¹ ۱۔ پس اَے پاک بھراؤ! آسمانی بلاوے اِچ تُساں جو شامل ہیوے۔ یسوع تے غور کرو جیہڑا رسول تے سردار کاہن ہِےجیندا اساں اقرار کریندے ہئیں۔ ² ۲۔ جیہڑا اپنے مقرر کرن آلے دے حق اِچ دیانتدار ہا جیویں موسیٰ اوُندے سارے گھر اِچ ہا۔ ³ ۳۔ کیونکہ اوہ موسیٰ توں بہوں زیادہ عزت دے لائق سمجھا گئے جیویں گھر دا بناون آلا گھر توں زیادہ عزت دار تھیندا ہِے۔ ⁴ ۴۔ چنانچہ ہر ہِک گھر دا بناون آلا کوُئی نہ کوُئی ہوندےپر جئیں ایہہ ساریاں شئیاں بنایاں ہِن اوہ خدا ہِے۔ ⁵ ۵۔ موسیٰ تاں اوُندے سارے گھر وِچ خادم دی کار دیانتدار ریہا تاں جو آون آلے زمانے اِچ بیان تھیون آلیاں گالہیں دی گواہی ڈیوے۔ ⁶ ۶۔ پر مسیح اوُں گھر دا ایویں مختار ہِے جیویں پُتر ہوئےاَتے اوُں دا گھر اساں ہئیں پر شرط ایہہ ہِے کہ اساں اپنی دلیری تے اُمید دا فخر آخر تائیں مضبوطی نال قائم رکھوں۔ ⁷ ۷۔ پس جیویں روُح القدس فرماندے جو اگر اَج تُساں اوُندی آواز سُنو۔ ⁸ ۸۔ تاں اپنے دِلاں کوُ سخت نہ کرائے جیویں غصہ ڈلاون آلے ڈیں جنگل اِچ کیتا ہا۔ ⁹ ۹۔ جتھاں تُہاڈتے پیئو ڈاڈے نے میکوُ جانچیا تے آزمایا ہا اَتے چالہی سال تائیں میڈے کم ڈِٹھے۔ ¹⁰ ۱۰۔ اِیں کیتے میں اوُں پُشت توں ناراض تھیا اَتے آکھے کہ اِنہاں دے دِل ہمیشہ گمراہ تھیندے راہندِن تے اِنہاں نے میڈی راہواں کوُ نہ سنجانا۔ ¹¹ ۱۱۔ وَل میں وی اپنے غضب اِچ قسم کھادی جو ایہہ میڈے آرام اِچ داخل نہ تھی سن۔ ¹² ۱۲۔ اَے بھراؤ! خبردار!تُہاڈے وِچوں کئیں دا وی ایہو جیہا بُرا تے بےایمان دِل نہ ہووے جو زندہ خدا توں پھر ونجے۔ ¹³ ۱۳۔ بلکہ اَج دا ڈیں جئیں ڈیں تائیں آکھیا ویندے ہر ڈِیں کوُ آپس اِچ نصیحت کیتا کرو تاں جو تُہاڈے وِچوُں کوُئی گناہ دے فریب اِچ آ کے دِل سخت نہ تھی ونجے۔ ¹⁴ ۱۴۔ کیوں جو اساں مسیح وِچ شامل تھئے ہاں پر شرط ایہہ ہِے کہ اپنے پہلے آلے بھروسے تے آخر تائیں مضبوطی نال قائم راہوں۔ ¹⁵ ۱۵۔ چنانچہ آکھا ویندے کہ اگر اَج تُساں اوُندی آواز سُنوتاں اپنے دِلاں کوُ سخت نہ کرائے جیویں کہ غصہ ڈیواون آلے ویلے کیتا ہا۔ ¹⁶ ۱۶۔اوہ لوگ کیہڑے ہَن جِنہاں نے آواز سُن کے غصہ ڈیوایا ہا؟ کیا اُنہاں ساریاں نے نئیں جیہڑے موسیٰ دے پاروُں مِصر اِچوں نکلے ہَن۔ ¹⁷ ۱۷۔ اَتے اوہ کیہڑے لوگاں نال چالہی سال تک ناراض ہا؟ کیا اُنہاں نال نئیں جنہاں نے گناہ کیتے اَتے اُنہاں دیاں لاشاں ویران جاہ تے پئیاں رِہ گئیاں؟ ¹⁸ ۱۸۔ اَتے کیہڑے لوگاں دے بارے وِچ اوُں نے قسم کھادی ہا کہ اوہ میڈے آرام اِچ داخل نہ تھی سن علاوہ اُنہاں دے جنہاں نے نافرمانی کیتی؟ ¹⁹ ۱۹۔ اساں ڈیدھے ہئیں کہ اوہ بےایمانی دے پاروُں داخل نہ تھی سگے۔