¹ ۱۔ مقصد ایہہ ہے بئی پہلے عہد اِچ وی عبادت دے احکام ہَن اَتے ایویں ای مَقدِس جیہڑا دُنیاوی ہا۔ ² ۲۔ یعنی ہک خیمہ بنایا گیا ہا۔ اگلے حصے اِچ چراغدان تے میز تے نذر دیاں روٹیاں ہَن اَتے اوُں کوُ پاک مکان آدھِن۔ ³ ۳۔ اَتے ڈوجھے پردے دے پچھوں اوہ خیمہ ہا جینکوُ پاکترین آدھِن۔ ⁴ ۴۔ اوُندے وِچ سونے دا عُود سوز اَتے چاریاں پاسے سونے نال منڈھیا ہویا عہد دا صندوق ہا۔ اِیندے وِچ مَنّ نال بھریا ہویا ہک سونے دا مرتبان اَتے پھُلاں نال بھریا ہویا ہارون دی سوٹی تے عہد دیاں تختیاں ہَن۔ ⁵ ۵۔ اَتے اوُندے اُتے جلال دے فرشتے ہَن جیہڑے کفارہ گاہ تے چھاں کریندے ہَن۔ اِنہاں گالہیں کوُ تفصیل نال بیان کرن دا ایہہ ویلہ نئیں۔ ⁶ ۶۔ جیہڑے ویلے ایہہ ساریاں شئیاں ایویں بن گئیاں تاں پہلے خیمے وِچ تاں کاہن ہر ویلے داخل تھیندے ہَن تے عبادت دا کم پورا کریندے ہَن۔ ⁷ ۷۔ پر ڈوجھے وِچ صرف سردار کاہن ہی سال وِچ ہِک واری ویندا ہااَتے وَل خون دے بغیر نہ ونج سگدا ہا جینکوُ اپنے کیتے تے اُمت دی بھُل چُک کیتے چڑھاندا ہا۔ ⁸ ۸۔ اِیندے توں روُح القدس دا ایہہ اشارہ مِلدےکہ جیہڑے ویلے تائیں پہلا خیمہ کھڑا ہِے پاک مکان دی راہ ظاہر نئیں تھئی۔ ⁹ ۹۔ اوہ خیمہ اِیں زمانے کیتے ہِک مثال ہِے اَتے اِیں دے مطابق ایہو جیہاں نذراں تے قربانیاں چڑھائیاں ہَن جیہڑیاں عبادت کرن آلے کوُ دِل دے اعتبار نال کامل نئیں کر سگدیاں۔ ¹⁰ ۱۰۔ اِیں کیتے کہ اوہ صرف کھاون پیون تے اَنج اَنج دھاون دے کیتے جسمانی احکام ہِن جو اصلاح دے ویلے تائیں مقرر کیتے گئے ہَن۔ ¹¹ ۱۱۔ پر جیہڑے ویلے مسیح آون آلی چنگی شئیاں دا سردار کاہن تھی کے آیا تاں اوُں بزرگ تر تے کامل تر خیمہ دی راہ توں جیہڑا ہتھ دا بنیا ہویا ہایعنی اِیں دُنیا دا نئیں۔ ¹² ۱۲۔ اَتے وچھیاں تے بکریاں دا خون گھن کے نئیں بلکہ اپنا ہی خون گھن کے ہکو وار پاک مکان اِچ لگا گیا تے ہمیشہ کیتے آزاد کرا ڈِتے۔ ¹³ ۱۳۔ کیونکہ جیہڑے ویلے بکریاں تے ڈاندھاں دے خون تے گاں دی سواہ پلید لوگاں تے چھڑجے ونجن نال ظاہری پاکیزگی حاصل تھیندی ہِے۔ ¹⁴ ۱۴۔ تاں مسیح دا خون جئیں نے اپنے آپ کوُ ازلی روُح دے وسیلے نال خدا دے سامنے بےعیب قربان کر ڈِتے اوہ تُہاڈے دِلاں کوُ مُردہ کماں توں پاک کیوں نہ کریسی تاں جو زندہ خدا دی عبادت کروُں۔ ¹⁵ ۱۵۔اَتے اِیں دے پاروُں اوہ نویں عہد دا درمیانی ہِے تاں جو اوُندی موت دے وسیلے نال جیہڑی پہلے عہد دے ویلے دے قصوراں دی معافی کیتے تھئی ہِے سَڈے ہوئے لوگ ابدی میراث کوُ حاصل کریسن کیونکہ اُنہاں نال وعدہ کیتا گیا ہا۔ ¹⁶ ۱۶۔ کیونکہ جتھاں وصیّت ہِے اُتھاں وصیّت کرن آلے دی موت وی ثابت تھیونا ضروری ہِے۔ ¹⁷ ۱۷۔ اِیں کیتے کہ وصیّت موت دے بعد ہی جاری کیتی ویندی ہِے اَتے جڈاں تائیں وصیّت کرن آلا زندہ راہندا ہِے اوُں دا اجر نئیں مِلدا؟ ¹⁸ ۱۸۔ اِیں کیتے پہلا عہد وی خون دے بغیر نئیں بدھیا گیا۔ ¹⁹ ۱۹۔ چنانچہ موسیٰ جیہڑے ویلے ساری اُمّت کوُ شریعت دا ہر ہِک حکم سُنا چُکے تاں وچھیاں تے بکریاں دا خون گھن کے پانی تے لال اون تے زوفے دے نال اوُں کتاب اَتے ساری اُمّت تے چھڑک ڈِتے۔ ²⁰ ۲۰۔ اَتے آکھے کہ ایہہ اوُں عہد عہد دا خون ہِے جیندا حکم خدا نے تُہاڈے کیتے ڈِتا ہِے۔ ²¹ ۲۱۔ اَتے ایویں ای اوُں نے خیمہ تے عبادت دیاں ساریاں شئیاں تے کون چھڑکیا ہِے۔ ²² ۲۲۔ اَتے تقریباً ساریاں شئیاں خون دے نال پاک کیتیاں ویندِن اَتے خون بہاون دے بغیر کوُئی معافی نئیں مِلدی۔ ²³ ۲۳۔ پس ضرور ہا کہ آسمانی شئیاں دیاں نقلاں تاں اِیں دے پاروُں پاک کیتیاں ونجن پر کود آسمانی شئیاں اِیندے کولوں چنگی قربانیاں دے پاروں۔ ²⁴ ۲۴۔ کیوں جو مسیح اوُں ہتھ دے بنائے ہوئے پاک مکان اِچ داخل نئیں تھیا بلکہ آسمان اِچ ہی داخل تھیا تاں جو خدا دے سامنے ہُن ساڈی خاطر حاضر تھیوے۔ ²⁵ ۲۵۔ ایہہ نئیں کہ اوہ اپنے آپ کوُ بار بار قربان کرے جیویں سردار کاہن پاک مکان اِچ ہر سال ڈوجھے دا خون گھن کے ویندا ہا۔ ²⁶ ۲۶۔ ایویں تاں شروع کولوں گھن کے اوُں کوُ بار بار ڈُکھ برداشت کرنا ضروری تھیوے ہا پر ہُن زمانے دے آخیر اِچ ہِک واری ظاہر تھیا تاں جو اپنے آپ کوُ قربان کرن دے نال گناہ کوُ مِٹا چھوڑے۔ ²⁷ ۲۷۔ اَتے جیویں بندیاں کیتے ہِک واری مرنا تے اوُندے بعد عدالت داہوونا مقرر ہِے۔ ²⁸ ۲۸۔ ایویں ای مسیح وی ہِکو واری بہوُں سارے لوگاں دے گناہ چا کے قربان تھیا جو ڈوجھی واری گناہ دے بغیر نجات کیتے اُنہاں کوُ ڈِکھائی ڈِیسی کو اوُندی راہ ڈیدھے ہِن۔