1
۱۔ وَل میں ہک نویں آسمان تے نویں زمین کوُ ڈِٹھا کیونکہ پہلے آلے آسمان تے زمین ختم تھی گئے ہَن۔ اَتے سمندر وی ختم تھی گیا ہا۔
2
۔ میں خدا دی طرفوں آسمان تھوں ہک پاک شہر نویں یروشلیم کوُ ڈِٹھا اوہ ایویں سجا ہویا ہا جیویں کوُار اپنے آپ کو گھوٹ کیتے تیار کریندی ہِے۔
3
۔ میں تخت تھوں وڈی آوز سُنی ڈیکھو! خدا دی حضوری انساناں دے نال ہِے، تے اوہ اُنہاں دے نال راہسی۔ اوہ اوُندے لوگ ہوسن تے خدا آپ اُنہاں دے نال راہسی اَتے اوہ اُنہاں دا خدا ہوسی۔
4
۔ اوہ اُنہاں دی اکھیاں دے ہنجو پونجھ ڈیسی تے وَل موت نہ راہسی، نہ غم، نہ رونا تے نہ درد، پُرانی شئیاں ویندیاں رہیاں۔
5
۔ اوہ جو تخت تے بیٹھا ہا اوُں نے آکھیا "ڈیکھو! میں سارا کجھ نواں بنا ڈینا ہاں اوُں نے آکھیا، ایہہ گالہیں لکھ گھن کیونکہ ایہہ گالہیں سچ تے برحق ہِن''۔
6
۔ اوُں نے میکوُ آکھیا ''ایہہ گالہیں تھی گئیِن'' الفا تے اومیگا میں ہاں یعنی میں اوّل تے آخر ہاں جیہڑا پیاسا ہووے اوُں کوُں حیاتی دے چشمیاں توں مفت پیون کوُ ڈیساں۔
7
۔ جیہڑا غالب آسی اوہ ایہہ میراث پاسی میں اوُندا خدا ہوساں اَتے اوہ میڈا پُتر ہوسی۔
8
۔ لیکن بزدل تے بےایمان تے گھنونے لوگ تے خونی تے حرامکار تے جادوگر تے بت پرست تے سارے کوُڑیاں دا ٹھکانہ گندھک نال بلدی ہوئی بھا دی جھیل ہوسی ایہو ڈوجھی موت ہِے۔
9
۹۔ ستاں فرشتیاں وِچوں ہک میڈے کول آیا جیندے کول سَت پیالے ہَن جو کہ سَت آفتاں نال بھرے ہوئے ہَن تے اوُں نے اکھیا ''اِتھاں آ'' میں تیکوُ کوُوار یعنی بّرے دی ذال ڈِکھاواں۔
10
۱۰۔ وَل اوہ میکوُں روُح اِچ ہک وڈے اُچے پہاڑ تے گھن گیا۔ اُتھاں اوُں نے میکوُ پاک یروشلیم کوُ خدا دے کولوں آسمان تھوں اُتردے ہوئے ڈِکھایا۔
11
۱۱۔ یروشلیم شہر وِچ خدا دا جلال ہا اَتے اوُندی چمک قیمتی پتھر یعنی یشب دی کار ہائی جو کہ بلور دی کار صاف تے شفاف ہا۔
12
۔ اوُندی ہک بہوں وڈی کندھ ہائی جیندے بارہ بوہے ہَن تے اُنہاں تے بارہ فرشتے ہَن تے اُنہاں بوہیاں تے بنی اسرائیل دے بارہ قبیلیاں دے ناں لکھے ہوئے ہَن۔
13
۔مشرق دے پاسے ترئے بوہے، شمال دے پاسے ترئے بوہے، جنوب دے ترئے بوہے تے مغرب دے ترئے بوہے ہَن۔
14
۱۴۔ اوُں شہر دی کندھ دیاں بارہ بنیاداں ہَن تے اُنہاں تے بّرہ دے بارہ رسولاں دے ناں ہَن۔
15
۱۵۔ اوہ جیہڑا میڈے نال گالہیں کریندا پیا ہا اوُندے کول شہر دے بوہیاں کوُ تے اوُں کندھ کوُ ناپن کیتے سونے دا گز ہا۔
16
۱۶۔ اوہ شہر جیہڑا مربع دی کار ہا جڈاں اوُں کوُ ناپا گیا تاں اوُندی لمبائی، چوڑائی تے اونچائی برابر ہا۔ جڈاں اوُں شہر کوُ ناپا گیا تاں بارہ ہزار فرلانگ نکلا۔
17
۱۷۔ اوُں نے اوُں کندھ کوُ وی ناپا جیندی موٹائی ہک سو چوالہی ہتھ (۲۱۶ فٹ) ہا جو آدمیاں دی پیمائش دے مطابق ( جو کہ فرشتیاں دی پیمائش دے برابر ہائی) تاں ایہہ ہک سو چوالہی ہتھ نکلا۔
18
۱۸۔ اوُں شہر دی تعمیر یشب تے کیتی گئی ہا اوہ شہر خالص سونے دی کار تے صاف شفاف شیشے دی کار ہا۔
19
۱۹۔ اوُں کندھ دی بنیاداں وِچ ہر طرح دا قیمتی پتھر لایا گیا ہا۔ پہلی بنیاد یشب دی کار ہا، ڈوجھی نیلم دی، تریجھی سلیمانی پتھر دی، چوتھی زمرد۔
20
۲۰۔ پنجویں عقیق دی، چھیویں لعل دی، ستویں سنہرے پتھراں، اَٹھویں فیروزہ، نوویں زبرجد، دسویں یمنی دی، گیارہویں زرقون دی تے بارہویں یاقوت دی۔
21
۲۱۔ بارہ بوہے بارہ موتیاں دے ہَن تے ہر بوہا ہک موتی دا ہا اَتے اِیں شہر دیاں گلیاں خالص سونے دیاں ہَن جو شفاف شیشے دی کار چمک دیاں پیاں ہَن۔
22
۲۲۔ میں اِیں شہر اِچ کوئی ہیکل نہ ڈِٹھی کیونکہ خدا جو بادشاہت کریندا ہِے اِیں دا بّرہ اِیں دی ہیکل ہِے۔
23
۲۳۔ اُتھاں نہ سِجھ دی تے نہ چند دی ضرورت ہائی کیونکہ خدا دا جلال اُتھاں چمکدا ہا۔
24
۲۴۔ قوماں اوُں شہر دی روشنی اِچ چلسن۔ زمین دے بادشاہ شان وشوکت دا سامان گھن آسن۔
25
۲۵۔ اِیں شہر دے بوہے بند نہ تھی سن اَتے اُتھاں رات نہ ہوسی۔
26
۲۶۔ لوگ قوماں دی عزت تے شان وشوکت کوُ گھن کے اِیں شہر اِچ آسن۔
27
۲۷۔ پر اوُندے وِچ کوئی ناپاک شئے تے ہر طرح دے شرمناک کم کرن آلا، یا دھوکے باز داخل نہ تھی سی بلکہ صرف اوہ داخل تھی سن جنہاں دے ناں بّرہ دی کتاب حیات وِچ مل سن۔