¹ ۱۔ جڈاں بّرے نے ستویں مُہر کھولی تاں آسمان تے تقریباً آدھ گھنٹہ تائیں خاموشی رہی۔ ² ۔ وَل میں سَت فرشتیاں کوُ خدا دے حضور کھڑے ڈِٹھا، جِنہاں کوُ سَت نرسنگے ڈِتے گئے ہَن۔ ³ ۔ وَل ہِک بئیا فرشتہ اپنے ہتھ اِچ عُود دے نال بھریا ہویا پیالہ گھن کے ذبح کرن آلی جاہ تے کھڑا ہا تاں جو اوُں کوُ پاک لوگاں دی دعاواں دےنال اوُں سنہری ذبح کرن آلی جاہ تے چڑھائے جیہڑا تخت دے سامنے ہِے۔ ⁴ ۔ فرشتے دے ہتھ اِچ عُود دا اُٹھدا ہویا دھواں تے پاک لوگاں دی دعاواں خدا دے حضور پہنچیاں۔ ⁵ ۔ تاں فرشتے نے عُود دا پیالہ گھن کے اوُں کوُ ذبح کرن آلی جاہ دی اَگ نال بھر گدے۔ وَل اوُں نے اوُں کوُ تھلے زمین تے سَٹ ڈِتا جیندی وجہ توں طوفانی آوازاں، گرجاں تے بجلیاں پیدا تھیاں اَتے ہِک وڈا زلزلہ آیا۔ ⁶ ۔ اوہ سَتے فرشتے اپنے اپنے نرسنگے گھن کے اُنہاں وِچ پھونکن کوُ تیار کھڑے ہَن۔ ⁷ ۔ پہلے فرشتے نے اپنا نرسنگا پھونکیا تاں گڑے تے خون ملی ہوئی اَگ کوُ اوُں نے زمین تے سَٹ ڈِتا۔ جیندی وجہ توں زمین دا ہک تہائی حصہ، درختاں دا ہِک تہائی حصہ تے زمین ساری ہری گھا سڑ گئی۔ ⁸ ۔ وَل ڈوجھے فرشتے نے اپنا نرسنگا پھونکیا تاں اوُندی وجہ توں پہاڑ جئی وڈی شئے سَڑ کے سمندر وِچ جا ڈھٹی۔ تاں سمندر دا ہک تہائی حصہ خون بن گیا۔ ⁹ ۹۔ جیندی وجہ توں ہک تہائی سمندری مخلوق مَر گئِن، اَتے ہک تہائی بحری جہاز تباہ تھی گئے۔ ¹⁰ ۱۰۔ وَل تریجے فرشتے نے اپنا نرسنگا پھونکیا جیندی وجہ توں مشعل دی کار ہک وڈا تارا آسمان تے ہک تہائی دریاواں تے پانی دے چشمیاں تے ڈھے پیا۔ ¹¹ ۱۱۔ اوُں تارے دا ناں ناگ دُونا ہا۔ اِیں دے ڈھاون دی وجہ توں پانی دا ہک تہائی حصہ ناگ دُونا دی کار کڑوا تھی گیا۔ جیندی وجہ توں بہوں سارے لوگ مَر گئے۔ ¹² ۔ چوتھے فرشتے نے اپنا نرسنگا پھونکیا تاں اِیندی وجہ توں سورج دا ہک تہائی حصہ، اوُں وے ای چند دا ہک تہائی حصہ تے تاریاں دے ہک تہائی حصے تے ڈُکھ پہنچیا۔ پس ہک تہائی حصے تے اندھارا تھی گیا، اِیں وی ای ڈیں دے ہک تہائی حصے تے رات دے ہک تہائی حصے اِچ سوجھلا نہ ریہا۔ ¹³ ۔ وَل میں جیویں ای نگاہ کیتی تاں آسمان دے وِچوں وِچ ہک عقاب کوُ اُڑدے تے وڈی آواز نال ایہہ آدھے ہوئے سُنیا کہ، "افسوس، افسوس، افسوس اِنہاں ساریاں تے جیہڑے زمین تے راہندے ہِن کیوں جو باقی تریہے فرشتیاں دے نرسنگیاں دی آواز دا پھونکیا ونجنا حالی باقی ہِے۔