¹ ۱۔اوُں ویلے یسوع نے بِیھڑ نال تے اپنے چیلیاں نال ایہہ گالہیں کیتیاں کہ ² ۲۔ فقیہہ تے فریسی موسیٰ دی کُرسی تے بیٹھے ہِن۔ ³ ۳۔ اوہ جو کجھ تُہاکوُ ڈساون اوہ سارا کجھ کرو اِتے منو پر اُنہاں جئیے کم نہ کرو کیونکہ اوہ آدھے ہِن پر آپ کریندے نئیں۔ ⁴ ۴۔ اوہ اجیہے وڈے بوجھ لوگاں دے مونڈھیاں تھے رکھیندے ہِن جنہاں کو چاونا بہوں اوکھا ہِے اوہ آپ اُٹہاں کو اپنی انگل نال ہلاونا وی نئیں چاہندے۔ ⁵ ۵۔ اوہ اپنے سارے کم بندیاں کوُ ڈِکھاون کیتے کریندے ہِن کیونکہ اوہ اپنے تویت وڈے تے اپنی قمیض دے کنارے چوڑے رکھیندے ہِن۔ ⁶ ۶۔ اَتے دعوتاں وِچ اعلیٰ جاہ تے عبادت خانیاں اِچ اعلیٰ درجے دیاں کُرسیاں۔ ⁷ ۷۔ اَتے بازاراں وِچ سلام تے بندیاں کولوں ربی( اُستاد) اکھوانا پسند کریندے ہِن۔ ⁸ ۸۔ پر تُساں اپنے آپ کوُ ربی (اُستاد) نہ سڈواو کیوں جو تُہاڈا اُستاد ہِک ای ہِے اَتے تُساں سارے بھرا ہیوے۔ ⁹ ۹۔ اَتے زمین تے کئیں کوُ اپنا باپ نہ آکھو کیوں جو تُہاڈا باپ ہِک ای ہِے جیہڑا آسمانی ہِے۔ ¹⁰ ۱۰۔ وَل نہ تُساں ہادی اکھواو کیونکہ تُہاڈا ہادی ہِک ای ہِے یعنی مسیح۔ ¹¹ ۱۱۔ پر جو تُہاڈے وِچوں جیہڑا وڈا ہِے اوہ تُہاڈا نوکر بنے۔ ¹² ۱۲۔ اَتے جو کوُئی اپنے آپ کوُ وڈا بنیسی اوہ نکا کیتا ویسی تے جیہڑا اپنے آپ کوُ نکا بنیسی اوہ وڈا کیتا ویسی۔ ¹³ ۱۳۔ اَے ریاکار فقیہو تے فریسیو تُہاڈے اُتے افسوس! کہ تُساں لوگاں اُتے آسمان دی بادشاہی دے دروازے بندکریندے ہو نہ تاں تُساں آپ داخل تھیندے ہو تے نہ ڈوجھیاں کو جیہڑے داخل تھیونا چاہندِن داخل تھیون ڈیندے ہو۔ ¹⁴ ۱۴۔ (اے ریا کار فقیہو تے فریسیو تُہاڈے تے افسوس! تُساں بیواہ تریمتاں دے گھراں کو ہڑپ کر ویندے ہیوے اَتے ڈِکھاوے کیتے نماز کوُ لمیا کریندے ہیوے۔ ایں وجہ تھوں تُہاکوُ ڈھیر سزا تھیسی)۔ ¹⁵ ۱۵۔ اَے ریاکار فقیہو تے فریسیو تُہاڈے تے افسوس! کہ تساں ہِک مُرید کرن کیتے سمندر پار علاقاں دے وچ ویندے ہیوے اَتے جیہڑے ویلے اوہ مُرید بن ویندےتاں اوُں کوُ اپنے تھوں دوگنا جہنم دا پُتر بنا ڈیندے ہیوے۔ ¹⁶ ۱۶۔ تُہاڈے تے افسو ہیوے جو تُساں اندھے راہ ڈِکھاون آلے ھیوے۔ جو آدھے ہِن کہ اگر کوُئی مَقدِس دی سوں کھاوے تاں کوئی گل نئیں لیکن جیہڑا مَقدِس دے سونے دی سوں کھاوے اوہ اپنی سوں کوُ پورا کرن دا پابند ہوسی۔ ¹⁷ ۱۷۔ تُساں اندھے تے بے وقوف ہیوے کیوں جو وڈا کون ہِے سونا یا مَقدِس جیہڑا سونے کوُ پاک کر یندا ہِے؟۔ ¹⁸ ۱۸۔ تے وَل آدھے ہیوے کہ جو کوئی قربان گاہ دی سوں کھاوے تاں کوئی گالھ نئیں لیکن جیہڑا نذرانے دی سوں کھاوے تاں اوُں کوُ پورا کرے جیہڑا اِیں قربان گاہ تے چڑھایا ویندا ہِے۔ ¹⁹ ۱۹۔ اے اندھو وڈا کون ہَے نذرانہ یا قُربان گاہ جیہڑی نذرانے کوُ پاک کریندی ہَے۔ ²⁰ ۲۰۔پس جیہڑا قربان گاہ دی سوں کھاندا ہِے اوہ اُنہاں سارایاں شیئاں دی سوں کھاندا ہِے جیہڑیاں اوُندے اُ تے چڑھایاں ویندیاں ہِن۔ ²¹ ۲۱۔ اَتے جیہڑا مَقدِس دی سوں کھاندا ہِے اوہ اوندی جیہڑا اوُندے وِچ رہندا ہِے اوُندی سوں کھاندا ہِے۔ ²² ۲۲۔ اَتے وَل جیہڑا کوُئی آسمان دی سوں کھاندا ہِے اوہ خدا دے تخت دی تے جیہڑا اوُندے تے بیٹھے اوُں دی سوں کھاندے۔ ²³ ۲۳۔ اے ریا کار فقیہو تے فریسیو تُہاڈے تے افسوس! کہ تُساں پودینہ تے سونف تے زیرے تے دَہ یکی ڈیندے ہیوے پر تُساں شریعت دے بہوں خاص گالہیں دے وِچ یعنی اِنصاف تے رَحم تے ایمان کو چھوڑ ڈِتا ہِے۔ ضروری ہا جو تُساں اے وی کریندے تے اوہ وی نہ چھوڑیندے۔ ²⁴ ۲۴۔ اَے اندھے راہ ڈساون آلیو جیہڑے مچھر کوُ تاں چھان گھِندے وے اَتے اُٹھ کوُ نگل ویندے ہیوے۔ ²⁵ ۲۵۔ اَے ریاکار فقیہو تے فریسیو تُہاڈے تے افسوس! کہ تُساں پیالے تے چنگیر کوُ باہروں صاف کر یندے ہیوے پر اوہ اندروُں لُٹ دے لالچ دے بھرے ہوئے ہِن۔ ²⁶ ۲۶۔ اِے اَندھے فریسیو پہلے پیالے تے چنگیر کوُ اندروُں صاف کرو تاں جو اوہ اُتوں وی صاف تھی ونجے۔ ²⁷ ۲۷۔ اَے ریاکار فقیہو تے فریسیو تُہاڈے تے افسوس! کہ تُساں چٹیاں قبراں دی کار ہیوے جیہڑیاں باہروں تاں سوہنیاں ڈ ِکھائی ڈیندیاں ہِن پر اندروُں موئے ہوئے بندیاں دی ہڈیاں تے ہر طرح دی پلیتی نال بھریاں ہِن۔ ²⁸ ۲۸۔ ایویں ای تُساں وی ظاہر تاں لوگاں کوُ ڈِکھاون کیتے چنگے بن دے ہیوے پر اندروُں ریاکاری تے بے دینی نال بھرےہوئے ہیوے۔ ²⁹ ۲۹۔ اِے ریاکار فقیہو تے فریسیو تُہاڈے تے افسوس! کہ تُساں نبیاں دیاں قبراں بناندے ہیوے اَتے نیک لوگاں دے مزاراں کوُ سجاندے ہیوے۔ ³⁰ ۳۰۔ اَتے آدھے ہیوے کہ اگر اساں اپنے پیو ڈاڈے دے زمانے وچ ہووں ہا تاں نبیاں دے خون بہاون وِچ اُنہاں دے نال شریک نہ ہوؤں ہا۔ ³¹ ۳۱۔ اِیں طرح تُساں اپنے خلاف آپ گواہی ڈیندے ہیوے کہ تُساں نبیاں قتل کرن آلیاں دے پُتر ہیوے۔ ³² ۳۲۔ اَتے تُساں اپنے پیو ڈاڈے دی کار کریندے ہیوے ۔ ³³ ۳۳۔ اَے نانگو! اِے افعی دے بالو! تُساں جہنم دی سزا تھوں کیویں بچ سگدے ہیوے؟۔ ³⁴ ۳۴۔ اِیں پاروُں ڈیکھ میں نبیاں تے فقیہاں کوُ تُہاڈے کول بھجیندا ہاں۔ اُنہاں دے وِچوں تُساں کجھ کوُ قتل تے مصلوب کریسو اَتے کجھ کوُ اپنے عبادت گاہواں وِچ کوڑے مریسو اَتے وَل شہر بہ شہر ستاندے پھرسو۔ ³⁵ ۳۵۔ تاں جو سارے راستبازاں دا خون جیہڑا زمین تے وگایا گیا ہِےتُہاڈے تے آسی۔ راستباز ہابل دے خون تھوں گھِن کے برکیا دے پُترزکریا دے خون تائیں جینکوُں تُساں مَقدِس تے قربان گاہ دے وِچ قتل کیتا ہا۔ ³⁶ ۳۶۔ میں تُہاکوُ سچ آدھا پیا ہاں جو ایہہ سارا کجھ ایں زمانے دی نسل تے آسی۔ ³⁷ ۳۷۔ اَے یروشلیم! اَے یروشلیم! توں جو نبیاں کوُ قتل کریندا اَتے جو تیڈے کول گگھلے گئے اُنہاں کوُ سنگسار کریندا ہئیں! کئی واری میں سوچے کہ جیویں کُکڑی اپنے بالاں کوُں اپنے پراں دے تھلے لُکا گھِندی ہِے تُہاکوُ وی اوُں ویں ای لُکا گھنِاں پر تُساں نئیں چاہندے!۔ ³⁸ ۳۸۔ ڈیکھو تُہاڈا گھر تُہاڈے کیتے ویران چھوڑا ویندے۔ ³⁹ ۳۹۔ کیونکہ میں تُہاکوُ آدھا ہاں کہ ہُن تُساں میکوُں اوُں ویلے تائیں نہ ڈیکھسو جڈاں تائیں تُساں ایویں نہ آکھسو کہ مُبارک ہِے اوہ جیہڑا خداوند دے ناں تھوں آندا ہِے۔