1
۱۔ اے میڈے بھراؤ! ساڈے جلال آلے خداوند یسوع مسیح دا ایمان تُہاڈے وچ طرف داری نال نہ ہووے۔
2
۲۔ کیوں جو اگر ہک بندہ سونے دی مُندری تے اعلیٰ کپڑے پاتے ہوے تُہاڈی جماعت اِچ آ ویندے اَتے ہک غریب بندہ میلے کچیلے کپڑے پاتے ہوے آ ونجے۔
3
۳۔ اَتے تُساں اوُں اعلیٰ کپڑے آلے دا لحاظ کر کے آکھو کہ توُں اِتھاں چنگی جاہ تے بہہ اَتے اوُں غریب بندے کوُ آکھو کہ توُں اُتھائیں کھڑا رِہ یا میڈے پیراں دے کول بہہ ونج۔
4
۴۔ تاں کیا تُساں آپس اِچ طرف داری نہ کیتی اَتے بُری نیت آلے منصف نہ بنے؟۔
5
۵۔ اے میڈے پیارے بھراؤ! سُنو۔ کیا خدا نے ایں جہان دے غریباں کوُ ایمان اِچ امیر اَتے اوُں بادشاہی دے وارث ہوون کیتے الگ نئیں کیتا جیندا اوُں نے اپنے محبت کرن آلیاں دے نال وعدہ کیتا ہِے؟۔
6
۶۔ لیکن تُساں غریب بندے دی بےعزتی کیتی۔ کیا امیر تُہاڈے تے ظلم نئیں کریندے اَتے اوہو تہاکو عدالتاں اِچ چھک کے نئیں گھن ویندے؟۔
7
۷۔ کیا اوہ اوُں بزرگ دے ناں تے کُفر نئیں بکدے جیہڑا تہاڈے اُتے لگا پئے؟۔
8
۸۔ تاں وی اگر تُساں ایں کتاب دے مطابق کہ اپنے گواہنڈی نال اپنی مانند محبت رکھ اوُں بادشاہی شریعت کوُ پورا کریندے ہو تاں چنگا کریندے ہو۔
9
۹۔ پر اگر تساں طرف داری کریندے ہو تاں گناہ کریندے ہو اَتے شریعت تُہاکو قصوروار ٹھہراندی ہِے۔
10
۱۰۔ کیونکہ جئیں کئیں نے ساری شریعت تے عمل کیتے اَتے ہک ای گال بھُل گئیے اوہ ساری گالہیں اِچ قصور وار بن گئے۔
11
۱۱۔ ایں کیتے کہ جئیں اے فرمائے کہ زنا نہ کر اوُں نے اے وی فرمائے کہ خون نہ کر۔ وَل وی اگر توُں زنا تاں نہ کیتے پر خون کیتے تاں وی شریعت دا توڑن آلا بن گئیئں۔
12
۱۲۔ تُساں اُنہاں بندیاں دی طرح کلام وی کرو اَتے کم وی کرو جنہاں دا آزادی دی شریعت دے موافق انصاف کیتا ویسی۔
13
۱۳۔ کیونکہ جئیں رَحم نئیں کیتا اوندا انصاف دے بغیر رَحم تھیسی۔ رَحم عدالت کوُں جِت ویندے۔
14
۱۴۔ اے میڈے بھراؤ! اگر کوئی آکھے کہ میں ایماندار ہاں پر عمل نہ کریندا ہوئے تاں کیا فائدہ؟ کیا ایہو جیا ایمان اوُں کوُ نجات ڈے سگدے؟۔
15
۱۵۔ اگر کوئی کوئی بھرا یا بھین ننگے ہوؤن اَتے اُنہاں کوُں روز دے ٹُکر دی وی کمی ہوئے ۔
16
۱۶۔ اَتے تہاڈے وچوں کوئی اُنہاں کوُ آکھے کہ خیر نال ونجو تے نگھے راہو تے رَجے راہو پر جیہڑیا شئیاں دی اُنہاں کوُ ضرورت ہِے اوہ اُنہاں کوُں نہ ڈیوے تاں کیا فائدہ؟۔
17
۱۷۔ ایویں ای ایمان وی اگر اوندے نال اعمال نہ ہوؤن تاں اوہ اپنے آپ اِچ مُردہ ہِے۔
18
۱۸۔ بلکہ کوُئی آکھ سگدے کہ تُوں تاں ایماندار ہیِں اَتے میں عمل کرن الا ہاں۔ تُوں اپنا ایمان اعمال دے بغیر تاں میکوُں ڈِکھا اَتے میں اپنا ایمان اعمال دے نال تیکوُ ڈِکھیساں۔
19
۱۹۔ تُوں ایں تے ایمان رکھیندا ہیں کہ خدا ہک ای ہِے خیر۔ چنگا کریندیں۔ شیطان تے اوندے چیلے وی ایمان رکھیندن اَتے کمبدے ہِن۔
20
۲۰۔ پر اَے نکمے بندے! کیا توُں اے وی نئیں جان دا کہ ایمان اعمال دے بغیر بےکار ہِے؟۔
21
۲۱۔ جڈاں ساڈے پیوُ ابرہام نے اپنے پُتر اضحاق کوُ قربان گاہ تے قربان کیتے تاں کیا اوہ اعمال دے نال راستباز نئیں تھیا؟۔
22
۲۲۔ کیا توُں ڈیکھ گِدے کہ ایمان نے اوندے اعمال دے نال مِل کے اثر کیتے اَتے اعمال دے نال ایمان پورا تھی گئیے۔
23
۲۳۔ اتے ایہہ لکھا گیا پورا تھئے کہ ابرہام خدا تے ایمان گھن آئے اَتے ایہہ اوندے کیتے راستبازی گنا گئے اَتے اوہ خدا دا سجن اکھوائے۔
24
۲۴۔ ہُن تُساں ڈیکھ گِدے کہ بندہ صرف ایمان نال ای نئیں بلکہ اعمال نال راستباز ٹھہردا ہِے۔
25
۲۵۔ ایویں ای راحب کسبی وی جڈاں اوُں نے قاصداں کوُں اپنے گھر اِچ رکھیا ہائی اَتے ڈوجھی راہ تھوں اُنہاں کوُں بھیج ڈِتا ہائی تاں کیا اعمال دے نال راستباز نہ ٹھہری؟۔
26
۲۶۔ پس جیویں بدن رُوح دے بغیر مُردہ ہِے اوں وے ای ایمان وی بغیر اعمال دے مُردہ ہِے۔