1 ວັນໜຶ່ງພຣະເຢຊູເຈົ້າກຳລັງອະທິຖານຢູ່ສະຖານທີ່ແຫ່ງຫນຶ່ງ ເມື່ອພຣະອົງອະທິຖານຈົບແລ້ວ ສາວົກຄົນຫນຶ່ງກໍເວົ້າກັບພຣະອົງວ່າ, “ພຣະເຈົ້າອົງເຈົ້ານາຍ, ຂໍສອນພວກຂ້ານ້ອຍໃຫ້ອະທິຖານເຫມືອນກັບທີ່ໂຢຮັນໄດ້ສອນພວກລູກສິດຂອງເພິ່ນດວ້ຍ.” 2 ພຣະເຢຊູເຈົ້າກ່າວກັບພວກເພິ່ນວ່າ, “ເມື່ອພວກທ່ານອະທິຖານຈົ່ງກ່າວວ່າ, ‘ຂ້າແດ່ພຣະບິດາເຈົ້າ ຂໍໃຫ້ພຣະນາມຂອງພຣະອົງເປັນທີ່ເຄົາຣົບບູຊາ ຂໍໃຫ້ຣາຊະອານາຈັກຂອງພຣະອົງມາຕັ້ງຢູ່. 3 ຂໍຊົງໂຜດປະທານອາຫານປະຈຳວັນໃຫ້ແກ່ພວກຂ້ານ້ອຍທັງຫລາຍ. 4 ຂໍຊົງໂຜດຍົກໂທດຄວາມຜິດບາບຂອງພວກຂ້ານ້ອຍ ເຫມືອນທີ່ພວກຂ້ານ້ອຍຍົກໂທດແກ່ທຸກຄົນ ທີ່ເຮັດຜິດຕໍ່ພວກຂ້ານ້ອຍນັ້ນ. ຂໍຢ່ານໍາພວກຂ້ານ້ອຍ ເຂົ້າໄປໃນການທົດລອງ’.” 5 ພຣະເຢຊູເຈົ້າກ່າວກັບພວກເຂົາວ່າ, “ຜູ້ໃດໃນພວກເຈົ້າມີມິດສະຫາຍຄົນຫນຶ່ງ ແລະຈະໄປຫາລາວໃນເວລາທ່ຽງຄືນແລ້ວເວົ້າວ່າ ‘ສະຫາຍເອີຍ, ຂໍໃຫ້ຂ້ອຍຢືມເຂົ້າຈີ່ຈັກສາມກ້ອນແດ່. 6 ເພາະໝູ່ຄົນຫນຶ່ງຂອງຂ້ອຍເດີນທາງຈາກບ່ອນອື່ນມາແວ່ຂ້ອຍແລະຂ້ອຍບໍ່ຫຍັງຈະສູ່ລາວກິນ’. 7 ຝ່າຍມິດສະຫາຍທີ່ຢູ່ຂ້າງໃນຈຶ່ງຕອບອອກມາວ່າ, ‘ຢ່າລົບກວນເຮົາເທາະປະຕູກໍອັດແລ້ວ, ພວກລູກຂອງເຮົາກໍນອນຢູ່ກັບເຮົາ, ເຮົາລຸກຂຶ້ນເອົາເຂົ້າຈີ່ໃຫ້ເຈົ້າບໍ່ໄດ້’. 8 ເຮົາບອກເຈົ້າທັງຫລາຍວ່າ ເຖິງແມ່ນວ່າຜູ້ນັ້ນຈະບໍ່ລຸກຂຶ້ນເອົາໃຫ້ເພາະການເປັນໝູ່ກັນກໍຕາມ ແຕ່ຖ້າເພາະເຫັນແກ່ການກ້າຂໍຢ່າງບໍ່ລະອາຍ ເພິ່ນກໍຈະລຸກຂຶ້ນແລະເອົາເຂົ້າຈີ່ໃຫ້ເຈົ້າເທົ່າທີ່ເຈົ້າຕ້ອງການ. 9 ແລະເຮົາບອກພວກເຈົ້າວ່າ ຈົ່ງຫມັ່ນຂໍ ແລ້ວເຈົ້າຈະໄດ້ຮັບ ຈົ່ງຫມັ່ນຊອກແລ້ວເຈົົ້າຈະພົບ ຈົ່ງຫມັ່ນເຄາະແລ້ວຈະໄຂໃຫ້ເຈົ້າ. 10 ດ້ວຍວ່າທຸກຄົນທີ່ຫມັ່ນຂໍກໍໄດ້ຮັບ ຜູ້ໃດທີ່ຫມັ່ນຊອກຫາກໍໄດ້ພົບ ແລະຜູ້ໃດທີ່ຫມັ່ນເຄາະ ມັນຈະເປີດໃຫ້. 11 ມີພໍ່ຄົນໃດໃນພວກເຈົ້າ ຖ້າລູກຂໍປາຈະເອົາງູໃຫ້ລູກແທນປາ? 12 ຫລືເມື່ອລູກຂໍໄຂ່ ຈະເອົາແມງງອດໃຫ້ລູກ? 13 ເຫດສັນນັ້ນຖ້າເຈົ້າທັງຫລາຍ ຜູ້ເປັນຄົນຊົ່ວ ຍັງຮູ້ຈັກເອົາຂອງດີໃຫ້ແກ່ລູກຂອງຕົນ ຫລາຍກວ່ານັ້ນອີກຈັກເທົ່າໃດ ພຣະບິດາເຈົ້າຜູ້ສະຖິດໃນສະຫວັນຈະປະທານພຣະວິນຍານບໍຣິສຸດເຈົ້າໃຫ້ແກ່ຜູ້ທີ່ຂໍຈາກພຣະອົງ?" 14 ຫລັງຈາກນັ້ນ ພຣະເຢຊູເຈົ້າໄດ້ຂັບໄລ່ຜີປາກກືກອອກ. ເມື່ອຜີນັ້ນຖືກຂັບໄລ່ອອກແລ້ວຊາຍທີ່ເປັນຄົນປາກກືກກໍເລີ່ມເວົ້າໄດ້, ປະຊາຊົນກໍປະຫລາດໃຈ. 15 ແຕ່ບາງຄົນໃນຫມູ່ນັ້ນໄດ້ເວົ້າວ່າ, “ຜູ້ນີ້ຂັບໄລ່ຜີອອກໄດ້ໂດຍໃຊ້ອຳນາດຂອງເບເອນເຊບູນຊຶ່ງເປັນນາຍຂອງພວກຜີຮ້າຍ. 16 ສ່ວນຄົນອື່ນກໍໄດ້ທົດລອງພຣະອົງ ແລະຖາມຫາຫມາຍສຳຄັນຈາກຟ້າສະຫວັນ. 17 ແຕ່ພຣະເຢຊູເຈົ້າຮູ້ຄວາມຄຶດຂອງເຂົາ ຈຶ່ງກ່າວຕໍ່ພວກເຂົາວ່າ, “ທຸກອານາຈັກທີ່ຕໍ່ສູ້ກັນເອງກໍຈະຮ້າງເປົ່າ, ຄອບຄົວທີ່ຕໍ່ສຸ້ກັນເອງ ກໍຈະລົ້ມສະລາຍ." 18 ຖ້າຊາຕານຕໍ່ສູ້ກັນເອງ ອານາຈັກຂອງມັນຈະຕັ້ງຫມັ້ນຢູ່ໄດ້ຢ່າງໃດ? ເຈົ້າທັງຫລາຍເວົ້າວ່າເຮົາຂັບໄລ່ຜີປີສາດອອກໂດຍເບເອນເຊບູນ. 19 ຖ້າເຮົາຂັບໄລ່ຜີປີສາດອອກໂດຍເບເອນເຊບູນ, ແລ້ວພວກລູກສິດຂອງເຈົ້າເຄີຍໄລ່ມັນອອກດ້ວຍອຳນາດຂອງຜູ້ໃດ? ດ້ວຍເຫດນີ້ແຫລະ, ພວກເຂົາຈະເປັນຜູ້ພິພາກສາພວກເຈົ້າ. 20 ແຕ່ຖ້າເຮົາຂັບໄລ່ຜີປີສາດອອກດ້ວຍຣິດອຳນາດຂອງພຣະເຈົ້າ, ຣາຊະອານາຈັກຂອງພຣະເຈົ້າກໍມາເຖິງພວກເຈົ້າແລ້ວ. 21 ເມື່ອຊາຍທີ່ແຂງແຮງຖືອາວຸດຄົບຖ້ວນເຝົ້າເຮືອນຂອງຕົນຢູ່ ສິ່ງຂອງທັງຫມົດຂອງລາວກໍປອດໄພ. 22 ແຕ່ເມື່ອຊາຍທີ່ແຂງແຮງກວ່າກໍເອົາຊະນະລາວໄດ້, ຄົນແຂງແຮງກວ່ານັ້ນຈະຍຶດເອົາອາວຸດທີ່ເຈົ້າຂອງເຮືອນໄວ້ໃຈນັ້ນໄປ ແລະແບ່ງປັນຊັບສົມບັດຂອງເຂົາໄປເສັຍ. 23 ຜູ້ໃດບໍ່ຢູ່ຝ່າຍເຮົາ ກໍຕໍ່ສູ້ກັບເຮົາ ແລະຜູ້ໃດບໍ່ໂຮມເຂົ້າກັບເຮົາກໍເປັນຜູ້ເຮັດໃຫ້ແຕກກະຈາຍໄປ. 24 “ເມື່ອຜີບໍ່ສະອາດອອກຈາກຊາຍຄົນຫນຶ່ງໄປ ມັນກໍເດີນທາງຜ່ານໄປໃນບ່ອນກັນດານເພື່ອຊອກຫາບ່ອນເຊົາ, ເມື່ອຫາບໍ່ພົບ ມັນຈິ່ງເວົ້າວ່າ ‘ເຮົາຈະກັບຄືນໄປຍັງເຮືອນຂອງເຮົາທີ່ເຮົາໄດ້ອອກມານັ້ນ. 25 ເມື່ອຜີນັ້ນກັບມາແລ້ວແລະເຫັນວ່າເຮືອນນັ້ນຖືກເຮັດໃຫ້ສະອາດດີແລະຈັກເປັນລະບຽບຮຽບຮ້ອຍແລ້ວ. 26 ຈາກນັ້ນມັນກໍໄປຊັກຊວນວິນຍານອື່ນອີກເຈັດໂຕຮ້າຍກວ່າມັນ ແລະກໍເຂົ້າໄປອາໄສຢູ່ເຮືຶອນຫລັງນັ້ນ ແລະໃນທີ່ສຸດ ຊາຍຄົນນັ້ນກໍຕົກຢູ່ໃນສະພາບຮ້າຍກວ່າຕອນຕົ້ນ.” 27 ໃນຂະນະທີ່ພຣະອົງຊົງກ່າວຖ້ອຍຄຳເຫລົ່ານັ້ນຢູ່ ກໍມີຍິງສາວຄົນຫນຶ່ງໃນຫມູ່ປະຊາຊົນຮ້ອງທູນພຣະອົງວ່າ, “ທ້ອງຂອງຍິງທີ່ໃຫ້ກຳເນີດທ່ານແລະເຕົ້ານົມທີ່ລຽ້ງທ່ານນັ້ນກໍເປັນສຸກ.” 28 ແຕ່ພຣະອົງຊົງຕອບວ່າ, “ບໍ່ແມ່ນເລີຍ ຄົນທັງຫລາຍທີ່ຟັງພຣະທັມຂອງພຣະເຈົ້າ ແລະຖືຮັກສາພຣະທັມໄວ້ຕ່າງຫາກທີ່ເປັນສຸກ.” 29 ເມື່ອປະຊາຊົນເລີ່ມມາໂຮມກັນຫນາແຫນ້ນຂຶ້ນ ພຣະເຢຊູເຈົ້າຊົງເລີ່ມກ່າວວ່າ, “ຄົນໃນຍຸກນີ້ເປັນຍຸກທີ່ຊົ່ວຮ້າຍ ເຂົາສະແຫວງຫາຫມາຍສຳຄັນ ແຕ່ຈະບໍ່ມີຫມາຍສຳຄັນອັນໃດເປີດເຜີຍໃຫ້ແກ່ເຂົາ ເວັ້ນໄວ້ແຕ່ຫມາຍສຳຄັນເລື່ອງໂຢນາ. 30 ເຫມືອນກັບທີ່ໂຢນາໄດ້ເປັນຫມາຍສຳຄັນແກ່ຊາວເມືອງນີເນເວ, ດັ່ງນັ້ນ ບຸດມະນຸດຈະເປັນຫມາຍສຳຄັນແກ່ຄົນໃນຍຸກນີ້. 31 ຣາຊີນີແຫ່ງທິດໃຕ້ຈະລຸກຂຶ້ນໃນການພິພາກສາພ້ອມກັບຜູ້ຊາຍໃນຍຸກນີ້ ແລະລົງໂທດຄົນໃນຍຸກນີ້ ເພາະນາງໄດ້ມາແຕ່ທີ່ສຸດປາຍແຜ່ນດິນໂລກ ເພື່ອຈະຟັງຄຳສັ່ງສອນທີ່ມີສະຕິປັນຍາຂອງກະສັດໂຊໂລໂມນ ແລະ ເບິ່ງແມ! ຜູ້ທີ່ຍິ່ງໃຫຍ່ກວ່າກະສັດໂຊໂລໂມນກໍຢູ່ທີ່ນີ້. 32 ຊາວເມືອງນີເນເວຈະຢືນຂຶ້ນໃນວັນພິພາກສາພ້ອມກັບຄົນໃນຍຸກນີ້ ແລະຈະກ່າວໂທດຄົນໃນຍຸກນີ້ ເມື່ອພວກເຂົາໄດ້ຖິ້ມໃຈເກົ່າເອົາໃຈໃຫມ່ເພາະການປະກາດຂອງໂຢນາ ແລະເບິ່ງແມ, ຜູ້ທີ່ຍິ່ງໃຫຍ່ກວ່າໂຢນາກໍຢູ່ທີ່ນີ້. 33 ບໍ່ຫ່ອນມີຜູ້ໃດ, ເມື່ອໄຕ້ໂຄມແລ້ວຈະຕັ້ງໃນທີ່ຫລີ້ຊ້ອນ ຫລືຢູ່ກ້ອງກະຕ່າ ແຕ່ຕັ້ງໄວ້ບ່ອນໃສ່ໂຄມໄຟ ເພື່ອຜູ້ທີ່ເຂົ້າມາຈະໄດ້ເຫັນແສງສະຫວ່າງ. 34 ຕາຂອງເຈົ້າເປັນໂຄມໄຟຂອງຮ່າງກາຍ ເມື່ອຕານັ້ນດີຮ່າງກາຍຂອງເຈົ້າກໍເຕັມໄປດ້ວຍແສງສະຫວ່າງ, ແຕ່ເມື່ອຕາຂອງເຈົ້າບໍ່ດີໄປ ຮ່າງກາຍຂອງເຈົ້າກໍເຕັມໄປດ້ວຍຄວາມມືດ. 35 ເຫດສັນນັ້ນ ຈົ່ງລະວັງຢ່າໃຫ້ແສງສະຫວ່າງທີ່ມີຢູ່ໃນເຈົ້າມືດໄປ. 36 ຖ້າຮ່າງກາຍຂອງເຈົ້າທຸກສ່ວນເຕັມດ້ວຍຄວາມສະຫວ່າງ ບໍ່ມີສ່ວນໃດໃນຄວາມມືດ, ແລ້ວຮ່າງກາຍທັງຫມົດຂອງເຈົ້າຈະເປັນເຫມືອນດັ່ງໂຄມໄຟທີ່ສ່ອງສະຫວ່າງເທິງເຈົ້າ.” 37 ເມື່ອພຣະເຢຊູເຈົ້າກ່າວສຳເລັດແລ້ວ ມີຟາຣີຊາຍຜູ້ຫນຶ່ງໄດ້ເຊີນພຣະອົງໄປກິນເຂົ້າທີ່ເຮືອນຂອງຕົນ ເມື່ອພຣະເຢຊູເຈົ້າໄປເຖິງແລະນັ່ງອີງຕົວລົງ. 38 ຟາຣີຊາຍຜູ້ນັ້ນກໍປະຫລາດໃຈ ທີ່ພຣະອົງບໍ່ໄດ້ລ້າງມືກ່ອນກິນເຂົ້າແລງ. 39 ແລ້ວພຣະເຈົ້າອົງເຈົ້ານາຍກ່າວແກ່ລາວວ່າ, “ບັດນີ້, ເຈົ້າພວກຟາຣີຊາຍ, ເຈົ້າລ້າງຖ້ວຍຊາມໃຫ້ສະອາດແຕ່ຂ້າງນອກ ແຕ່ຂ້າງໃນຕົວເຈົ້າແລ້ວ ເຕັມໄປດ້ວຍຄວາມໂລບແລະຄວາມຊົ່ວຮ້າຍ. 40 ເຈົ້າ ຄົນໂງ່ເອີຍ! ຜູ້ທີ່ໄດ້ສ້າງຂ້າງນອກກໍໄດ້ສ້າງຂ້າງໃນເຫມືອນກັນບໍ່ແມ່ນບໍ? 41 ຈົ່ງບໍຣິຈາກແກ່ຄົນທຸກຍາກດ້ວຍສິ່ງຊຶ່ງຢູ່ຂ້າງໃນ ແລ້ວທຸກສິ່ງກໍຈະສະອາດສຳລັບພວກທ່ານ. 42 ແຕ່ວິບັດແກ່ເຈົ້າ, ພວກຟາຣີຊາຍ ພວກເຈົ້າຖວາຍຫນຶ່ງສ່ວນສິບໃນເຄື່ອງປູກຕາມຣະດູການແກ່ພຣະເຈົ້າຄືຜັກກ້ານກ່ຳ ຜັກແພວ, ແລະຜັກອື່ນໆທຸກຊະນິດ ຈາກສວນ ແຕ່ພວກເຈົ້າລະເລີຍຄວາມຍຸດຕິທໍາແລະຄວາມຮັກຂອງພຣະເຈົ້າ. ຈຳເປັນຢ່າງຍິ່ງທີ່ຈະປະຕິບັດຢ່າງຍຸດຕິທັມແລະຮັກພຣະເຈົ້າ ໂດຍບໍ່ລະເລີຍໃນການເຮັດສິ່ງອື່ນໆດ້ວຍ. 43 ແຕ່ວິບັດແກ່ເຈົ້າ, ພວກຟາຣີຊາຍ ພວກເຈົ້າມັກບ່ອນນັ່ງອັນມີກຽດໃນໂຮງທໍາມະສາລາ ແລະມັກໃຫ້ຄົນຄຳນັບໃຫ້ກຽດຢູ່ກາງຕະຫລາດ. 44 ວິບັດແກ່ພວກເຈົ້າ, ເປັນເໝືອນບ່ອນຝັງສົບທີ່ຄົນທັງຫລາຍຍ່າງຜ່ານໄປມາໂດຍບໍ່ຮູ້ວ່າມີຫຍັງ.” 45 ແລ້ວມີນັກກົດບັນຍັັດຜູ້ຊ່ຽວຊານຄົນຫນຶ່ງເວົ້າກັບພຣະອົງວ່າ, “ອາຈານເອີຍ, ທ່ານກຳລັງຫມິ່ນປະຫມາດພວກເຮົາເຫມືອນກັນ.” 46 ພຣະເຢຊູເຈົ້າກ່າວວ່າ, “ວິບັດຈະມີແກ່ພວກເຈົ້າເຫມືອນກັນ, ພວກເຈົ້າຜູ້ສອນກົດບັນຍັດ ພວກເຈົ້າເອົາພາລະທີ່ຫນັກຫນາມາວາງໃສ່ບ່າຂອງຜູ້ອື່ນ, ແຕ່ສ່ວນພວກເຈົ້າເອງ, ແມ່ນແຕ່ນິ້ວມືດຽວກໍບໍ່ແຕະພາລະນັ້ນ. 47 ວິບັດແກ່ພວກເຈົ້າ, ເພາະພວກເຈົ້າສ້າງອຸບໂມງຝັງສົບໃຫ້ພວກຜູ້ປະກາດພຣະຄໍາ, ຄືພວກຜູ້ທໍານວຍເຫຼົ່ານັ້ນເເຫລະທີ່ບັນພະບຸຣຸດຂອງເຈົ້າໄດ້ຂ້າພວກເຂົາ. 48 ດັ່ງນັ້ນ ພວກເຈົ້າຈຶ່ງເປັນພະຍານແລະເຫັນດີກັບສິ່ງທີ່ບັນພະບຸດຣຸດຂອງພວກເຈົ້າໄດ້ເຮັດ ພວກເຂົາໄດ້ຂ້າພວກຜູ້ປະກາດພຣະຄໍາ ແລະພວກເຈົ້າໄດ້ສ້າງອຸບໂມງໃຫ້ແກ່ພວກເຂົາ. 49 ດ້ວຍເຫດນີ້ ພຣະປັນຍາຂອງພຣະເຈົ້າຈຶ່ງກ່າວວ່າ, ‘ເຮົາຈະໃຊ້ພວກຜູ້ປະກາດພຣະຄໍາ ແລະອັກຄະສາວົກໄປຫາພວກເຂົາ, ແລະພວກເຂົາຈະຂົ່ມເຮັງບາງຄົນແລະຂ້າບາງຄົນ. 50 ຜົນກໍຄື ຄົນໃນຍຸກນີ້ຈະຕ້ອງຮັບຜິດຊອບ ໃນເລືອດຂອງພວກຜູ້ປະກາດພຣະຄໍາແລະອັກຄະສາວົກເຫລົ່ານັ້ນ ທີ່ໄຫລອອກມາຕັ້ງແຕ່ຄາວວາງຮາກສ້າງໂລກ. 51 ຕັ້ງແຕ່ເລືອດຂອງອາເບັນຈົນເຖິງເລືອດຂອງຊາຂາຣີຢາ ຜູ້ທີ່ຖືກຂ້າທີ່ແທ່ນບູຊາແລະພຣະວິຫານ. ຈິງແທ້, ເຮົາບອກເຈົ້າໃນເລື່ອງນີ້ ເພາະຄົນໃນຍຸກນີ້ຈະຕ້ອງຮັບຜິດຊອບ. 52 ວິບັດແກ່ພວກເຈົ້າ ຜູ້ຊ່ຽວຊານກົດບັນຍັດ, ເພາະພວກເຂົ້າໄດ້ເອົາກະແຈແຫ່ງຄວາມຮູ້ໄວ້ ພວກເຈົ້າເອງກໍບໍ່ເຂົ້າໄປ ແລະຄົນທີ່ຢາກເຂົ້າໄປ ພວກເຈົ້າກໍຂັດຂວາງພວກເຂົາເສຍ.” 53 ຫລັງຈາກທີ່ພຣະເຢຊູເຈົ້າອອກຈາກທີ່ນັ້ນ, ພວກທໍາມະຈານແລະພວກຟາຣີຊາຍໄດ້ໂຈມຕີແລະໂຕ້ຖຽງກັບພຣະອົງອີກຫລາຍເລື່ອງ. 54 ຫວັງຈະໃຫ້ພຣະອົງຕິດກັບດັກຈາກຄຳເວົ້າຂອງພຣະອົງ.