1
۱۔ اَتے جیہڑے ویلے یسوع ایہہ ساریاں گالہیں ختم کر گِدِن تاں ایویں تھیا کہ اوُں نے اپنے چیلیاں کوُ آکھیا۔
2
۲۔ تُساں جان دے ہیوے کہ ڈوُ ڈیہواراں دے بعد عیدِ فسح ہوسی اَتے ابنِ آدم مصلوب تھیون کیتے پکڑوایا ویسی۔
3
۳۔ اوُں ویلے سردار کاہن تے قوم دے بزرگ کائفا ناں سردار کاہن دے دیوان خانے وِچ جمع تھئے۔
4
۴۔ اَتے مشورہ کیتے کہ یسوع کوُ دھوکے نال قتل کیتے پکڑواؤں۔
5
۵۔ پر آدھے ہَن کہ عید وِچ نئیں۔ ایویں نہ تھیوے کہ لوگاں وِچ بلوا تھی ونجے۔
6
۶۔اَتے جڈاں یسوع بیت عنیاہ وِچ شمعون کوڑھی دے گھر ہا۔
7
۷۔ تاں ہِک تریہمت سنگِ مَرمَر دے عطر دان وِچ بہوں ماہنگا عطر گھِن کے اوُندے کول آئی اَتے جڈاں اوہ ٹُکر کھاون بیٹھے تاں اوُندے سر تے گھت چھوڑے۔
8
۸۔ چیلے ایہہ ڈیکھ کے بہوں ناراض تھئے اَتے آکھن لگے جو ایہہ کِس کیتے ضائع کیتا گئے؟۔
9
۹۔ ایں دے تاں بہوں پیسیاں وِچ ویچیا جا سگدا ہائی تے غریباں دی مدد وی کیتی جا سگدی ہائی۔
10
۱۰۔ یسوع نے ایہہ جان کے اوُنہاں کوُ آکھیا کہ ایں تریہمت کوُ کیوں تنگ کریندے ہیوے؟ اِیں نے تاں میڈے نال چنگائی کیتی ہِے۔
11
۱۱۔ کیوں جوغریب غُربا تاں ہمیشہ تُہاڈے کول ہِن پر میں تُہاڈے کول ہمیشہ نہ راہساں۔
12
۱۲۔ اَتے اِیں نے تاں میڈے دفن دی تیاری کیتے ایہہ عطر میڈے بدن تے سٹیا ہِے۔
13
۱۳۔ میں تُہاکوُ سچ آدھا ہاں کہ ساری دُنیا وِچ جتھاں کتھائیں وی اِیں خوشخبری دی مُنادی کیتی ویسی ایہہ وی جیہڑا اِیں نے میڈے نال کیتے اِیں دی یادگاری وِچ آکھیا ویسی۔
14
۱۴۔ اوُں ویلے اُنہاں بارہ وِچوں ہِک نے جیندا ناں یہوداہ اسکریوتی ہا اوُں نے کاہناں دے کو ونج کے آکھے کہ۔
15
۱۵۔ اگر میں اوُں کوُ تُہاڈے حوالے کرا ڈیواں تاں میکوُ کیا ڈیسو؟ اُنہاں نے اوُں کوُ تریہہ روپئے تول کے ڈے ڈِتے۔
16
۱۶۔ اِتے اوہ اوُں ویلے تھوں ہی اوُں کوُ پکڑواون دا موقع گولن لگا۔
17
۱۷۔ وَل عیدِ فطیر دے پہلے ڈیں چیلیاں نے یسوع دے کول آ کے آکھیا توں کِتھاں چاہندا ہئیں جو اساں تیڈے کیتے فسح کھاون دی تیاری کروں؟۔
18
۱۸۔ اوُں نے آکھے شاہر اِچ فلاں بندے دے کول ونج کے اوُں کوُ اکھائے اُستاد فرماندے کہ میڈا ویلہ نیڑے ہِے۔ میں اپنے چیلیاں دے نال تیڈے گھر عیدِ فسح کریساں۔
19
۱۹۔ اَتے جیویں یسوع نے چیلیاں کوُ حکم ڈِتا ہا اُنہاں نے اوُں وے ہی کیتے اَتے فسح تیار کیتی۔
20
۲۰۔ وَل جڈاں شام تھئی تاں اوہ بارہ چیلیاں دے نال کھانا کھاون کیتے بیٹھا ہا۔
21
۲۱۔ اَتے جڈاں اوہ کھاندے پئے ہَن تاں اوُں نے آکھے میں تُہاکو سچ آدھا ہاں تُہاڈے وِچوں ہِک میکوُ پکڑواسی۔
22
۲۲۔ اوہ بہوں اُداس تھی گئے تے ہر ہِک اوُں کوُ آکھن لگااَے خداوند کیا میں ہاں؟۔
23
۲۳۔ اوُں نے جواب وِچ آکھیا جئیں نے میڈے نال تھال اِچ ہتھ پاتے اوُہو میکوُ پکڑویسی۔
24
۲۴۔ ابنِ آدم تاں جھیویں اوُندے حق وِچ لکھے ویندا ای ہِے پر اوُں بندے تے افسوس جیندے وسیلے نال اِبنِ آدم پکڑوایا ویندے! اگر اوہ بندہ جمدہ ای ناں تاں اوُندے کیتے چنگا تھیوے ہا۔
25
۲۵۔ اوُں سے پکڑواون آلے یہوداہ نے جواب وِچ آکھیا اَے ربی(استاد) کیا میں ہاں؟ اوُں نے اوُں کوُ آکھیا توں آپ آکھ چھوڑے۔
26
۲۶۔ جیہڑے ویلے اوہ کھاندے پئے ہَن تاں یسوع نے روٹی گِدی تے برکت ڈے کے توڑی اَتے چیلیاں کوُ ڈے کے آکھیا گھِنو کھاؤ۔ ایہہ میڈا بدن ہے۔
27
۲۷۔ وَل پیالہ گھِن کے شکر کیتے اَتے اُنہاں کوُ ڈے کے آکھیا تُساں سارے ایں دے وِچوں پیو۔
28
۲۸۔ کیوں جو ایہہ میڈا اوہ عہد دا خون ہِے جیہڑا بہوں لوگاں دے گناہاں کیتے وہایا ویندا ہِے۔
29
۲۹۔ وَل میں تُہاکوُ آدھا ہاں کہ انگور دا ایہہ شیرہ وَل کڈائیں نہ پیساں۔ اوُں ڈیں تائیں کہ تُہاڈے نال اپنے باپ دی بادشاہی وِچ نواں نہ پیواں۔
30
۳۰۔ اوہ تعریف دے گیت گا چُکے تاں زیتون دے پہاڑ تے لگے گئے۔
31
۳۱۔ اوُں ویلے یسوع نے اُنہاں کوُ آکھیا تُساں اَج دی رات میڈے پاروُں تھُڈا کھاسو کیوں جو لکھا لاتھے کہ میں آجڑی کوُ مریساں اَتے بھیڈاں کھنڈی ویسن۔
32
۳۲۔ پر میں اپنے جی اُٹھن دے بعد تُہاڈے تھوں پہلے گلیل کوُ ویساں۔
33
۳۳۔ پترس نے جواب اِچ اوُں کوُ آکھیا سارے تیڈے پاروں تھُڈا کھاسن پر میں کڈائیں تھُڈا نہ کھاساں۔
34
۳۴۔ یسوع نے اوُں کوُ آکھیا میں تیکوُ سچ آدھا ہاں کہ اَج دی رات کُکڑ دے بانگ ڈیون کولوں پہلے تُوں ترئے وار میڈا انکار کریسیں۔
35
۳۵۔ پطرس نے اوُں کوُ آکھیا اگر تیڈے نال میکوُ مرنا وی پوئے تاں وی تیڈا انکار ہر گز نہ کریساں اَتے سارے چیلیاں نے وی ایں وی ای آکھیا۔
36
۳۶۔ اوُں ویلے اُنہاں دے نال گتسمنی ناں دی ہِک جاہ تے آیا اَتے اپنے چیلیاں کوُ آکھن لگا اِتھائیں بیٹھے راہوائے جڈاں تائیں کہ میں اُتھاں ونج کے دعا منگ گھِناں۔
37
۳۷۔ وَل اوہ پطرس تے زبدی دے ڈوہاں پُتراں کوُ نال گھِن کے بہوں غمگین تے بیقرار تھیون لگا۔
38
۳۸۔ اوُں ویلے اوُں نے اُنہاں کوُ آکھیا میڈی جان بہوں غمگین ہِے۔ اِتھوں تائیں جو مرن تائیں پہنچ گیا ہاں۔ تُساں اِتھاں رُکو تے میڈے نال جاگدے راہوو۔
39
۳۹۔ وَل ذرا اَگے وادھ کے مُنہ دے بھار ڈھیہ پیا تے ایویں دعا کیتی کہ اَے میڈے باپ! اگر تھی سگے تاں ایہہ پیالہ میڈے کولوں ہٹا گھِن۔ تاں وی جیویں توں چاہندا ہئیں اوُں ای تھیوے نہ کہ جیویں میں چاہندا ہاں۔
40
۴۰۔ وَل چیلیاں دے کول آکے اُنہاں کوُ نیندر اِچ ڈِٹھا اَتے پطرس کوُ آکھن لگا کیا تُساں میڈے نال ہِک گھڑی وی نہ جاگ سگے؟۔
41
۴۱۔جاگو تے دعا منگو تاں جو آزمائش اِچ نہ پووو۔ روح تاں مضبوط ہِے پر جسم کمزور ہِے۔
42
۴۲۔ وَل دوبارہ اوُں نے وَنج کے ایویں دعا کیتی کہ اَے میڈے باپ! اگر اَے میڈے پئے بغیر نئیں ٹل سگدا تاں تیڈی مرضی پوری تھیوے۔
43
۴۳۔ اَتے آ کے اُنہاں کوُ ولا نیندر اِچ ڈِٹھا کیونکہ اُنہاں دیاں اکھیاں نیندر نال بھریا ہویا ہَن۔
44
۴۴۔ اوُ اُنہاں کوُ چھوڑ کے وَل لگا گیا اَتے وَل اوہو گالھ آکھ کے تریجھی وار دعا منگی۔
45
۴۵۔ وَل چیلیاں دے کول آ کے اُنہاں کوُ آکھیا ہُن سُتے راہو اَتے آرام کرو۔ ڈیکھو ویلہ آ پہنچے ا۔تے ابنِ آدم گناہگاراں دے حوالے کیتا ویسی۔
46
۴۶۔ اُٹھو جُلوںُ۔ ڈیکھو میڈا پکڑواون آلا نیڑے آ پہنچے۔
47
۴۷۔ اوہ ایہہ آدھا ہی پیا ہا کہ یہوداہ جیہڑا اُنہاں بارہ وِچوں ہِک ہا آیا تے اوُں دے نال ہِک وڈی بِھیڑ تلواراں تے ڈنڈے چا کے کاہناں تے قوم دے بزرگاں دی طرفوں آ پہنچی۔
48
۴۸۔ اَتے اوُں سے پکڑواون آلے نے اُنہاں کوُ ایہہ نشان ڈِتا ہا کہ جیندا میں مُنہ چُمساں اوہو ہوسی۔ اوُں کوُ پکڑ گھِنائے۔
49
۴۹۔ جلدی نال اوہ مسیح دے کول آیا تے آکھیا اَے ربی سلام اے آکھ کے اوُندا منہ چُومیا۔
50
۵۰۔ یسوع نے اوُں کوُ آکھیا سنگی جیہڑے کم کوُ توں آیا ہئیں اوہ کر۔ ایں تے اُنہاں نے کول آکے یسوع تے ہتھ گھتا تے اوُں کوُ پکڑ گِدے۔
51
۵۱۔ اَتے ڈیکھو یسوع دے چیلیاں وِچوں ہِک نے ہتھ ودھایا تے اپنی تلوار نال سردار کاہن دے نوکر دا کَن کَپ چھوڑیا۔
52
۵۲۔ یسوع نے اوُں کوُ آکھیا اپنی تلوار کوُ اپنی میان اِچ کر گھِن کیونکہ جیہڑے تلوار چیندِن اوہ سارے تلوار نال قتل کیتے ویسن۔
53
۵۳۔ کیا تیکوُ سمجھ نئیں آندی کہ میں اگر اپنے باپ دی منت کراں تاں اوہ فرشتیاں دے بارہ تُمن کولوں زیادہ میڈے کول اِیں ویلے ای بھیج ڈیسی؟۔
54
۵۴۔ پر اوہ جو لکھیا لاتھے اوہ کیویں پورا تھیسی۔
55
۵۵۔ اوُں ویلے یسوع نے بِھیڑ کوُ آکھیا کیا تُساں تلواراں تے ڈانگاں گھِن کے میکوُ ڈاکوُ آلی کار پکڑن کیتے نکلے ہیوے؟ میں تاں ہر روز ہیکل وِچ بیہہ کے تعلیم ڈیندا ہامی اَتے تپساں میکوُ نئیں پکڑیا۔
56
۵۶۔ پر ایہہ سارا کُجھ ایں کیتے تھیا ہِے کہ نبیاں دیاں کتاباں اِچ لکھیا ہویا پورا تھیوے اوُں ویلے سارے چیلے اوُں کوُ چھوڑ کے بھج گئے۔
57
۵۷۔ اَتے یسوع دے پکڑاوا آلے اوُں کوُ کائفا ناں سردار کاہن کول گھِن گئے جِتھاں فقیہہ تے بزرگ جمع تھئے ہوئے ہَن۔
58
۵۸۔ اَتے پطرس دوُر دوُر اوُں دے پِچھوں پِچھوں سردار کاہن دی عدالت تائیں گیا اَتے اندر ونج کے سپاہیاں دے نال نتیجہ ڈیکھن کوُ بیہہ گیا۔
59
۵۹۔ اَتے سردار کاہن تے سارے صدرِ عدالت آلے یسوع کوُ مار سَٹن کیتے اوُں دے خلاف کوُڑی گواہی گولن لگ پئے ۔
60
۶۰۔ جیہڑے ویلے اُنہاں کوُ نہ مِلی تاں کوُڑے گواہ آئے۔ پر آخر کار ڈوُ گواہاں نے آ کے آکھیا کہ۔
61
۶۱۔ اِیں نے آکھیا ہا میں خدا دے گھر کوُ ڈھا سگدا ہاں اَتے ترئے ڈیہواراں اِچ بنا وی سگدا ہاں۔
62
۶۲۔ اَتے سردار کاہن نے کھڑے تھی کے اوُں کوُ آکھیا تُوں جواب نئیں ڈیندا؟ ایہہ تیڈے خلاف کیا گواہی ڈیندے ہِن؟۔
63
۶۳۔ پر یسوع چُپ ہی ریہا۔ سردار کاہن نے اوُں کوُ آکھیا میں تیکوُ زندہ خدا دی قسم ڈیندا ہاں جو اگر تُوں خدا دا پُتر ہئیں تاں ساکوُ آکھ ڈے۔
64
۶۴۔ یسوع نے اوُں کوُ آکھیا تُوں آپ آکھ چھوڑے بلکہ میں تُہاکوُ آدھا ہاں جو اِیں دے بعد تُساں ابنِ آدم کوُ قادرِ مُطلق دے سجے پاسے بیٹھے تے آسمان دے بدلاں تے آندے ہوئے ڈیکھسو۔
65
۶۵۔ وَل سردار کاہن نے اپنے کپڑے پھاڑے تے آکھیا کہ ایں نے کُفر بکیا ہِے۔ ہُن ساکوُ گواہاں دی کیا ضرورت ہِے؟ ڈیکھو تُساں وی ایہہ کُفر سُنیا ہِے۔ تُساں کیا آدھے ہیوے؟
66
۶۶۔ اُنہاں نے جواب اِچ آکھیا اوہ قتل دے لائق ہِے۔
67
۶۷۔ اُنھاں نے اوُندے مُنہ تے تُھکیا تے اوُں دے مُکے مارے تے بعض لوگاں نے تھپڑ مار کے آکھیا۔
68
۶۸۔ اَے مسیح نبوت نال ساکوُ ڈَس کہ تیکوُ کئیں مارے؟۔ او آکھا مسیح ساٖے کیتے نبوت کر تے چیکوں مارا ھے۔
69
۶۹۔ اَتے پطرس باہروں ڈیوڑھی وِچ بیٹھا ہا کہ ہِک نوکرانی نے اوُں دے کول آ کے آکھیا تُوں وی یسوع گلیلی دے نال ہاویں۔
70
۷۰۔ اوُں نے ساریاں دے سامنے ایہہ آکھ کے انکار چا کیتا کہ میں نئیں جان دا کہ تُوں کیندے بار وِچ آدھی ہئیں۔
71
۷۱۔ اَتے جڈاں اوہ ڈیوڑھی وِچ لگا گیا تاں ڈوجھی نوکرانی نے اوُں کوُ ڈِٹھا اَتے جیہڑے اُتھاں لوگ ہَن اُنہاں کوُ آکھیا ایہہ وی یسوع ناصری دے نال ہا۔
72
۷۲۔ اوُں نے قسم کھا کے وَل انکار کیتے کہ میں اِیں بندے کوُ نئیں جان دا۔
73
۷۳۔ کجھ دیر بعد جیہڑے لوگ اُتھاں کھڑے ہَن اُنہاں نے پطرس دے کول آ کے آکھیا بے شک تُوں وی اُنہاں وِچوں ہئیں کیونکہ تیڈی بولن تھوں وی ظاہر تھیندے۔
74
۷۴۔ وَل اوہ لعنت کرن تے قسم کھاون لگ پیا کہ میں اِیں بندے کوُ نئیں جان دا اوُں ویلے اچانک کُکڑ نے بانگ ڈِتی۔
75
۷۵۔پطرس کوُ یسوع دی اوہ گالھ یاد آئی جیہڑی اوُں نے آکھی ہائی کہ کُکڑ دے بانگ ڈیون کولوں پہلے تُوں ترئے واری میڈا انکار کریسیں اَتے اوہ باہر ونج کے بہوں اوچی اوچی رونا۔