1
۱۔ اُنہاں سَت فرشتیاں وِچوں ہک جئیں نے اوہ سَت پیالے پکڑے ہوئے ہَن میکوُ آکھے ''اِڈے آؤ میں تہاکوُ ہک وڈی کسبی دی سزا ڈکھاواں جو بہوں سارے پانیاں تے بیٹھی ہِے۔
2
۔ جیندے نال اِیں زمین دے بادشاہاں نے حرامکاری کیتی تے زمین دے راہن آلے اوُندی حرامکاری دی مَے وِچ متوالے تھی گئے ہَن۔
3
۳ ۔ فرشتہ میکوُ بیابان اِچ گھن گیا جِتھاں میں ہک عورت کوُ قرمزی رنگ دے ایہو جئے حیوان تے بیٹھے ڈِٹھا جئیں دے ۱۰ سینگ تے ۷ سر ہَن تے اوہ کفر دے ناواں توں لِپا ہویا ہا۔
4
۴ ۔ ایہہ عورت ارغوانی تے قرمزی کپڑے پا کے تے سونے نال تے قیمتی پتھراں نال سجی ہوئی ہائی۔ اوُں دے ہتھ اِچ سونے دا پیالہ ہا جو اِیندی بدکاریاں تے اِیندی حرامکاریاں دی ناپاکی نال بھریا ہویا ہا۔
5
۵ ۔ اوُندے متھے تے ایہہ لکھیا ہویا ہا ایہہ ہک راز ہِے کہ وڈا شہر بابل، کسبیاں دی زمین دی مکروہات دی ماں۔
6
۶ ۔ اَتے میں اوُں عورت کوُ پاک لوگاں دے خون تے یسوع دی خاطر شہید ہون آلیاں دا خون پیون اِچ متوالا ڈِٹھا تے بہوں حیران تھیا۔
7
۷ ۔ لیکن وِل فرشتے نے میکوُ آکھیا، تُوں کیوں حیران تھیندا ہئیں؟ میں تہاکوُ اِیں عورت تے حیوان دے بارے وِچ ڈسیندا ہاں جو اِیں کوُ چاتے ہوئے ہِے اوہ حیوان جئیں دے ۷ سر تے ۱۰ سینگ ہِن۔
8
۔ ایہہ حیوان جو توں ڈِٹھا ہا پہلے تاں ہا پر ہُن کئے نئیں، ہُن اوہ ڈونگے ٹوئے وِچوں نکل کے اُتے آون آلا ہِے وَل اوہ ہلاکت اِچ پے ویسی۔ اوہ جو اِیں زمین تے راہندے ہَن جیندا ناں جڈاں توں ایہہ دُنیا بنی ہِے کتاب حیات اِچ کئے نئیں۔ اِیں حیوان دے بارے وِچ حیران ہوسو جو پہلے ہا پر ہُن نئیں، لیکن آؤن آلا ہِے۔
9
۹۔ اوہ ذہن جیندے وِچ حکمت ہِے، اوہ سَت سر، سَت پہاڑ ہِن جنہاں تے اوہ عورت بیٹھی ہِے۔
10
۱۰۔ اَتے اوہ سَت بادشاہ ہِن جنہاں کولوں پنج بادشاہ آچکے ہِن ہک ہالی وی باقی ہِے اَتے ہک ہالی تک آیا ای نئیں لیکن جڈاں اوہ آسی تاں کجھ عرصہ راہسی۔
11
۱۱۔ اَتے اوہ حیوان جو پہلا ہا پر ہُن نئیں ہِے اوہ آپ وی اٹھواں بادشاہ ہِے اُنہاں ستاں بادشاہاں وچوں ہک جو ہلاکت اِچ ویندا پئے۔
12
۔ اوہ 10 سینگ جو توں ڈِٹھے ہِن اوہ 10 بادشاہ ہِن جنہاں کوُ ہالی تائیں بادشاہت نئیں ملی پر اِیں حیوان دے نال کجھ دیر کیتے بادشاہ دی مانند بادشاہت پاسن۔
13
۔ اُنہاں ساریاں دی ہک ای رائے ہِے اَتے اُنہاں نے ساری قوت دا اختیار اوُں حیوان کوُ ڈے ڈِتے۔
14
۱۴۔ اوہ بّرہ دے خلاف جنگ کریسن پر بّرہ اُنہاں تے فتح پاسی کیوں جو اوہ خداونداں دا خدا تے بادشاہواں دا بادشاہ ہِے اَتے جو اوُندے نال وفادار ہِن اوہ سارے نیک تے چُنے ہوئے ہوسن۔
15
۱۵۔ فرشتے نے میکوُ آکھیا، '' جنہاں پانیاں کوُ تُوں ڈِٹھے اوُندے تے کسبی عورت بیٹھی ہا اَتے اوہ لوگ، اُمتاں، قوماں تے اہلِ زبان ہِن۔
16
۱۶۔ اَتے اوہ 10 سینگ جو توں ڈِٹھے ہَن۔ اوہ تے حیوان اوُں کسبی تھوں نفرت کریسن اوہ اوُں کوُ بےیارومددگار تے ننگا کر ڈیسن اَتے اوُں دا گوشت کھا ویسن تے اوُں کوُ پورے طور تے اَگ نال ساڑ ڈیسن۔
17
۱۷۔ کیوں جو خدا اُنہاں دے دِلاں اِچ سٹیسی کہ اوہ اوُندی راہ تے چلن اَتے جڈاں تائیں خدا دیاں گالہیں پوریاں نہ تھیون اوہ ہک جئیں رائے تے متفق تھی کے اپنی بادشاہی اوُں حیوان کوُ ڈے ڈیسن۔
18
۱۸۔ اوہ عورت جئیں کوُ تُساں ڈِٹھا ہِے وڈا شہر ہِے جو تُساں ڈِٹھا ہِے جو زمین دے بادشاہاں تے حکومت کریندا ہِے۔