¹ ۱۔ اَے میڈے بھراؤ! تُہاڈے وچوں بہوں سارے اُستاد نہ بنن کیونکہ جاندے ہئیں کہ اساں جیہڑے اُستاد ہئیں ڈھیر سزا پاسوں۔ ² ۲۔ ایں کیتے جو اساں سارے دے سارے ہمیشہ خطا کریندے ہئیں۔ کامل بندہ اوہ ہِے جیہڑا گالہیں اِچ خطا نہ کرے۔ وَل اوہ سارے بدن کوُ وی قابو اِچ رکھ سگدے۔ ³ ۳۔ جڈاں اساسں اپنے قابو اِچ کرن کیتے گھوڑیاں دے مُنہ اِچ لگام ڈے ڈیندے ہئیں تاں اُنہاں دے سارے بدن کوُ وی گھما سگدے ہئیں۔ ⁴ ۴۔ ڈیکھو۔ جہاز وی اگرچہ وڈے وڈے ہوندِن اَتے تیز ہواواں دے نال چلائے ویندِن تاں وی ہک بہوں چھوٹی جیہی پتوار دے نال ملاح دی مرضی دے موافق گھمائے ویندِن۔ ⁵ ۵۔ ایویں ای زبان وی ہک نکا جیہا جسم دا حصہ ہِے اَتے وڈی شیخی مریندی ہِے ۔ ڈیکھو۔ تھوڑی جیہی اَگ دے نال کتنے وڈے جنگل اِچ اَگ لگ ویندی ہِے۔ ⁶ ۶۔ زبان وی ہک اَگ ہِے زبان ساڈے جسم اِچ شرارت دا ہک جہان ہِے اَتے سارے جسم کوُ پلید کر ڈیندی ہِے تے ساری دُنیا کوُ اَگ لا دیندی ہِے اَتے جہنم دی اَگ نال جلدی راہندی ہِے۔ ⁷ ۷۔ کیوں جو ہر طرح دے چوکھر تے پکھیرو تے کیڑے مکوڑے تے دریا دے جانور تاں بندیاں دے قابو وچ آویندِن تے آئے وی ہِِن۔ ⁸ ۸۔ پر زبان کوُ کوُئی بندہ وی قابوُ وچ نئیں کر سگدا۔ اوہ ہک بَلا ہِے جیہڑی رُکدی ای نئیں۔ ایہو جئے زہر نال بھری ہوئی اے جیہڑا مار چھڈیندا ہِے۔ ⁹ ۹۔ ایندے نال اساں خداوند تے باپ دی حمد کریندے ہئیں اَتے ایندے نال ای بندیاں کوُ جیہڑے خدا دی صورت تے پیدا تھئے ہن بددعا ڈیندے ہئیں۔ ¹⁰ ۱۰۔ ہک ای مُنہ تھوں مُبارک باد تے بددعا نکلدی ہِے۔ اَے میڈے بھراؤ! ایویں نئیں تھیونا چاہیدا۔ ¹¹ ۱۱۔ کیا ہکی جاہ چشمے دے مُنہ تھوں مِٹھا تے کھارا پانی نکل سگدے؟۔ ¹² ۱۲۔ اَے میڈے بھراؤ! کیا انجیر دے جھاڑ اِچ زیتون اَتے انگور دے جھاڑ اِچ انجیر پیدا تھی سگدِن؟ ایویں ای کھاری چشمے تھوں مِٹھا پانی نئیں نکل سگدا۔ ¹³ ۱۳۔ تُہاڈے وچوں سیانا تے سمجھ آلا کیڑھا ہِے؟ جیہڑا ایہو جیا ہوئے اوہ اپنے کماں کوُں نیک چال چلن دے وسیلے نال اوُں حلیمی دے نال ظاہر کرے جیہڑا حکمت تھوں پیدا تھیندا ہِے۔ ¹⁴ ۱۴۔ پر اگر تُساں اپنے دِل اِچ بہوں سخت حسد تے جُدائیاں رکھیندے ہو تاں حق دے خلاف نہ شیخی مارو نہ جھوٹ بولو۔ ¹⁵ ۱۵۔ اِے حکمت اوہ نئی جیہڑی اُتوں لاہندی ہِے بلکہ دُنیاوی تے نفسانی تے شیطانی ہِے۔ ¹⁶ ۱۶۔ ایں کیتے کہ جِتھاں حسد تے جُدائی ہِے اُتھاں فساد تے ہر طرح دا گندا کم وی تھیندا ہِے۔ ¹⁷ ۱۷۔ پر جیہڑی حکمت اُتوں آندی ہِے اول تاں اوہ پاک ہوندی ہِے۔ وَل ملن آلی تے حلیم تے چنگی تربیت آلی۔ رَحم تے چنگے پھلاں نال لدی ہوئی۔ کئیں دی بلا وجہ حمایت نہ کرن آلی تے مکر نہ کرن آلی ہوندی ہِے۔ ¹⁸ ۱۸۔ اَتے صلح کراون آلیاں کیتے راستبازی دا پھل صلح دے نال بویا ویندا ہِے۔