¹ ۱۔ وَل جیہڑے ویلے اوہ یروشلیم دے نیڑے پہنچے تے زیتون دے پہاڑ تے بیت فگے دے نیڑے آئے تاں یسوع نے ڈو چیلیاں کوُں ایہہ آکھ کے گھلیا کہ۔ ² ۲۔ اپنے سامنے دے پنڈ وچ ونجو۔ اُتھاں پہنچدے ہی ہک کھوتی بدھی ہوئی تے اوندے نال کھوتی دا بچہ پاسو اوُں کوُ کھول کے میڈے کول گھن آؤ۔ ³ ۳۔ اَتے اگر کوُئی تُہاکوُ آکھے تاں آکھوائے کہ خداوند کوُ ایندی ضرورت ہے۔ اوہ جلدی نال اُنہیں کوُ بھیج ڈیسی۔ ⁴ ۴۔ اے ایں کیتے تھیا کہ جو کجھ نبی دی رائیں آکھیا گیا ہا اوہ پُورا تھیوے کہ۔ ⁵ ۵۔ صیون دی دھی کوُ آکھو کہ ڈیکھ تیڈا بادشاہ تیڈے کول آندا ہِے۔ اوہ حلیم ہِے تے گڈھاں تے سوارہے بلکہ لادو دے بچے تے۔ ⁶ ۶۔ وَل چیلاں نے ونج کے جیوں یسوع نے اُنہاں کوُ حکم ڈِتا ہا اوں ویں ہی کیتا۔ ⁷ ۷۔ وَل کھوتی تے اوندے بچے کو گھن کے اپنے کپڑے اوندے تے سٹے اَتے اوہ اوندے تے بیہ گیا۔ ⁸ ۸۔ اَتے بِھیڑ وِچوں بہوں سارے بندیاں نے اپنے کپڑے راہ وِچ وچھائے تے کئی لوگاں نے رُکھاں توں ڈالیاں کٹ کے راہ وِچ پھیلا ڈِتیاں۔ ⁹ ۹۔ اَتے بِھیڑ جو اوندے اگوں اگوں ویندی تے پچھوں پچھوں لگی آندی ہا چلا چلا کےآدھی ہائی کہ ابنِ داؤد کوُ ہوشعنا مبارک ہے اوہ جیہڑا خداوند دے ناں تھوں آندہ پئے۔ عالمِ بالا تے ہوشعنا۔ ¹⁰ ۱۰۔ وَل جیہڑے ویلے اوہ یروشلیم وِچ داخل تھیا تاں سارے شاہر اِچ ہلچل پے گئی تے لوگ آکھن لگے ایہہ کون ہے؟۔ ¹¹ ۱۱۔ بِھیڑ دے لوگان نےاکھیا ایہہ گلیل دے ناصرت دا نبی یسوع ہے۔ ¹² ۱۲۔ یسوع نے خدا دی ہیکل وِچ داخل تھی کے اُنہاں ساریاں کوُں کڈھ ڈِتا جیڑے ہیکل وِچ کاروبار کریندے پے ہن تے صرافاں دے تختے تے کبوتر ویچن آلیاں دیاں چوکیاں اُلٹ ڈِتیاں۔ ¹³ ۱۳۔ تے اُنہاں کوُں آکھیا کہ میڈا گھر دُعا دا گھر ہوسی پر تُساں اِیں کوُں ڈاکواں دی غار بنا چھوڑے۔ ¹⁴ ۱۴۔ وَل اندھے تے لنگرے ہیکل وِچ اوندے کول آئے تے اوُں نے اُنہاں کوُں چنگا کیتا۔ ¹⁵ ۱۵۔ پر جیہڑے ویلے سردار کاہناں تے فقیہاں نے اوندے عجیب کماں کوُں جیہڑے اوُن کیتےہَن تے چھواراں کوُں ہیکل وِچ ابنِ داؤد کوُں ہوشعنا آدھاے ہوئے ڈِٹھا تاں غصے تھی کے اوکوں آکھن لگے۔ ¹⁶ ۱۶۔ توں سُندا ہئیں جو ایہہ کیا آدھنِ یسوع نے جواب اِچ اُنہاں کوُ آکھیا ہاں۔ کیا تُساں ایہہ کِڈایں نئیں پڑھیا کہ بالاں تے کھیر پیون آلیاں دے مُنہ تھوں تُوں حمدکوُ کامل کراےَ؟۔ ¹⁷ ۱۷۔ وَل اوہ اُنہاں کو چھوڑ کے شاہر کولوں باہر بیت عنیاہ اِچ لگا گیا تے رات کوُں اُتھایں ریہا۔ ¹⁸ ۱۸۔ اَتے جیہڑے ویلے سویر تھئی تاں اوہ شاہر کوُ ویندا پیا ہا تاں اوُں کوُ بُھک لگی۔ ¹⁹ ۱۹۔ اَتے راہ دے کنارے انجیر دا ہک رُکھ ڈیکھ کے اوُندے کول گیا تے پتیاں دے سِوا اوُندے تے کُجھ نہ ہا ایہہ ڈیکھ کے آکھے جو ہُن تھوں تیڈے کڈائیں پھل نہ لگیسی اَتے اوہ انجیر دا رُکھ اوُں ویلے ای سُک گیا ۔ ²⁰ ۲۰۔ چیلاں نے اے ڈیکھ کے تعجب کیتا تے آکھیا اے انجیر دا رُکھ کینویں ہک دَم ُسک گئے!۔ ²¹ ۲۱۔ یسوع نے جواب وِچ اُنہاں کوُ آکھیا میں تُہاکوُ سچ آدھا ہاں جو اگر ایمان رکھو تے شک نہ کرو تاں نہ صرف اُوہو کریسو جو کجھ انجیر دے رُکھ نال تھئے بلکہ اگر اِیں پہاڑ کو آکھ سو کہ تُوں اُکھڑ ونج تے سمندر اِچ جا ڈیہہ تاں ایں وے ای تھیسی۔ ²² ۲۲۔ اَتے جو کُجھ دُعا اِچ ایمان نال منگسو اوہ سارا کجھ تُہاکوُں مِلسی۔ ²³ ۲۳۔ جیہڑے ویلے او ہیکل وِچ آکے تعلیم ڈیندا پیا ہا تاں سردار کاہناں تے قوم دے بزرگاں نے اوُندے کول آکےآکھیا تُوں اینہاں کماں کوُں کیندے اختیار نال کریندِیں؟ اَتے ایہہ اختیار تیکُوں کیئیں ڈِتے۔ ²⁴ ۲۴۔ یسوع نے جواب وِچ اُنہاں کوُں آکھیا میں وی تُہاڈے کولوُں ہک گالھ پُچھدا ہاں۔ اگر اوہ میکوُں ڈیسسو تاں وَل میں وی تُہاکوُں ڈسیساں کہ اِنہاں کماں کوُں کیندے اختیار نال کرینداں ہاں۔ ²⁵ ۲۵۔ یوحنا دا بپتسمہ کیندی طرفوں ہائی؟ آسمان دی طرفوں یا بندیاں دی طرفوں؟ اوہ آپس وِچ آکھن لگے کہ اگر اساں آدھے ہئیں کہ آسمان دی طرفوں تاں اوہ ساکوُ آکھسی تے وَل کیوں تُساں یقین نہ کیتا؟ ²⁶ ۲۶۔پر گر آکھوں بندیاں دی طرفوں تاں وَل لوگاں کولوں ڈردے ہئیں کیونکہ سارے یوحنا کوُ نبی جان دے ہِن ²⁷ ۲۷۔ اُنہاں نے جواب وِچ یسوع کوُ آکھیا اَساں نئیں جان دے۔ یسوع نے وی اُنہاں کوُ آکھیا کہ میں وی تُہاکوُ نئیں ڈٖسیندا کہ اِنہاں گالہیں کوُ کیندے اختیار دے نال کریندا ہاں۔ ²⁸ ۲۸۔ ُتساں کیا سمجھدے ہیوے؟ ہِک بندے ڈے ڈوُ پُتر ہَن۔ اوُ ں نے پہلے دے کول ونج کے آکھیا پُتر ونج اَج تاکستان (انگوراں دا باغ) وِچ کم کر ²⁹ ۲۹۔ اوُں نے جواب ڈِتا میں نہ ویساں مگر بعد اِچ پچھتا کے لگا گیا۔ ³⁰ ۳۰۔وَل ڈوجھے کول وَنج کے اوُں کوُں وی آکھیا اوُں نے جواب ڈِتا چنگا جناب۔ پر گیا نئیں۔ ³¹ ۳۱۔ اِنہاں ڈوہاں وِچوں کیہڑے نے اپنے پیو دی مرضی کو پورا کیتا؟ اُنہاں نے آکھیا پہلا۔ یسوع نے اُنہاں کوُ آکھیا میں تُہاکوں سچ آدھا ہاں کہ چونگی گھنن آلے تے کسبیاں تُہاڈے کولوں پہلے خُدا دی بادشاہی وِچ داخل تھیندیاں ہِن۔ ³² ۳۲۔کیونکہ یوحنا دینداری دی وجہ تھوں تُہا ڈے کول آیا اَتے تُساں اوُندا یقین نہ کیتا پر چونگی گھنن آلیاں تے کسبیاں نے اوُندا یقین کیتے تے تُساں ایہہ ڈیکھ کے بعد وِچ وی نہ پچھتائے کے اوُندا یقین کر گھن دے۔ ³³ ۳۳۔ ہِک بئی مثال سنو۔ ہِک گھر دا مالک ہا جئیں تاکستان (انگوراں دا باغ ) لایا اَتے اوُندے چاروں پاسے چاردیواری کیتی اَتے اوُندے وِچہِک حوض بنائے تے ہِک بُرج وی بنائے اَتے اوُں کوُ باغباناں کوُ ٹھیکے تے ڈے کے پر دیس لگا گیا۔ ³⁴ ۳۴۔ وَل جیہڑے ویلے پھل دا موسم نیڑے آیا تاں اوُں نے اپنے نوکراں کوُ باغباناں دے کول اپنے باغ دا پھل گھنن کیتے گھلیا۔ ³⁵ ۳۵۔ اِتے باغباناں نے اوُندے نوکراں کوُ پکڑ کےکئیں کوُ مارے تے کئیں کوُ قتل کیتے تے کئیں کوُ سنگسار کیتے۔ ³⁶ ۳۶۔ وَل اوُں نے بئے نوکراں کوُ گھلے جیہڑے پہلے تھوں زیادہ ہَن اَتے اُنہاں نے اُنہاں دے نال وی اوُہو سلوک کیتے ³⁷ ۳۷۔ وَل آخیر وِچ اوُں نے اپنے پُتر کوُ اُنہاں دے کول ایہہ آکھ کے گھلیا کہ اوہ میڈے پُتر دا تے لحاظ کریسن۔ ³⁸ ۳۸۔ جیہڑے ویلے باغباناں نے اوُندے پُتر کوُ ڈِٹھے تاں آپس وِچ آکھے ایہو وارث ہیوئے۔ آؤ ایں کوُ قتل کرکے اِیندی میراث تے قبضہ کر گھِنوں۔ ³⁹ ۳۹۔ اوُں کوُ پکڑ کے باغ وِچوں باہر کڈھے تے قتل کر ڈِتے۔ ⁴⁰ ۴۰۔پس جیہڑے ویلے تاکستان (انگوراں دا باغ ) دا مالک آسی تاں اُنہاں باغباناں دے نال کیا کریسی؟۔ ⁴¹ ۴۱ اُنہاں نے اوُں کوُ آکھیا کہ اُنہاں بدکاراں کو بُری طرح ہلاک کر یسی اَتے باغ دا ٹھیکا ڈوجھے باغباناں کوُ ڈے ڈیسی جیہڑے موسم تے اوُں کوُں پھل ڈیون۔ ⁴² ۴۲۔ یسوع نے اُنہاں کوُ آکھیا کیا تُساں کتاب مُقدس وِچ کِڈائیں نہیں پڑھیا کے جئیں پتھر کوُ راج مستریاں نے رَد کر ڈِتے اوُہو کونے دے سِرے دا پتھر تھی گیا۔ ایہہ خُداوند دی طرفوں تھیا اَتے ساڈی نظر وِچ عجیب ہِے۔ ⁴³ ۴۳۔ اِیں کیتے میں تُہاکو آدھا ہاں کے خُدا دی بادشاہی تُہاڈے کولوں گھِن گِدی ویسی تے اوُں قوم کوُ جو اوُندے پھل گھِن آوے ڈے ڈِتی ویسی۔ ⁴⁴ ۴۴۔ اَتے جیہڑا اِیں پتھر تے ڈھاسی ٹکڑے ٹکڑے تھی ویسی پر جیندے تے اوہ ڈھاسی اوُں کوُ پھیہ ڈیسی۔ ⁴⁵ ۴۵۔ اَتے جیہڑے ویلے سردار کا ہناں تے فریساں نے اوندیاں مثالاں سُنیاں تاں سمجھ گئےکہ ساڈے حق وِچ آدھا ہِے۔ ⁴⁶ ۴۶۔وَل اوہ اوُں کوُ پکڑن دی کوشش وِچ ہَن لیکن لوگاں کولون ڈردے ہَن کیونکہ لوگ اوُں کوُ نبی جاند دے ہَن۔