¹ ۱۔ یسوع وَلا اُنہاں کوُ مثالاں دے وِچ آکھن لگا کہ ۔ ² ۲۔ آسمان دی بادشاہی اوُں بادشاہ دی کار ہِے جئیں اپنے پُتر دی شادی کیتی۔ ³ ۳۔ اوُں نے اپنے نوکراں کو گھلیا کہ اُنہاں لوگاں کوُ سڈو جیہڑے شادی دی دعوت وِچ سڈے گئے ہِن پر اوہ لوگ نہ آئے۔ ⁴ ۴۔ وَل بادشاہ نے بئے نوکراں کو حکم ڈِتا تے آکھیا کہ جیہڑے سڈے گئے ہَن اُنہاں کوُ ڈَسو کہ ڈیکھو میں اپنا کھانا تیار کر گِدا ہِے۔ میڈے ڈاند تے موٹے موٹے جانور ذبح تھی چُکے ہِن اَتے سارا کجھ تیار ہِے۔ شادی وِچ آؤ۔ ⁵ ۵۔ پر اوُں لوگاں نے اوُندی دعوت دی پرواہ نہ کیتی کجھ اپنے کھیتِاں وِچ لگے گئے تے ڈوجھے اپنے کماں کو لگے گئے۔ ⁶ ۶۔ جیہڑے باقی ہَن اوُنہاں نے بادشاہ دے نوکراں کو ماریا تے بُری طرح پیش آۓ تے اُنہاں کوُ قتل کیتے۔ ⁷ ۷۔ بادشاہ بہوں غصے وِچ آگیا تے اوُں نے اپنی فوج گھل کے اوُنہاں قاتلاں کوُ ہلاک چا کیتے تے اوُنہاں دے شاہر کوُ بھا لا ڈِتی۔ ⁸ ۸۔ وَل اوُں نے اپنے نوکراں کو آکھیا شادی دی دعوت تاں تیار ہِے پر سڈے ہوے لوگ اِیں قابل نہ ہَن۔ ⁹ ۹۔ تے تُساں رستیاں دے ناکیاں تے ونجو اَتے جتنے تُہاکوُ مِلن شادی بدی وِچ گھِن آؤ۔ ¹⁰ ۱۰۔اَتے اوہ نوکر باہر چوکاں وچ گئے تے کیا بُرے تے کیا بھلے ساریاں کوُ جمع کر کے گھِن آئے تے شادی دی محفل مہماناں نال بھریج گئی۔ ¹¹ ۱۱۔ اَتے جیہڑے دیلے بادشاہ مہمانان کوُں ڈیکھن کیتے اندر آیا تاں اوُں نے اُتھاں ہِک بندہ ڈِٹھا جیہڑا شادی دے کپڑیاں وِچ نہ ہا۔ ¹² ۱۲۔ بادشاہ نے اوُں کولوں پُچھیا میاں توُں اِتھاں شادی دے کپڑیاں دے بغیر کیویں آ گیا ہئیں؟ پر او بندہ کوئی جواب نہ ڈے سگا۔ ¹³ ۱۳۔ وَل بادشاہ نے اپنے لوگاں کوں آکھیا اِیں بندے دے ہتھ تے پیر بَدھ کے اِیں کوُ باہر اَندھارے وِچ سَٹ ڈیوو اُتھاں رؤناں تے ڈنداں دا پیسناں ہوسی۔ ¹⁴ ۱۴۔ کیونکہ سڈے ہوئے تاں بہوں ہِن پر الگ کیتے ہوئے تھوڑے ہِن۔ ¹⁵ ۱۵۔ اوُں ویلے فریسی گئے تے مشورہ کرن لگے کہ یسوع مسیح کوُ کیویں اوندیاں گالہیں وِچ پھنسایا ونجے۔ ¹⁶ ۱۶۔پس اُنہاں نے اپنے چیلیاں کوُں ہیرودیوں دے کول گھلیا اَتے اُنہاں نے یسوع کو آکھیا اَے اُستاد اَساں جان دے ہئیں کہ تُوں سچا ہِیں اَتے سچائی دے نال خدا دی راہ دی تعلیم ڈیندا ہِیں اَتے کئیں دی پرواہ نئیں کریندا کیونکہ تُوں کئیں بندے دا طرفدار نئیں۔ ¹⁷ ۱۷۔ اِیں کیتے ساکوُ ڈسا۔ توں کیا سوچندا ہِیں جو قیصر کوُ جزیہ ڈیونا قانون دے مطابق ہِے یا نئیں؟۔ ¹⁸ ۱۸۔ یسوع اُنہاں دی مکاری کوُ سمجھ گیا تے وَل آکھیا اَے ریا کارو تُساں میکوُں کیوں آزماندے ہیوے؟۔ ¹⁹ ۱۹۔ جزیے دا سکہ میکوُ ڈِکھاؤ۔ اوہ ہِک دینار اوُں دے کول گِھن آئے۔ ²⁰ ۲۰۔ یسوع نے اُنہاں کوُں آکھیا ایندے تے کیندی صورت تے ناں ہِے؟۔ ²¹ ۲۱۔ اُنہاں نے آکھیا کہ قیصر دا۔ وَل یسوع نے اُنہاں کوُ آکھیا کہ جیہڑا قیصر دا ہِے اوہ قیصر کوُ اَتے جیہڑا خدا دا ہِے اوہ خدا کو ڈیوؤ۔ ²² ۲۲۔ اُنہاں نے اِے سنیا تے بہوں حیران تھئے تے اوُں کوُں چھوڑ کے لگے گئے۔ ²³ ۲۳۔ اوُں ڈینہ صدوقی اوُندے کول آئے جیہڑے آدھے ہَن کہ قیامت نہ تھیسی اَتے اوُندے اگے ایہہ سوال چا کیتا کہ۔ ²⁴ ۲۴۔ اَے اُستاد موسیٰ بنی نے آکھیا ہا کہ جو اگر کوُئی بے اولاد مَر ونجے تاں اوُندا بھِرا اوُندی ذال دے نال ویاہ کرے اَتے اوہ اپنے بِھرا دے کیتے نسل پیدا کرے۔ ²⁵ ۲۵۔ ساڈے وِچ سَت بِھرا ہَن پہلے نے شادی کیتی تے اوہ مَرگیا اَتے پاروں کہ اوُندی اولاد نہ ہِے اپنی ذال اپنے بِھرا کیتے چھوڑ گیا۔ ²⁶ ۲۶۔ ول ڈوجھے بِھرا نے وی ایویں اِی کیتا تریجھے کولوں چل کے ستاں بِھراواں تک سارے بِھراواں نے ایویں کیتا۔ ²⁷ ۲۷۔ وَل اُنہاں ساریاں دے اخیر دے وِچ اوہ تریہمت وی مرگئی۔ ²⁸ ۲۸۔ اوہ قیامت وِچ اُنہاں ساریہاں وِچوں اوہ کیندی ذال ہوسی؟ کیوں جو اوُں نے ساریاں دے نال ویاہ کیتا ہا۔ ²⁹ ۲۹۔ یسوع نے جواب اِچ اُنہاں کوُ آکھیا تُساں گمراہ ہیوے اِیں کیتے کہ نہ کتابِ مُقدس کوُ جان دے ہیوے نہ خدا دی قدرت کوُ۔ ³⁰ ۳۰۔کیونکہ قیامت آلے ڈینہ نہ تاں کوُئی شادی ہوسی نہ ناں اوہ ڈینہ کوُئی شادی دے بندھن وِچ بدھا ویسی بلکہ لوگ آسمان تے فرشتیاں دی کار ہوسن۔ ³¹ ۳۱۔ پر مُردیاں دے وِچوں جی اُٹھن دے بارے وچ خدا نے تُہاکوُ جو فرمایا ہِے کیا تُساں اوہ نئیں پڑھیا کہ۔ ³² ۳۲۔ میں تاں ابراہام دا خدا تے اضحاق دا خدا تے یعقوب دا خدا ہاں؟ اوہ تاں مُردیاں دا خدا نئیں بلکہ زندیاں دا خدا ہِے۔ ³³ ۳۳۔ لوگ ایہہ سُن کے اوُندی تعلیم تھوں بہوں حیران تھئے۔ ³⁴ ۳۴۔ وَل جیہڑے ویلے فریسیاں نے سُنیا کہ یسوع نے صدوقیاں کوُ چُپ کرا چھوڑے تاں اوہ اکٹھےتھی گئے۔ ³⁵ ۳۵۔ اَتے اُنہاں دے وِچوں ہِک عالم دین ہا اوہ اوُں کوُ آزماون کیتے اوُں دے کولوں پُچھیا۔ ³⁶ ۳۶۔ اِے اُستاد توریت دے وِچ ساریاں تھوں وڈا حکم کیہڑا ہِے۔ ³⁷ ۳۷۔ یسوع نے اوُں کوُ آکھیا کہ خداوند اپنے خدا دے نال اپنے سارے دِل تے اپنی ساری جان تے اپنی ساری عقل دے نال محبت رکھ۔ ³⁸ ۳۸۔ اِیہو سب تھوں وڈا تے پہلا حکم ہِے۔ ³⁹ ۳۹۔ اَتے ڈوجھا حکم ایں طرح دا ہے کہ اپنے گواہنڈی دے نال اپنی جیہی محبت رکھ۔ ⁴⁰ ۴۰۔ اِنہاں ڈوُہاں حکماں دے اُتے توریت تےانبیا دی کتاباں دا قیام ہِے۔ ⁴¹ ۴۱۔ اَتے جیہڑے ویلے فریسی جمع تھئےتاں یسوع نے اُنہاں کولوں پُچھیا۔ ⁴² ۴۲۔ کہ تُساں مسیح دے بارے وِچ کیا سمجھدے ہیوے؟ اوہ کیندا پُتر ہِے؟اُنہاں نے اوُں کوُ آکھیا داؤد دا۔ ⁴³ ۴۳۔ یسوع نے اُنہاں کوُں آکھیا وَل کیویں داؤد روح دی ہدایت نال یسوع کوُ خداوند آدھے کہ۔ ⁴⁴ ۴۴۔ خداوند نے میڈے خداوند کوُ آکھے میڈی سجے پاسے بیہ جڈاں تائیں میں تیڈے دشمناں کوُ تیڈے پیراں دے ہیٹھ نہ کر چھوڑاں۔ ⁴⁵ ۴۵۔ پس جڈاں داؤد مسیح کوُ خداوند آدھے تاں اوہ اوُں دا پُتر کیویں تھی سگدے؟۔ ⁴⁶ ۴۶۔ اَتے کوُئی وی اوُندے جواب اِچ ہِک لفظ نہ آکھ سگے اَتے نہ اوُں ڈینہ دے بعد اوُندے کولوں کوُئی وی سوال کرن دی جرت نہ کیتی۔