¹ Ɗaŋ tǝ ta kwaantii, she tǝ ta fi polghǝn nyaŋ nyaŋ nǝ durghə tlyaa ghǝn moɗ. ³² Yahuza tǝ Sila, ɗaŋ cinǝ mǝn shinngǝn Cogn saɗɗa, tǝ ta tlyaa moɗ gyaa ŋaa naa tǝ ngǝtnsǝ monnda. ³³ Ɗaŋ tǝ ta ngaa mbuɗkǝni ɗa ɗan she tǝ ta gaa shi tǝ tlii tǝ raa wusni a gyaa ŋaa naa ɗaŋ tǝ shinshi ɗi. ³⁴ Beɗ gi a ta pol Sila ghai tǝ tsǝtn ɗa ɗan. ³⁵ Beɗ tǝ gi Bulus tǝ Barnabas tǝ ɓanci gya ŋaa naa tǝ ta tsǝtnni Antakiya caa giɗ ciyi kon vii Daadǝn ³⁶ A kaar mbuɗkǝn jwaan, Bulus ta wil Barnabas tu, ''ɗaŋni mǝ sumi mǝ tlǝ nǝ yelghǝn ɓuruk gya ɗaŋ maa kon ɗaŋ ci ko te ɗo yatli gyo ɗaŋ maa kon shi vii wusni kǝ Daadǝn mǝn, mǝ yelshi ɗaŋ ci. ³⁷ Barnabas tavyaavsuu tǝ tlǝ gya Yohanna gi ɗaŋ caa cimtǝ tu Markushi. ³⁸ Beɗ tǝ gi Bulus ta ɓitaltǝ tu, a ndara mǝ tlǝǝr Markus hŋ, ɗaŋ ata gashi washi Bamfiliya man laaɓ shivɗa nǝ laaichŋǝi. ³⁹ Sǝrɗkǝn yer ta shishi, tǝ ta ɓǝǝli tǝ dlǝŋsǝ wasǝŋ, Barnabas ta mbi Markushi tǝ ta tlii Kubrus. ⁴⁰ Ɗa kaari ɗaŋ gyaa ŋaa na tǝ ta kara gyal ghǝ Daadǝn tǝ yaal ɗashi, Bulus ta bwaa Sila tǝ ta tlii. ⁴¹ Bulus ta tlii Suriya tǝ Kilikiya, ngelaŋ vin ladi vin ladi ǝnnda yi tyaa shi moɗ.