1 ຫລັງຈາກສິ່ງເລົ່ານີ້ແລ້ວ ພຣະເຈົ້າອົງເຈົ້ານາຍໄດ້ຕັ້ງອີກເຈັດສິບຄົນ ແລະສົ່ງພວກເຂົາອອກໄປເປັນຄູ່ລະສອງຄົນ ເຂົ້າໄປໃນທຸກເມືອງກ່ອນໜ້າພຣະອົງ ແລະທຸກບ້ານບ່ອນທີ່ພຣະອົງຈະສະເດັດໄປນັ້ນ. 2 ພຣະອົງຊົງກ່າວກັບເຂົາວ່າ, “ເຂົ້າທີ່ເກັບກ່ຽວກໍມີຫລາຍແທ້, ແຕ່ຄົນງານຍັງມີຫນ້ອຍຢູ່. ສະນັ້ນພວກທ່ານຈົ່ງພາວັນນາອະທິຖານຕໍ່ພຣະເຈົ້າອົງເຈົ້ານາຍຜູ້ເປັນເຂົ້າຂອງນາ ໃຫ້ສົ່ງຄົນງານມາເກັບກ່ຽວເຂົ້າຂອງພຣະອົງ. 3 ຈົ່ງອອກໄປຕາມທາງຂອງເຈົ້າ. ເບິ່ງແມ! ເຮົາໄດ້ໃຊ້ພວກເຈົ້າໄປເຫມືອນດັ່ງແກະນ້ອຍຢູ່ທ່າມກາງຝູງຫມາໄນ. 4 ຢ່າຖືກະເປົາເງິນ, ຫລືຖົງເຄື່ອງ, ຫລືຖືເກີບໄປນຳ ແລະຢ່າຄຳນັບຜູ້ໃດຕາມທາງ. 5 ເມື່ອເຈົ້າທັງຫລາຍເຂົ້າໄປໃນເຮືອນຫລັງໃດກໍຕາມ ຈົ່ງເວົ້າກ່ອນວ່າ ‘ຂໍໃຫ້ສັນຕິສຸກຈົ່ງມີແກ່ເຮືອນຫລັງນີ້!’. 6 ຖ້າມີຄົນຮັກສັນຕິສຸກຢູ່ໃນເຮືອນນັ້ນ ສັນຕິສຸກຂອງເຈົ້າຈະສະຖິດຢູ່ກັບຜູ້ນັ້ນ ຖ້າຫາກບໍ່ມີ, ສັນຕິສຸກນັ້ນຈະກັບຄືນມາຫາເຈົ້າ. 7 ຈົ່ງອາໄສຢູ່ໃນເຮືອນນັ້ນ, ຈົ່ງກິນແລະດື່ມຕາມທີ່ເຂົາມີຢູ່ ດ້ວຍວ່າຜູ້ທຳງານກໍສົມຄວນໄດ້ຮັບຄ່າຈ້າງຂອງຕົນ ຢ່າຍ້າຍຈາກເຮືອນນີ້ໄປຢູ່ເຮືອນນັ້ນ. 8 ບໍ່ວ່າທ່ານຈະເຂົ້າໄປໃນເມືອງໃດ ແລະພວກເຂົາຕ້ອນຮັບເຈົ້າໄວ້ ຈົ່ງກິນຂອງທີ່ພວກເຂົາຈັດໄວ້ໃຫ້. 9 ແລະ ຮັກສາຄົນເຈັບປ່ວຍຢູ່ໃນເມືອງນັ້ນໃຫ້ຫາຍດີ. ບອກພວກເຂົາວ່າ ‘ຣາຊະອານາຈັກຂອງພຣະເຈົ້າໄດ້ມາໃກ້ທ່ານທັງຫລາຍແລ້ວ’. 10 ແຕ່ເມື່ອພວກເຈົ້າເຂົ້າໃນເມືອງໃດ ແລະເຂົາບໍ່ຕ້ອນຮັບພວກເຈົ້າໄວ້ ຈົ່ງອອກໄປກາງຖະຫນົນແລະກ່າວວ່າ. 11 ‘ແມ່ນວ່າຂີ້ຝຸ່ນດິນໃນເມືອງຂອງເຈົ້າທີ່ຕິດຕີນຂອງພວກເຮົາ ເຮົາຂໍປັດອອກຕໍ່ສູ້ພວກເຈົ້າ! ແຕ່ຈົ່ງເຂົ້າໃຈຂໍ້ນີ້ວ່າ: ຣາຊະອານາຈັກຂອງພຣະເຈົ້າໄດ້ມາໃກ້ພວກເຈົ້າແລ້ວ’. 12 ເຮົາບອກພວກເຈົ້າວ່າໃນວັນພິພາກສາ ໂທດຂອງເມືອງໂຊດົມໃນວັນນັ້ນຈະເບົາກວ່າ ໂທດຂອງເມືອງນີ້.” 13 “ວິບັດແກ່ເຈົ້າເມືອງໂຂຣາຊິນ, ວິບັດແກ່ເຈົ້າເມືອງເບັດຊາອີດາ ເອີຍ!, ຖ້າການອັດສະຈັນເຫລົ່ານັ້ນທີ່ໄດ້ເຮັັດທ່າມກາງພວກເຈົ້ານັ້ນ ໄດ້ຖືກເຮັດໃນເມືອງຕີເຣແລະເມືອງຊີໂດນແລ້ວ, ພວກເຂົາຄົງຈະໄດ້ຖິ້ມໃຈເກົ່າເອົາໃຈໃຫມ່ດົນແລ້ວ, ແລະນຸ່ງຫົ່ມຜ້າຫຍາບ ນັ່ງເທິງຂີ້ເຖົ່າ. 14 ແຕ່ໂທດຂອງເມືອງຕີເຣແລະເມືອງຊີໂດນຈະເບົາກວ່າໂທດຂອງພວກເຈົ້າ ໃນວັນພິພາກສາ. 15 ຝ່າຍເຈົ້າ, ເມືອງກາເປນາອູມເອີຍ ເຈົ້າຄິດວ່າ ເຈົ້າຈະຖືກຍົກຂຶ້ນສູ່ສະຫວັນບໍ? ບໍ່, ເຈົ້າຈະຖືກຖິ້ມລົງໄປໃນບຶງໄຟນະຣົກ. 16 “ຜູ້ທີ່ຟັງເຈົ້າທັງຫລາຍກໍໄດ້ຟັງເຮົາ, ແລະຜູ້ທີ່ບໍ່ຍອມຮັບເຈົ້າທັງຫລາຍກໍບໍ່ຍອມຮັບເຮົາ, ແລະຜູ້ທີ່ບໍ່ຍອມຮັບເຮົາກໍບໍ່ຍອມຮັບຜູ້ທີ່ຊົງໃຊ້ເຮົາມາ.” 17 ພວກເຈັດສິບຄົນ ໄດ້ກັບມາດ້ວຍຄວາມຊື່ນຊົມຍິນດີ ແລະບອກວ່າ, “ພຣະເຈົ້າອົງເຂົ້ານາຍ, ແມ່ນແຕ່ຜີປີສາດກໍຍອມຟັງຄວາມຂອງພວກຂ້ານ້ອຍໃນນາມຊື່ຂອງພຣະອົງ.” 18 ພຣະເຢຊູເຈົ້າກ່າວກັບເພິ່ນວ່າ, “ເຮົາໄດ້ເຫັນຊາຕານຕົກຈາກສະຫວັນເຫມືອນຟ້າຜ່າ. 19 ເບິ່ງແມ! ເຮົາໄດ້ໃຫ້ພວກເຈົ້າມີອຳນາດຢຽບງູແລະແມງງອດ, ແລະເຫນືອອໍານາດທັງໝົດຂອງສັດຕູ ແລະບໍ່ມີສິ່ງໃດເຮັດອັນຕະຣາຍແກ່ພວກເຈົ້າໄດ້ເລີຍ. 20 ແຕ່ຢ່າໄດ້ຊື່ນຊົມຍິນດີໃນສິ່ງເຫລົ່ານີ້ເພາະວິນຍານທັງຫລາຍຍອມຟັງຄວາມຂອງເຈົ້າ ແຕ່ຈົ່ງຊົມຊື່ນຍິນດີເພາະຊື່ຂອງພວກເຈົ້າໄດ້ຈົດໄວ້ໃນສະຫວັນແລ້ວ.” 21 ໃນຂະນະດຽວກັນ ພຣະເຢຊູເຈົ້າມີຄວາມຊົມຊື່ນຍິນດີໃນພຣະວິນຍານບໍຣິສຸດ ເຈົ້າແລະກ່າວວ່າ, “ຂ້ານ້ອຍສັນຣະເສີນພຣະອົງພຣະບິດາເຈົ້າ, ພຣະເຈົ້າອົງຈອມເຈົ້ານາຍແຫ່ງຟ້າສະຫວັນແລະແຜ່ນດິນໂລກ ເພາະພຣະອົງຊົງໄດ້ປົກບັງສິ່ງເຫລົ່ານີ້ໄວ້ຈາກຜູ້ມີປັນຍາແລະຜູ້ສະຫລາດ ແຕ່ໄດ້ຊົງເປີດເຜີຍສິ່ງນັ້ນໃຫ້ແກ່ບັນດາຄົນທີ່ບໍ່ໄດ້ຮັບການສອນ ເຊິ່ງເປັນເຫມືອນເດັກນ້ອຍ, ແມ່ນແລ້ວ, ພຣະບິດາ, ເພາະນີ້ເປັນສິ່ງທີ່ເຫັນຊອບຕໍ່ສາຍຕາຂອງພຣະອົງ.” 22 “ພຣະບິດາຂອງເຮົາໄດ້ມອບສິ່ງສາຣະພັດໃຫ້ແກ່ເຮົາແລ້ວ ແລະບໍ່ມີໃຜຮູ້ວ່າພຣະບຸດແມ່ນຜູ້ໃດ ເວັ້ນໄວ້ແຕ່ພຣະບິດາ ແລະບໍ່ມີໃຜຮູ້ວ່າພຣະບິດາແມ່ນຜູ້ໃດ ເວັ້ນໄວ້ແຕ່ພຣະບຸດ ກັບຜູ້ທີ່ພຣະບຸດເລືອກທີ່ຈະສະແດງໃຫ້ຮູ້.” 23 ແລ້ວພຣະເຢຊູເຈົ້າກໍຫລຽວໄປຫາພວກສາວົກ ແລະກ່າວແກ່ພວກເພິ່ນເປັນການສ່ວນຕົວວ່າ, “ບັນດາຜູ້ທີ່ເຫັນແບບດຽວກັບທີ່ທ່ານເຫັນກໍເປັນສຸກ. 24 ເຮົາບອກເຈົ້າທັງຫລາຍວ່າ, ຜູ້ປະກາດພຣະທັມຫລາຍຄົນ ແລະກະສັດຫລາຍອົງປາດຖະນາຈະເຫັນສິ່ງທີ່ພວກເຈົ້າເຫັນຢູ່ນີ້ ແຕ່ກໍບໍ່ໄດ້ເຫັນ ແລະປາດຖະນາທີ່ຈະໄດ້ຍິນສິ່ງທີ່ພວກເຈົ້າໄດ້ຍິນ ແຕ່ກໍບໍ່ໄດ້ຍິນສິ່ງນັ້ນ.” 25 ເບິ່ງແມ, ມີອາຈານສອນພຣະບັນຍັດຂອງພວກຄົນຢີວຄົນຫນຶ່ງຢືນຂຶ້ນ ເພື່ອທົດລອງພຣະເຢຊູເຈົ້າ ໂດຍຖາມວ່າ, “ທ່ານອາຈານເອີຍ, ຂ້ານ້ອຍຈະຕ້ອງເຮັດແນວໃດຈຶ່ງຈະໄດ້ຊີວິດນິລັນດອນ?”. 26 ພຣະເຢຊູເຈົ້າ ຕອບລາວວ່າ, “ພຣະບັນຍັດຂຽນໄວ້ວ່າຢ່າງໃດ? ທ່ານໄດ້ອ່ານແລ້ວເຂົ້າໃຈຢ່າງໃດ?”. 27 ເພິ່ນຈຶ່ງໃຫ້ຄໍາຕອບແລະກ່າວວ່າ, “ທ່ານຈົ່ງຮັກພຣະເຈົ້າອົງເຈົ້ານາຍ ພຣະເຈົ້າຂອງເຈົ້າ ດ້ວຍສຸດໃຈ, ດ້ວຍສຸດຈິດ, ດ້ວຍສຸດກຳລັງ, ແລະດ້ວຍສຸດຄວາມຄິດຂອງເຈົ້າ’ ແລະຈົ່ງຮັກເພື່ອນບ້ານເຫມືອນຮັກຕົນເອງ’.” 28 ພຣະເຢຊູເຈົ້າຕອບເພິ່ນວ່າ, “ທ່ານຕອບຖືກແລ້ວ. ຈົ່ງເຮັດຢ່າງນັ້ນ ແລ້ວທ່ານຈະໄດ້ຊີວິດ.” 29 ແຕ່ອາຈານທ່ານນັ້ນຢາກສະແດງວ່າຕົນເປັນຄົນສິນທັມ ຈິ່ງເວົ້າກັບພຣະເຢຊູເຈົ້າວ່າ, “ແມ່ນໃຜເປັນເພື່ອນບ້ານຂອງຂ້ານ້ອຍ?” 30 ພຣະເຢຊູເຈົ້າຈຶ່ງຕອບລາວແລະເວົ້າວ່າ, “ມີຊາຍຄົນຫນຶ່ງລົງຈາກນະຄອນເຢຣູຊາເລັມຈະໄປເມືອງເຢຣິໂກ. ເພີ່ນໄດ້ຕົກຢູ່ໃນທ່າມກາງພວກໂຈນ, ພວກເຂົາໄດ້ປຸ້ນເອົາຊັບສິ່ງຂອງ ແລະທັງທຸບຕີ ແລ້ວປະຖິ້ມໄວ້ເກືອບຕາຍ. 31 ໂດຍບັງເອີນມີປະໂຣຫິດຄົນຫນຶ່ງໄດ້ລົງໄປທາງນັ້ນ ເມື່ອເຂົາໄດ້ເຫັນຄົນເຈັບນັ້ນກໍເວັ້ນໄປຟາກອື່ນເສຍ. 32 ໃນທໍານອງດຽວກັນ ຄົນເລວີຜູ້ຫນຶ່ງ ເມື່ອມາຮອດບ່ອນນັ້ນ ແລະເຫັນຄົນລາວ ກໍຍ່າງກາຍໄປອີກຟາກໜຶ່ງ. 33 ແຕ່ມີໄທຊາມາເຣັຍຄົນຫນຶ່ງໄດ້ເດີນທາງຜ່ານມາທີ່ຄົນເຈັບນອນຢູ່ນັ້ນ, ເມື່ອລາວເຫັນຄົນເຈັບແລ້ວກໍມີໃຈເມດຕາ. 34 ເພິ່ນຈິ່ງເຂົ້າໄປເອົາຜ້າພັນບາດໃຫ້ ແລະເອົານ້ຳມັນກັບເຫລົ້າແວງຖອກໃສ່ບາດນັ້ນ ຈິ່ງໂຈມຂຶ້ນຂີ່ສັດຂອງຕົນພາໄປເຖິງໂຮງແຮມ, ແລະເອົາໃຈໃສ່ບົວຣະບັດລາວ. 35 ໃນມື້ຖັດມາ ລາວໄດ້ອອກເງິນສອງເດນາຣິອົນໃຫ້ເຈົ້າຂອງໂຮງແຮມ ບອກວ່າ, ‘ຈົ່ງເບິ່ງແຍງຄົນນີ້ເດີ, ຖ້າທ່ານຈ່າຍເກີນນີ້ໄປເທົ່າໃດ ເມື່ອເຮົາກັບມາກໍຈະໃຊ້ໃຫ້’. 36 ທ່ານຄິດວ່າຄົນໃດໃນສາມຄົນນີ້ເປັນເພື່ອນບ້ານຂອງຄົນທີ່ຖືກໂຈນປຸ້ນນັ້ນ.” 37 ອາຈານຜູ້ນັ້ນຕອບວ່າ, “ຊາຍທີ່ໄດ້ສະແດງຄວາມເມດຕາໃຫ້ແກ່ຄົນເຈັບ,” ພຣະເຢຊູເຈົ້າບອກລາວວ່າ, “ຈົ່ງໄປເຮັດແບບດຽວກັນເຖີດ. 38 ໃນຂະນະເມື່ອພວກເຂົາເດີນທາງ, ພຣະອົງກໍເຂົ້າໄປໃນຫມູ່ບ້ານຫນຶ່ງ ແລະມີຍິງຄົນຫນຶ່ງຊື່ມາທາໄດ້ຕ້ອນຮັບພຣະອົງເຂົ້າໃນເຮືອນຂອງຕົນ. 39 ມາທາມີນ້ອງສາວຊື່ມາຣິອາ ເຊິ່ງເປັນຜູ້ທີ່ນັ່ງໃກ້ຕີນຂອງອົງພຣະເຢຊູຄຣິດເຈົ້າ ແລະຟັງຖ້ອຍຄຳຂອງພຣະອົງ. 40 ແຕ່ມາທາໄດ້ມົວເມົາຢູ່ໃນການຈັດຕຽມອາຫານຫລາຍເກີນໄປ. ນາງຈິ່ງໄດ້ມາຫາພຣະເຢຊູ ແລະບອກວ່າ, “ພຣະເຈົ້າອົງເຈົ້ານາຍເອີຍ, ພຣະອົງບໍ່ສົນໃຈຫລືວ່ານ້ອງສາວຂອງຂ້ານ້ອຍປະໃຫ້ຂ້ານ້ອຍຮັບໃຊ້ແຕ່ຜູ້ດຽວ? ສະນັ້ນຂໍບອກໃຫ້ລາວມາຊ່ວຍຂ້ານ້ອຍແດ່!”. 41 ແຕ່ພຣະເຈົ້າອົງເຈົ້ານາຍກ່າວຕໍ່ນາງວ່າ, “ມາທາ, ມາທາເອີຍ, ເຈົ້າວຸ້ນວາຍໃຈກັບຫລາຍສິ່ງແທ້! 42 ສິ່ງຊຶ່ງຈຳເປັນນັ້ນມີແຕ່ສິ່ງດຽວ ມາຣິອາໄດ້ເລືອກເອົາສ່ິ່ງທີ່ດີທີ່ສຸດນັ້ນແລ້ວ ເຊິ່ງຈະຍົກເອົາໄປຈາກນາງບໍ່ໄດ້.”