¹ ۱۔ ہُن جیہڑیاں گالہیں اساں کریندے پئے ہئیں اُنہاں وِچوں ساریاں توں وڈی ایہو ہِے بئی ساڈا ایہو جیہا سردار کاہن ہِے جیہڑا آسماناں تے خدا دے سجے ہتھ اوُندے تخت تے ونج بیٹھے۔ ² ۲۔ اَتے مَقدِس تے اوُں حقیقی خیمے دا خادم ہِے جینکوُ خداوند نے کھڑا کیتا ہِے نہ کہ انسان نے۔ ³ ۳۔ اَتے چونکہ ہر سردار کاہن نذراں تے قربانیاں چڑھاون دے کیتے مقرر تھیندا ہِے اِیں کیتے ضروری ہِے کہ اوُندے کول وی چڑھاون کیتے کجھ ہووے۔ ⁴ ۴۔ اَتے اگر اوہ زمین تے ہووے ہا تاں ہر گز کاہن نہ ہووے ہااِیں کیتے جو شریعت دے موافق نذر چڑھاون آلے موجود ہِن۔ ⁵ ۵۔ اوہ تاں آسمانی چیزاں دی نقل تے پرچھائیں دی خدمت کریندِن چنانچہ جیہڑے ویلے موسیٰ خیمہ بناون کوُ ہا تاں اوُں کوُ ایہہ ہدایت کیتی گئی کہ ڈیکھ! جیہڑا نمونہ پہاڑ تے تیکوُ ڈِکھایا گیا ہا اوُندے ای مطابق ساریاں شئیاں بناویں۔ ⁶ ۶۔ پر اوُں نے ایہو جیہی چنگی خدمت حاصل کیتی جیویں اوُں چنگے عہد دا درمیانی ٹھہرے جو چنگے وعدیاں دی بنیاد تے قائم کیتا گیا ہا۔ ⁷ ۷۔ کیوں جو اگر پہلا عہد ایں وے ہووے ہا کہ جیندے وِچ کوُئی نقص نہ ہووے تا ں ڈوجھے کیتے موقع نہ گولن ہا۔ ⁸ ۸۔ پس اوہ اُنہاں دے نقص ڈسا کے آدھے خداوند فرماندے ڈیکھ! اوہ ڈِیں آندِن کہ میں اسرائیل دے گھرانے وِچوں تے یہوداہ دے گھرانے وِچوں ہِک نواں عہد بندھیساں۔ ⁹ ۹۔ ایہہ اوُں عہد دی کار نہ ہوسی جیہڑا میں اُنہان دے پیئو ڈاڈے نال اوُں ڈِیں بدھیا ہا جڈاں مصر دے مُلک اِچوں کڈھن کیتے اُنہاں دا ہتھ پکڑیا ہا۔ اِیں کیتے کہ اوہ میڈے عہد تے قائم نہ راہے اَتے خداوند فرماندے کہ میں اُنہاں دے پاسے کجھ وی توجہ نہ کیتی۔ ¹⁰ ۱۰۔ وَل خداوند فرماندے کہ اُنہاں ڈیہاں اِچ جیہڑا عہد اسرائیل دے گھرانے نال بدھیساں اوہ ایہہ ہِے کہ میں اپنے قانون اُنہاں دے ذہن اِچ سٹیساں اَتے اُنہاں دے دِلاں اُتے لکھساں اَتے وَل میں اُنہاں دا خدا ہوساں اَتے اوہ میڈی اُمت ہوسن۔ ¹¹ ۱۱۔ اَتے ہر بندہ اپنے مُلک دے راہون آلے اپنے بِھرا کوُ ایہہ تعلیم نہ ڈیسی کہ تُو خداوند کو سُنجان کیوں جو نِکے توں وڈے تائیں سارے میکوُ سُنجان گھنسن ¹² ۱۲۔ اِیں کیتے کہ میں اُنہاں دیاں نارستیاں تے رَحم کریساں اَتے اُنہاں دے گناہاں کوُ وَل کڈائیں یاد نہ کریساں۔ ¹³ ۱۳۔ جڈاں اوُں نے نواں عہد آکھے تاں پہلے کوُ پُرانا ٹھہرائے اَتے جیہڑی شئے پُرانی تے بہوں عرصے دی تھی ویندی ہِے اوہ مِت ونجن دے نیڑے ہوندی ہِے۔