1
۱۔ اوہ بندیاں دی وڈی بھیڑ کوُ ڈیکھ کے پہاڑ تے چڑھ گیا وَل جیہڑے ویلے بیٹھ گیا تاں اوندے چیلے اوندے کول آئے۔
2
۲۔ اوہ اپنامنہ کھول کے اُنہاں کوُ تعلیم ڈیون لگا۔
3
۳۔ مبارک ہن اوہ جیہڑے دِل دے غریب ہِن کیوں جو آسمان دی بادشاہی اُنہاں دی ہِے۔
4
۴۔ مبارک ہِن اوہ جیہڑے غم کریندے ہِن کیوں جو اوہ آرام پاسن۔
5
۵۔ مبارک ہِن اوہ جیہڑے حلیم ہِن کیوں جو اوہ زمین دے مالک ہوسن۔
6
۶۔ مبارک ہِن اوہ جیہڑے راستبازی دے بھُکے تے پیاسے ہِن کیوں جو اوہ رَج ویسن۔
7
۷۔ مبارک ہِن او جیہڑے رَحم دِل ہِن کیوں جو اُنہاں تے رَحم کیتا ویسی۔
8
۸۔ مبارک ہِن اوہ جیہڑے پاک دِل ہِن کیوں جو اوہ خدا کو ڈیکھسن۔
9
۹۔ مبارک ہِن اوہ جیہڑے صلح کرینددے ہِن کیوں جو اوہ خدا دے پُتر اکھویسن ۔
10
۱۰۔ مبارک ہِن اوہ جیہڑے نیک نامی دے پاروں ستائے گئے ہِن کیوں جو آسمان دی بادشاہی اُنہاں دی ہِے۔
11
۱۱۔ جڈاں میڈے پاروں لوگ تُہاڈی بے عزتی کریسن تے ستاسن تے اوہ ہر طرح دیاں گندیاں گالہیں تُہاڈے بارے وِچ کریسن تاں تُساں مُبارک ہوسو۔
12
۱۲۔ خوش تھیوؤ تے خوشی نال ٹپو کیوں جو آسمان دے اُتے تُہاڈے کیتے بہوں وڈا اجر ہِے اِیں کیتے کہ بندیاں نے اُنہاں نبیاں کوُ وی جیہڑے تُہاڈے کولوں پہلے ہَن ایویں ای ستایا ہائی۔
13
۱۳۔ تُساں زمین دا لُون ہیوے جیہڑے ویلے لُون دی چَس اوندے وچوں لگی ونجے تاں وَل اوُں کوُں کیڑہی شے نال لُونا کیتا ویسی؟ تاں وَل اوہ کئیں کم دا نہ راہسی سوائے ایندے جو کہ باہر سَٹا ونجے تے جیہڑا لوگاں دے پیراں دے تھلے آوے۔
14
۱۴۔ تُساں دنیا دا نور ہیوے جیہڑا شہر پہاڑ اُتے وسایا گیا ہووے اوہ نہیں لُک سگدا۔
15
۱۵۔ ڈیوا جگا کے ٹوکری دے تھلے نئیں رکھیندے ہتھوں چراغ دان دے اُتے رکھیندِن تاں جو گھر دے وچ ساریاں دے کیتے سوجھلے دا سبب بنے۔
16
۱۶۔ اپنے سوجھلے کوُ بندیاں دے سامنے ایویں چمکن ڈِیو کہ اوہ تُہاڈے نیک کماں کوُ ڈیکھ کے تُہاڈے باپ دی تعریف کرن جیہڑا آسمان تے ہِے۔
17
۱۷۔ ایہہ تُساں کڈائیں وی نہ سمجھائے کہ میں توریت تے نبیاں دیاں کتاباں کوُ منسوخ کرن کیتے آیا ہاں ۔میں تاں اُنہاں کوُ منسوخ کرن کیتے نئیں ہتھوُں اُنہاں کوُ پورا کرن کیتے آیا ہاں۔
18
۱۸۔کیوں جو میں تُہاکوں سچ آدھاا ہاں کہ جڈاں تائیں آسمان تے زمین ٹَل نہ ویسن توریت دا ہِک وی نقطہ یا شوشہ ہرگز ٹل نہ سَگسی جڈاں تائیں سارا کجھ پورا نہ تھی ونجے۔
19
۱۹۔ اِیں پاروں جیہڑا کوُئی انہاں حکماں وچِوں کوئی وی بہوں چھوٹا وی حکم توڑیسی تے جیہڑا ڈوجیہاں کوُں اِیہو کرن دی تعلیم ڈیسی آخر اوہ آسمان دی بادشاہی وِچ نچلے درجے دا سَڈا ویسی پر جیہڑا اُنہاںحکماں دی پیروی کریسی تے اُنہاں حکماں دی تعلیم ڈیسی او آسمان دی بادشاہت وِچ وڈا اَکھواسی ۔
20
۲۰۔ کیوںجو میں تُہاکوں آدھاا ہاں کہ اگر تُہاڈی دین داری فقیہاں تے فریسیاں دی دین داری کولوں وَدھ کہ نہ ہوسی تاں تُساں آسمان دی بادشاہی دے وِچ کڈائیں وی داخل نہ تھی سگسو۔
21
۲۱۔ تُساں سُن چُکے ہو گہ اگلے زمانے ویلے دے وِچ اُنہاں کوُں اکھیا گیا ہا کہ تُساں قتل نہ کرنا تے جیہڑا قتل کریسی اوہ عدالت دی سزا دے لائق ہوسی۔
22
۲۲۔ پر میں تُہاکوُں آدھا ہاں جے کوُئی اپنے بھرا دے نال غصہ کریسی اوہ عدالت دی سزا دے لائق ہوسی اَتے جے کوُئی اپنے بھرا کوُ پاگل آکھسی اوہ وڈی عدالت دی سزا دے لائق ہوسی تے جے کوُئی اپنے بھرا کوُ کملا آکھسی اوہ دوزخ دی اَگ دا حق دار ہوسی۔
23
۲۳۔ ایں پادوں جے تیکوُں قربان گاہ تے اپنا نذرانہ چڑھاندے ویلے یاد آونجے کہ میڈے بھرا کوُ میڈے نال کجھ شکایت ہِے۔
24
۲۴۔ تاں توں قربان گاہ دے اَگے اپنا نذرانہ چھوڑ ڈے اَتے ونج کے پہلے اپنے بھرا دے نال صُلح کر تے وَل آکے اپنا نذرانہ پیش کر۔
25
۲۵۔ جڈاں تائیں تُوں راہ وِچ اپنے مُدعی دے نال ہئیں چھیتی کر تے اوندے نال صُلح کر گھن۔ کڈائیں ایویں نہ تھیوے کہ مُدعی تیکوُ انصاف کرن آلے دے حوالے کر ڈیوے تے انصاف کرن آلا تیکوُ سپاہی دے حوالے کر ڈیوے تاں تُوں قید اِچ سَٹیا ونجیں۔
26
۲۶۔میں تیکوُ سچ آدھا ہاں کہ جڈاں تائیں تُوں ہِک ہِک پیسہ نہ واپس کریسیں اُتھوں کڈائیں وی باہر نہ نکل سگسیں۔
27
۲۷۔تُساں سُن چُکے ہیوے آکھیا گیا ہا کہ زنا نہ کرنا۔
28
۲۸۔ پر میں تُہاکو اے آدھا ہاں بئی جیہڑا کوئی کئیں زنانی وَل گندی اکھ نال ڈیکھسی او اپنے دِل دے وِچ اُندے نال زنا کر گِھنسی۔
29
۲۹۔ اگر تیڈی سجی اَکھ تیڈے کیتے تُھوڈے دا سبب بنے تاں توں اوُں کوُں کڈھ کے دوُر بُھکا سَٹ کیوں جو ایہہ تیڈے کیتے چنگا ہوسی کے تیڈے جسم دا ہِک حصہ کھڈ ڈِتا ونجے اے نہ تھیوے کہ تیڈا سارا جسم جہنم اِچ سَٹیا ونجے۔
30
۳۰۔ اَتے اگر تیڈا سجا ہتھ تیڈی بربادی دا سبب بنے تاں اوُں کوُ کَپ کے اپنے کولوں دوُر بُھکا چھوڑ کیوں جو اے چنگا ہِے کہ تیڈے جسم دا اوہ ٹوٹا جیہڑا وکھرا کیتا گیا ہِے برباد ہووؤن دی وجہ تھوں تیڈا پورا جسم دوزخ دے وِچ نہ سُٹیا ونجے۔
31
۳۱۔ اے وی اکھیا گیا ہا کہ جو کوئی اپنی ذال کوُں چھوڑ ڈیوے تاں اوُں کوُ طلاق نامہ لِکھ ڈیوے ۔
32
۳۲۔ پر میں تُہاکوں آدھا ہاں کہ جے کوئی اپنی ذال کوُں حرام کاری تے بُرے کم کرن تھوں علاوہ کئیں بئی وجہ تھوں چھوڑ ڈیسی تاں اوہ اوُندے کولوں زنا کرویسی تے جیہڑا وی اوُں چھوڑی ہوئی نال ویاہ کریسی او زنا دا مجرم ہوسی۔
33
۳۳۔وَل تُساں اے وی سُن چُکے ہیوے کہ اگلیاں کوں آکھیا گیا ہا کہ کوُڑی قسم نہ کھاوناں بلکہ اپنی قسماں خداوند دے کیتے پوری کرائے۔
34
۳۴۔ پر میں تُہاکوُں آدھا ہاں کہ کڈائیں وی قسم نہ کھاوناں نہ اِی آسمان دی کیوں جو اوہ خدا دا تخت ہِے۔
35
۳۵۔ نہ زمین دی کیوں جو اوہ خدا دے پیر دی چَوکی ہِے۔ تے نہ یروشلیم دی کیوں جو اوہ وڈے بادشاہ دا شہر ہِے۔
36
۳۶۔ نہ اپنے سَر دی قسم کھاونا کیوں جو توں اپنے سَر دا ہِک وال وی چٹا یا کالا نیں کر سگدا۔
37
۳۷۔ بلکہ تیڈا کلام ہاں دی جاہ ہاں تے نہ دی جاہ نہ ہووے کیوں جو اِیں تھوں زیادہ ہِے اوہ گُناہ ہِے۔
38
۳۸۔ تُساں اے سُن چُکے ہیوے جو اے آکھیا گیا ہا کہ اَکھ دے پاروں اَکھ تے ڈَند دے پاروں ڈَند۔
39
۳۹۔ پر میں تُہاکوں اِےآدھا ہاں کہ بُرے دا مقابلہ نہ کرنا بلکہ ایں دے پاروں جے کوئی تُہاڈی ہِک گال دے تھپڑ مارے تاں تُساں ڈوجھی گال وی اوُندے اگے کر ڈیوؤ۔
40
۴۰۔ تے اگر کوُئی تیڈی بےعزتی کر کے تیڈا کُرتا گِھننا چاہوے تاں اوُں کوُ اپنا چولا وی ڈے چھوڑ۔
41
۴۱۔ اَتے جیہڑا کوُئی تیکوُں ہِک میل وگار اِچ گِھن ونجے تاں تُوں اوُندے نال ڈوُمیل لگا ونج ۔
42
۴۲۔ جیہڑا کوئی تیڈےکولوں مَنگے اوُں کوُں ڈے اَتے جیہڑا تیڈے کولوں اُدھارمنگے اوُندے کولوں منہ نہ موڑ۔
43
۴۳۔ تُساں اے وی سُن چُکے ہو کہ اے آکھیا گیا ہائی کہ اپنے گوانڈی دے نال پیا کرو تے اپنے دُشمن تھوں نفرت۔
44
۴۴۔پر میں تہاکوُں اے آدھا ہاں کہ اپنے دُشمناں نال پیار کرو تےجیہڑے تُہاکوُ تنگ کریندِن اُنہاں کیتے دعا کرو۔
45
۴۵۔ تاں جو تُساں اپنے باپ دے پُتر آکھواؤ کیوں جو اوہ آسمان دے اُتے ہِے تے اوہ اپنا سورج چنگے تے بُرے ڈوہاں اُتے چمکیندا ہِے اَتے راستبازاں تے ناراستاں ڈوہاں تے مینہ برساندا ہِے۔
46
۴۶۔ کیونکہ اگر تُساں اُنہاں دے نال ای پیار کریسو جیہڑے تُہاڈے نال پیار کریندِن تاں وَل تُہاے کیتے کیا اَجر ہوسی؟ کیا چونگی گِھنن آلے ایویں نئیں کریندے؟۔
47
۴۷۔ تے اگر تُساں صرف اپنے بھراواں دے نال پیار کرو تاں کیا زیادہ کریندے ہیوے؟ کیا غیر قوماں دے لوگ وی ایویں نہیں کریندے؟۔
48
۴۸۔ اِیں پاروں تہاکوُں کامل ہووناں چاہیدا ہِے جیویں تُہاڈا آسمانی باپ کامل ہِے۔