1 ບໍ່ດົນຫລັງຈາກນັ້ນ ພຣະເຢຊູເຈົ້າກໍເລີ່ມເດີນທາງໄປຕາມເມືອງແລະໜູ່ບ້ານຕ່າງໆ, ເພື່ອເທດສະນາ ແລະ ປະກາດຂ່າວດີເລື່ອງຣາຊະອານາຈັກຂອງພຣະເຈົ້າ ແລະສາວົກສິບສອງຄົນນັ້ນກໍຢູ່ກັບພຣະອົງ. 2 ພ້ອມກັບແມ່ຍິງບາງຄົນທີ່ຊົງໂຜດໃຫ້ພົ້ນຈາກຜີມານຮ້າຍ ແລະພະຍາດຕ່າງໆ ຄືມາຣີອາຜູ້ມີຊື່ອີກວ່າມັກດາລາ ຜູ້ທີ່ພຣະອົງຊົງຂັບໄລ່ຜີເຈັດໂຕອອກ; 3 ໂຢຮັນນາພັນຣະຍາ ຂອງຈູຊາ ຜູ້ເປັນກົມມະວັງຂອງເຮໂຣດ, ຊູຊັນນາ; ແລະຍິງຄົນອື່ນໆອີກຫລາຍຄົນເປັນຜູ້ໄດ້ຈັດຕຽມສິ່ງຂອງໃຫ້ພວກເຂົາ ດ້ວຍຊັບສິນຂອງພວກນາງ. 4 ຂະນະທີ່ປະຊາຊົນຈຳນວນຫລວງຫລາຍກໍາລັງກັນຢູ່, ແລະຜູ້ຄົນຈາກເມືອງຕ່າງໆ ກໍາລັງເດີນທາງມາຫາພຣະອົງ, ພຣະອົງຈິ່ງຊົງກ່າວກັບເຂົາເປັນຄຳອຸປະມາວ່າ, 5 “ມີຊາວນາຄົນໜຶ່ງອອກໄປຫວ່ານເມັດພືໍດຂອງຕົນ, ເມື່ອກຳລັງຫວ່ານຢູ່ນັ້ນ ບາງເມັດກໍຕົກຕາມທາງກໍຖືກຢຽບຢ່ຳ ແລະນົກກໍມາກິນເສຍ. 6 ບາງເມັດກໍຕົກໃສ່ບ່ອນມີຫີນ ແລະເມື່ອງອກຂຶ້ນແລ້ວກໍຫ່ຽວແຫ້ງລົງເພາະຂາດຄວາມຊຸ່ມຊື່ນ. 7 ບາງເມັດກໍຕົກກາງພຸ່ມຫນາມ ແລະຫນາມກໍປົ່ງຂຶ້ນມາພ້ອມກັບເມັດເຂົ້ານັ້ນ ແລະປົກຫຸ້ມມັນເສັຍ. 8 ແຕ່ມີບາງເມັດກໍຕົກໃສ່ດິນດີຈິ່ງງອກຂຶ້ນເກີດຜົນໄດ້ຮ້ອຍຕໍ່” ຫລັງຈາກທີ່ພຣະເຢຊູເຈົ້າຊົງກ່າວດັ່ງນີ້ແລ້ວ ພຣະອົງຈິ່ງຊົງຮ້ອງຂຶ້ນວ່າ, “ຜູ້ໃດມີຫູທີ່ໄດ້ຍິນ ຈົ່ງຟັງເຖີດ.” 9 ຫລັງຈາກນັ້ນ ພວກສາວົກຂອງພຣະອົງຈິ່ງທູນຖາມພຣະອົງເຖິງຄວາມຫມາຍຂອງຄຳອຸປະມານີ້. 10 ພຣະເຢຊູເຈົ້າຊົງກ່າວກັບພວກເຂົາວ່າ, “ທ່ານທັງຫລາຍໄດ້ຮັບສິດພິເສດທີ່ຈະເຂົ້າໃຈຂໍ້ຄວາມລັບເລິກແຫ່ງຣາຊະອານາຈັກຂອງພຣະເຈົ້າ ແຕ່ສຳລັບຄົນອື່ນເປັນພຽງແຕ່ຄຳສອນດ້ວຍຄຳອຸປະມາເທົ່ານັ້ນ ພວກເຂົາເບິ່ງແຕ່ຈະບໍ່ເຫັນ, ແລະເມື່ອເຂົາຟັງຈະບໍ່ເຂົ້າໃຈ." 11 ບັດນີ້ ຄວາມຫມາຍຂອງຄຳອຸປະມາເມັດພືດນັ້ນໄດ້ແກ່ ພຣະທັມຂອງພຣະເຈົ້າ. 12 ເມັດທີ່ຕົກຕາມທາງໄດ້ແກ່ພວກຄົນທີ່ໄດ້ຍິນພຣະຄັມນັ້ນ ແຕ່ມານຮ້າຍມາແລະຍາດເອົາພຣະທັມໄປຈາກໃຈຂອງພວກເຂົາ, ເພື່ອບໍ່ໃຫ້ເຊື່ອແລະບໍ່ໄດ້ຄວາມລອດພົ້ນ. 13 ເມັດທີ່ຕົກໃສ່ບ່ອນມີຫີນໄດ້ແກ່ຜູ້ຄົນທີ່ ເມື່ອໄດ້ຍິນແລ້ວກໍຮັບພຣະທັມນັ້ນດ້ວຍຄວາມຍິນດີແຕ່ບໍ່ມີຮາກ; ພວກເຂົາເຊື່ອຢູ່ແຕ່ຊົ່ວຄາວເມື່ອຖືກທົດລອງເຂົາກໍເລີກໄປ. 14 ເມັດທີ່ຕົກທ່າມກາງພຸ່ມຫນາມນັ້ນໄດ້ແກ່ພວກຄົນທີ່ໄດ້ຍິນແລ້ວ ແຕ່ຍັງດຳເນີນຊີວິດໃນທາງຂອງຕົນເອງ, ພວກເຂົາຖືກປົກຄຸມດ້ວຍຄວາມກັງວົນ, ຄວາມຮັ່ງມີແລະ ຄວາມສະຫນຸກຂອງຊີວິດນີ້ ດັ່ງນັ້ນ ພວກເຂົາຈິ່ງບໍ່ເກີດຜົນຢ່າງທີ່ພວກເຂົາຈະເປັນ. 15 ແຕ່ເມັດທີ່ຕົກໃສ່ດິນດີນັ້ນໄດ້ແກ່ຜູ້ທີ່ໄດ້ຍິນພຣະທັມດ້ວຍໃຈທີ່ຊື່ສັດແລະດີ ແລ້ວກໍຢຶດໄວ້ຢ່າງຫມັ້ນຄົງ ແລະ ເກີດຜົນດ້ວຍຄວາມພາກພຽນ.” 16 ບໍ່ມີຜູ້ໃດ ເມື່ອໄຕ້ຕະກຽງແລ້ວຈະເອົາກະບຸງປົກບັງໄວ້ ຫລື ວາງໄວ້ໄຕ້ຕຽງນອນ. ແຕ່ເຂົາຈະຕັ້ງໄວ້ເທິງເຊີງທຽນ ເພື່ອທຸກຄົນທີ່ເຂົ້າມາຈະໄດ້ເຫັນແສງສະຫວ່າງ. 17 ເພາະບໍ່ມີສິ່ງໃດທີ່ເຊື່ອງໄວ້ ຈະບໍ່ປະກົດໃຫ້ເຫັນ ຫລື ສິ່ງໃດທີ່ປົກບັງໄວ້ເປັນຄວາມລັບ ຈະບໍ່ຖືກຮັບຮູ້ ແລະ ຖືກເປີດເຜີຍໃນທີ່ແຈ້ງ. 18 ດັ່ງນັ້ນ ຈົ່ງຟັງໃຫ້ດີຣະວັງໃຫ້ດີ ດ້ວຍວ່າຜູ້ໃດມີຢູ່ແລ້ວຈະຊົງເພີ່ມເຕີມໃຫ້ແກ່ຜູ້ນັ້ນອີກ ແຕ່ຜູ້ໃດທີ່ບໍ່ມີ ເຖິງແມ່ນວ່າສິ່ງທີ່ເຂົາຄິດວ່າມີຢູ່ນັ້ນ ກໍຈະຊົງຖືກຍົກເອົາໄປຈາກຜູ້ນັ້ນເສຍ” 19 ຫລັງຈາກນັ້ນແມ່ແລະພວກນ້ອງຊາຍຂອງພຣະເຢຊູເຈົ້າໄດ້ມາຫາພຣະອົງ ແຕ່ພວກເຂົາບໍ່ສາມາດເຂົ້າໃກ້ພຣະອົງໄດ້ເພາະຄົນຫລາຍ. 20 ມີຄົນໄປບອກພຣະເຢຊູເຈົ້າວ່າ, “ແມ່ແລະພວກນ້ອງຊາຍຂອງທ່ານຢືນຢູ່ຂ້າງນອກ ຢາກພົບພຣະອົງ.” 21 ແຕ່ພຣະເຢຊູເຈົ້າຕອບພວກເຂົາວ່າ, “ແມ່ແລະນ້ອງຂອງເຮົາຄືຄົນທີ່ໄດ້ຍິນພຣະທັມຂອງພຣະເຈົ້າແລະເຮັດຕາມ. 22 ວັນຫນຶ່ງ ພຣະເຢຊູເຈົ້າແລະສາວົກຂອງພຣະອົງໄດ້ສະເດັດລົງເຮືອໄປ ພຣະອົງໄດ້ກ່າວກັບເຂົາວ່າ, “ໃຫ້ພວກເຮົາພາກັນຂ້ວາມໄປຟາກຫນຶ່ງຂອງທະເລສາບເທາະ” ແລ້ວເຂົາກໍຖອຍເຮືອອອກໄປ. 23 ແຕ່ໃນຂະນະທີ່ພວກເຂົາກຳລັງລ່ອງເຮືອຢູ່ ພຣະເຢຊູເຈົ້າກໍນອນຫລັບໄປ. ລົມພະຍຸໄດ້ພັດມາລົງກາງທະເລຢ່າງຮຸນແຮງ ແລະນ້ຳກໍເລີ່ມເຂົ້າເຮືອ ແລະພວກເຂົາກໍຕົກຢູ່ໃນອັນຕະຣາຍ. 24 ຈາກນັ້ນ ພວກສາວົກຈຶ່ງເຂົ້າໄປຫາພຣະອົງ ແລະປຸກພຣະອົງໃຫ້ຕື່ນຂື້ນ ແລະເວົ້າວ່າ, “ທ່ານອາຈານ, ທ່ານອາຈານເຈົ້າເອີຍ, ພວກຂ້ານ້ອຍກຳລັງຈະຕາຍຢູ່ແລ້ວ” ພຣະອົງຈຶ່ງຊົງຕື່ນຂຶ້ນຫ້າມລົມແລະຟອງນ້ຳ, ລົມແລະຟອງນ້ຳກໍຢຸດສະຫງົບງຽບລົງ. 25 ພຣະອົງຊົງກ່າວກັບເຂົາວ່າ, “ຄວາມເຊື່ອຂອງພວກທ່ານຢູ່ໃສ?” ພວກເຂົາກໍຍັງຢ້ານຢຸ່ແລະປະຫລາດໃຈຈຶ່ງເວົ້າກັນວ່າ, “ທ່ານຜູ້ນີ້ແມ່ນໃຜ ທີ່ສັ່ງໄດ້ລົມແລະນ້ຳ, ແລ້ວພວກມັນກໍຍອມຟັງເພິ່ນ?” 26 ແລ້ວ ພວກເພິ່ນໄດ້ຂີ່ເຮືອມາຈອດທີ່ເຂດແດນຂອງຊາວເຄຣາເຊນ ຊຶ່ງຢູ່ກົງກັນຂ້າມກັບແຂວງຄາລີເລ. 27 ເມື່ອພຣະເຢຊູເຈົ້າສະເດັດຂຶ້ນບົກແລ້ວ, ມີຊາຍຄົນຫນຶ່ງຈາກໃນເມືອງນັ້ນມາພົບພຣະອົງ ຊາຍຜູ້ນີ້ມີຜີມານຮ້າຍຫລາຍໂຕສິງຢູ່ ລາວບໍ່ໄດ້ນຸ່ງເຄື່ອງເປັນເວລານານແລ້ວ ແລະລາວບໍ່ໄດ້ອາໄສຢູ່ໃນເຮືອນ ແຕ່ຢູ່ຕາມອຸບໂມງຝັງສົບ. 28 ເມື່ອລາວໄດ້ເຫັນພຣະເຢຊູເຈົ້າ, ລາວກໍຮ້ອງຂຶ້ນ ແລະຂາບລົງຕໍ່ຫນ້າພຣະອົງ ແລະກ່າວດ້ວຍສຽງດັງວ່າ. “ພຣະອົງຈະເຮັດຫຍັງໃຫ້ຂ້ານ້ອຍ, ເຢຊູບຸດຂອງພຣະເຈົ້າຜູ້ສູງສຸດເອີຍ? ພຣະອົງເຈົ້າເອີຍ ຂໍຢ່າໄດ້ທໍຣະມານຂ້ານ້ອຍຖ້ອນ” 29 ແລ້ວພຣະເຢຊູເຈົ້າຈຶ່ງໄດ້ຊົງສັ່ງຜີຮ້າຍບໍ່ສະອາດໃຫ້ອອກຈາກຊາຍຄົນນັ້ນ. ເພາະຫລາຍຄັ້ງແລ້ວທີ່ມັນໄດ້ຄອບຫງໍາລາວ ແມ່ນວ່າຈະຖືກລ່າມໂສ້ແລະຂັງໄວ້ ພ້ອມທັງເຝົ້າເບິ່ງຕະຫລອດເວລາ, ລາວກໍຍັງສາມາດທໍາລາຍໂຊ້ມັດນັ້ນໄດ້ ແລະຖີກຜີມານຮ້າຍບັງຄັບລາວໃຫ້ເຂົ້າໄປໃນປ່າເສຍ. 30 ຝ່າຍພຣະເຢຊູເຈົ້າຈຶ່ງຖາມຜີນັ້ນວ່າ, “ມຶງຊື່ຫຍັງ?” ຜີນັ້ນຕອບວ່າ, “ຊື່ກອງທັບ” ດ້ວຍວ່າຜີທີ່ເຂົ້າສິງລາວຢູ່ນັ້ນມີຫລາຍໂຕ. 31 ແລະພວກມັນໄດ້ອ້ອນວອນຂໍພຣະເຢຊູເຈົ້າບໍ່ໃຫ້ສັ່ງມັນໄປສູ່ເຫວເລິກ. 32 ຂະນະນັ້ນ ມີຫມູຝູງໃຫຍ່ກຳລັງຫາກິນຢູ່ຕາມເນີນພູ ຜີເຫລົ່ານັ້ນຈຶ່ງໄດ້ທູນຂໍພຣະອົງຊົງອະນຸຍາດໃຫ້ພວກມັນເຂົ້າສິງຢູ່ໃນຫມູຝູງນັ້ນ ພຣະອົງກໍຊົງອະນຸຍາດໃຫ້. 33 ດັ່ງນັ້ນພວກມັນຈຶ່ງໄດ້ອອກຈາກຊາຍຄົນນັ້ນແລ້ວເຂົ້າໄປສິງຢູ່ໃນຝູງຫມູ, ແລະ ທັງຫມົດກໍແລ່ນລົງຕາຫລິ່ງຊັນ ໂຕນໃສ່ທະເລສາບ ແລະ ຈົມນ້ຳຕາຍ. 34 ເມື່ອຄົນລ້ຽງຫມູໄດ້ເຫັນເຫດການທີ່ເກີດຂຶ້ນນັ້ນ ພວກເຂົາແລ່ນອອກໄປ ແລະເລົ່າເລື່ອງນັ້ນ ທັງໃນເມືອງແລະນອກເມືອງ. 35 ແລ້ວຄົນທັງປວງກໍອອກມາເບິ່ງເຫດການທີ່ເກີດຂຶ້ນນັ້ນ ແລະມາຫາພຣະເຢຊູເຈົ້າ ພວກເຂົາໄດ້ເຫັນຊາຍຄົນທີ່ຜີຮ້າຍອອກຈາກຕົວນຸ່ງຫົ່ມເສື້ອຜ້າ ແລະ ມີສະຕິ ນັ່ງຢູ່ໃກ້ພຣະບາດພຣະເຢຊູເຈົ້າພວກເຂົາຈຶ່ງມີໃຈຢ້ານ. 36 ຈາກນັ້ນ ຜູ້ທີ່ເຫັນເຫດການນັ້ນ ກໍພາກັນເລົ່າເຖິງເຫດການຄົນທີ່ຜີມານຮ້າຍເຂົ້າສິງນັ້ນໄດ້ໂຜດໃຫ້ດີປົກກະຕິຢ່າງໃດ. 37 ຜູ້ຄົນທີ່ຢູ່ໃນເມືອງເຄຣາເຊນກັບປະຊາຊົນທັງປວງໃນທົ່ວຮອບເຂດນັ້ນໄດ້ຂໍຮ້ອງໃຫ້ພຣະອົງຫນີໄປຈາກເຂົາເສັຍ ເພາະຄວາມຢ້ານອັນໃຫຍ່ໄດ້ຕົກໃສ່ເຂົາ ພຣະອົງຈິ່ງສະເດັດລົງເຮືອກັບຄືນໄປ. 38 ຊາຍທີ່ມີຜີມານຮ້າຍອອກຈາກຕົວນັ້ນໄດ້ຂໍຮ້ອງພຣະເຢຊູເຈົ້າອະນຸຍາດໃຫ້ເຂົາຕິດຕາມພຣະອົງໄປດ້ວຍ ແຕ່ພຣະເຢຊູເຈົ້າບອກໃຫ້ລາວກັບຄືນໄປໂດຍຊົງສັ່ງວ່າ. 39 “ຈົ່ງກັບໄປບ້ານເຮືອນຂອງເຈົ້າ ແລະເລົ່າສິ່ງດີທຸກຢ່າງທີ່ພຣະເຈົ້າໄດ້ຊົງກະທຳແກ່ເຈົ້ານັ້ນ” ແລ້ວຊາຍຄົນນັ້ນກໍກັບໄປແລະປະກາດທົ່ວທັງເມື່ອງໃນສິ່ງທີ່ພຣະເຢຊູເຈົ້າໄດ້ຊົງກະທຳແກ່ຕົນ 40 ບັດນີ້ເມື່ອພຣະເຢຊູກັບມາເຖິງ, ປະຊົນຝູງໃຫຍ່ຕ້ອນຮັບພຣະອົງ, ເພາະພວກເຂົາທຸກຄົນເຄົາລົບພຣະອົງ, 41 ຈົ່ງເບິ່ງ, ຊາຍຄົນໜຶ່ງຊື່ວ່າຢາລິໂອເປັນຫົວໜ້າໂຮງທໍາມະສາລາໃນທ້ອງຖິ່ນນັ້ນ, ໄດ້ມາ ແລະຂາບລົງທີ່ຕີນພຣະອົງ ແລະຊົງຂໍຮ້ອງພຣະອົງໃຫ້ໄປທີ່ບ້າຂອງລາວ 42 ເພາະລູກສາວຄົນດຽວຂອງລາວອາຍສິບສອງປີກໍາລັງຈະຕາຍ. ຂະນະທີ່ພຣະເຢຊູເຈົ້າກໍາລັງໄປນັ້ນ ມີປະຊາຊົນບຽດພຣະອົງໄປຢ່າງໜາແໜ້ນ. 43 ໃນນັ້ນມີຍິງຄົນຫນຶ່ງເປັນພະຍາດເລືອດຕົກໄດ້ສິບສອງປີມາແລ້ວ ແລະນາງໄດ້ຈ່າຍຊັບຂອງຕົນໄປກັບການຮັກສາ ແຕ່ບໍ່ມີຫມໍຄົນໃດຮັກສາໃຫ້ດີພະຍາດໄດ້. 44 ນາງໄດ້ຫຍັບເຂົ້າມາເບື້ອງຫລັງພຣະເຢຊູ ແລະບາຍແຄມເຄື່ອງທົງຂອງພຣະອົງ ໃນທັນໃດນັ້ນເລືອດຂອງນາງກໍເຊົາໄຫລ. 45 ພຣະເຢຊູຊົງຖາມວ່າ, “ແມ່ນໃຜໄດ້ບາຍເຮົາ?” ເມື່ອຄົນທັງປວງໄດ້ຕອບປະຕິເສດ ເປໂຕ ໄດ້ທູນວ່າ, “ອາຈານເຈົ້າເອີຍ, ກໍແມ່ນປະຊາຊົນທີ່ກຳລັງກີດຂວາງແລະບຽດທ່ານຢູ່.” 46 ແຕ່ພຣະເຢຊູຊົງຕອບວ່າ, “ມີບາງຄົນໄດ້ບາຍເຮົາ ເພາະເຮົາຮູ້ວ່າຣິດອຳນາດໄດ້ແຜ່ຊ່ານອອກຈາກເຮົາໄປ.” 47 ເມື່ອຍິງນັ້ນເຫັນວ່າຈະເຊື່ອງຕົວຈາກການກະທຳຂອງຕົນເອງບໍ່ໄດ້ແລ້ວ, ນາງກໍເຂົ້າມາດ້ວຍຕົວສັ່ນຂາບລົງຕໍ່ໜ້າພຣະອົງ. ຕໍ່ໜ້າທຸກຄົນໃນທີ່ນັ້ນ ນາງໄດ້ທູນເຖິງເຫດໃດທີ່ຕົນບາຍພຣະອົງ ແລະຕົນໄດ້ດີພະຍາດທັນທີຢ່າງໃດ. 48 ພຣະເຢຊູເຈົ້າກ່າວກັບນາງວ່າ, “ລູກຍິງເອີຍ, ຄວາມເຊື່ອຂອງເຈົ້າໄດ້ເຮັດໃຫ້ເຈົ້າດີແລ້ວ. ຈົ່ງໄປເປັນສຸກເທີ້ນ”. 49 ໃນຂະນະທີ່ພຣະເຢຊູເຈົ້າກ່າວຢູ່ນັ້ນ ມີຄົນຫນຶ່ໍງມາແຕ່ເຮືອນຂອງນາຍໂຮງທັມມະສາລາບອກວ່າ, “ລູກສາວຂອງທ່ານຕາຍແລ້ວ ຂໍຢ່າໄດ້ລົບກວນອາຈານຕໍ່ໄປເລີຍ.” 50 ແຕ່ເມື່ອພຣະເຢຊູເຈົ້າໄດ້ຍິນເຊັ່ນນັ້ນກໍຊົງກ່າວແກ່ເຢລິໂກວ່າ, “ຢ່າຢ້ານເລີຍ ຈົ່ງເຊື່ອເທົ່ານັ້ນ; ແລະລາວກໍຈະຫາຍດີ.” 51 ເມື່ອມາເຖິງເຮືອນແລ້ວ ພຣະອົງບໍ່ໄດ້ຊົງອະນຸຍາດໃຫ້ຜູ້ໃດເຂົ້າໄປນຳ ເວັ້ນແຕ່ເປໂຕ, ໂຢຮັນ, ຢາໂກໂບ, ແລະພໍ່ແມ່ຂອງເດັກນ້ອຍນັ້ນ. 52 ຄົນທັງຫລາຍກໍຕີອົກຮ້ອງໄຫ້ຮ່ຳໄຮເພາະເດັກນ້ອຍນັ້ນ, ແຕ່ພຣະອົງຊົງກ່າວວ່າ, “ຢ່າຮ້ອງໄຫ້ເລີຍ ເດັກນ້ອຍນີ້ຍັງບໍ່ຕາຍ, ພຽງແຕ່ຫລັບຢູ່ເທົ່ານັ້ນ.” 53 ແຕ່ພວກເຂົາພາກັນຫົວຂວັນພຣະອົງ ເພາະເຂົາຮູ້ວ່າເດັກນ້ອຍນັ້ນຕາຍແລ້ວ. 54 ແຕ່ພຣະເຢຊູເຈົ້າຈັບມືເດັກນ້ອຍ ແລ້ວຊົງຮ້ອງອອກມາວ່າ, “ລູກເອີຍ, ຈົ່ງລຸກຂຶ້ນ”. 55 ແລ້ວຈິດວິນຍານຂອງລາວກໍກັບເຂົ້າມາ, ແລະໄດ້ຟື້ນຂຶ້ນທັນທີ. ພຣະອົງຈຶ່ງຊົງສັ່ງໃຫ້ເອົາອາຫານມາໃຫ້ລາວກິນ. 56 ຝ່າຍພໍ່ແມ່ຂອງເດັກນ້ອຍນັ້ນກໍງຶດອັດສະຈັນໃຈຫລາຍ, ແຕ່ພຣະອົງຊົງຫ້າມເຂົາບໍ່ໃຫ້ບອກຜູ້ໃດເຖິງເຫດການຊຶ່ງເປັນມານັ້ນ.