1
۱۔ ہُن ایمان اُمید کیتیاں ہوئیاں شئیاں دا اعتماد تے اَن ڈِٹھی شئیاں دا ثبوت ہِے۔
2
۲۔ کیوں جو اوُندے بارے بزرگاں دے حق اِچ چنگی گواہی ڈِتی گئی ہِے۔
3
۳۔ ایمان ہی نال ساکوُ پتا لگدے کہ عالَم خدا دے آکھن نال بنے ہِن۔ ایہہ نئیں کہ جو کجھ نظریندے ظاہری شئیاں نال بنا ہووے۔
4
۴۔ ایمان ہی نال ہابل نے قائن توں افضل قربانی خدا کیتے چڑھائی اَتے اوُندے پاروُں اوُندے راستباز تھیون دی گواہی ڈِتی کیونکہ خدا نے اوُندی نذراں دے بارے گواہی ڈِتی اَتے اگرچہ اوہ مَر گیا ہِے تاں وی اوُندے وسیلے نال ہُن تائیں کلام کریندا ہِے۔
5
۵۔ ایمان ہی نال حنوک چاتا گیا ہاتاں جو موت کوُ نہ ڈیکھے اَتے چونکہ خدا نے اوُں کوُ چا گِدا ہا اِیں کیتے اوُں دا پتا نہ لگے کیوں جو چاتے ونجن توں پہلے اوُں دے حق اِچ ایہہ گواہی ڈِتی گئی ہا کہ ایہہ خدا کوُ پسند آئے۔
6
۶۔ اَتے ایمان دے بغیر اوُں کوُ پسند آونا ناممکن ہِے۔ اِیں کیتے خدا دے کول آون آلے کوُ ایمان گھن آونا چاہیدا ہِے کہ اوہ موجود ہِے اَتے اپنے طالباں کوُ بدلہ ڈیندا ہِے۔
7
۷۔ ایمان ہی دے پاروں نوح نے اُنہاں شئیاں دے بارے جو اوُں ویلے تائیں نظرنہ آندیاں ہَن ہدایت پا کے خدا دے خوف نال اپنے گھرانے دے بچاؤ کیتے کشتی بنائی جئیں توں اوُں نے دُنیا کوُ مجرم ٹھہرائے اَتے اوُں راستبازی دا وارث تھیا جیہڑا ایمان نال ہِے۔
8
۸۔ ایمان ہی دے پاروُں ابرہام جیہڑے ویلے سَڈیا گیا تاں حکم من کے اوُں جاہ تے لگا گیا جیں کوُ میراث اِچ گھنن آلا ہا اَتے اگرچہ اوہ جان دا نہ ہا کہ میں کتھاں ویندا پیا ہاںتاں وی اوہ ٹُر پیا۔
9
۹۔ ایمان ہی دے نال اوُں نے مُلکِ موعود اِچ اِیں طرح مسافر دے طور تے طرز زندگی اپنائی کہ جیویں گویا کوُئی غیر مُلک ہِےاَتے اضحاق تے یعقوب سمیت جو اوُندے نال ہَن اوُں وعدہ دے وارث تھئے تے خیمیاں وِچ راہے۔
10
۱۰۔ کیونکہ اوہ اوُں مضبوط شاہر دا اُمیدوار ہا جیں کوُ بناون آلا خدا ہِے۔
11
۱۱۔ ایمان ہی دے نال سارہ نے وی بہوُں عمر لنگھن دے بعد ڈِھڈ نال تھیون دی طاقت ملی اِیں کیتے کہ اوُں نے وعدہ کرن آلے کوُ سچا جانے۔
12
۱۲۔ پس ہک بندے توں جیویں مُردہ ہوئے آسمان دے تاریاں دے برابر بہوُں زیادہ اَتے سمندر دے کنارے دی ریت دے برابر بہوُں زیادہ اولاد پیدا تھئی۔
13
۱۳۔ ایہہ ساری ایمان دی حالت اِچ مَرے اَتے وعدہ کیتیاں ہوئیاں شئیں نہ حاصل کیتیاں پر دوُر ہی توں اُنہہاں کوُ ڈیکھ کے خوش تھئے اَتے اقرار کیتا کہ اساں زمین تے پردیسی تے مسافر ہئیں۔
14
۱۴۔ جیہڑے ایہو جئیں گالہیں آدھِن اوہ ظاہر کریندِن کہ اساں اپنے مُلک کو گولیندے پئے ہئیں۔
15
۱۵۔ اَتے جیہڑے مُلک وِچوں اوہ نکل کے آ ئے ہَن اگر اوُندا خیال کریندے تاں اُنہاں کول واپس ونجن دا موقع ہا۔
16
۱۶۔ پر حقیقت اِچ اوہ ہِک چنگے یعنی آسمانی مُلک دے آرزو مند ہَن۔ اِیں کیتے خدا اُنہاں کولوں یعنی اُنہاں دا خدا اکھواون توں شرمایا نئیں چنانچہ اوُں اُنہاں کیتے ہِک شاہر تیار کیتے۔
17
۱۷۔ ایمان ہی دے نال ابرہام نے آزمائش دے ویلے اضحاق نذر کیتے اَتے جئیں نے وعدیاں کوُ سچ من گِدا ہا وَل اوہ اوُں کلہے کوُ نذر کرن لگے۔ /
18
۱۸۔ جئیں دے بارئ وِچ ایہہ آکھا گیا ہا جو اضحاق ہی توں تیڈی نسل اکھواسی۔
19
۱۹۔ کیوں جو اوہ سمجھے کہ خدا مُردیاں وِچوں زندہ کرن دہ قدرت رکھیندے چنانچہ اُنہاں وِچوں ہی تمثیل دے طور تے اوہ اوُں کوُ وَل مِل گیا۔
20
۲۰۔ ایمان ہی دے نال اضحاق نے ہوون آلی گالہئیں دے بارے یعقوب تے عیسو ڈوُہاں کوُ ڈُعا ڈِتی۔
21
۲۱۔ ایمان ہی دے نال یعقوب نے مَرن دے ویلے یوسف دے ڈوُہاں پُتراں وِچوں ہر ہِک کوُ دُعا ڈِتی اَتے اپنے اپنی لاٹھی دے سِرے تے سہارا گھن کے سجدہ کیتے۔
22
۲۲۔ ایمان ہی دے نال یوسف نے جیہڑے ویلے اوہ مرن آلا ہا بنی اسرائیل دے نکلن دا ذِکر کیتے اَتے اپنی ہڈیاں دے بارے حُکم ڈِتے۔
23
۲۳۔ ایمان ہی دے نال موسیٰ دے ماں پیئو نے اوُں دے جمن دے بعد ترئے مہینے تائیں اوُں کوُ لُکا کے رکھیا کیونکہ اُنہاں نے ڈِٹھا کہ بال بہوُں پیارا ہِے اَتے وَل اوہ بادشاہ دے حکم توں نہ ڈرے۔
24
۲۴۔ ایمان ہی دے نال موسیٰ نے وڈے تھی کے فرعون دی دھی دا پُتر اکھواون توں انکار کیتے۔
25
۲۵۔ اِیں کیتے کہ اوُں نے گناہ دا تھوڑے دِنال دا مزہ چاون دے پاروُں خدا دی اُمت دے نال بدسلوکی چٓبرداشت کرن کوُ زیادہ پسند کیتے۔
26
۲۶۔ اَتے مسیح کیتے لعن طعن برداشت کرن کوُ مصر دے خزانیاں کولوں وڈی دولت سمجھیا کیونکہ اوُں دی نگاہ انعام پاون تے ہائی۔
27
۲۷۔ ایمان ہی دے نال اوُں نے بادشاہ دے قہر دا خوف نہ کر کے مصر کوُ چھوڑ ڈِتے۔ اِیں کیتے کہ اوہ اَن ڈِٹھے کوُ ایویں ہِے کہ جیویں ڈیکھ کے ثابت قدم ریہا۔
28
۲۸۔ایمان ہی دے نال اوُں نے فَسح کرن تے خون چھڑکیا ونجن تے عمل کیتے تاں جو پہلوٹھیاں دا ہلاک کرن آلا بنی اسرائیل کوُ ہتھ نہ لائے۔
29
۲۹۔ ایمان ہی دے نال اوہ بحرِ قلزم اِچوں ایویں لنگھ گئے جیویں سُکی زمین توں اَتے جیہڑے ویلے مصریاں نے ایہہ ارادہ کیتے تا ڈُب گئے۔
30
۳۰۔ ایمان ہی دے نال یریحو دی شہر پناہ جڈاں سَت ڈِیں تائیں اوُں دے آسے پاسے چکر لا چکے تاں اوہ ڈھے پئی۔
31
۳۱۔ ایمان ہی دے نال راحب فاحشہ نافرمان بندیاں دے نال ہلاک نہ تھئی کیونکہ اوُں نے جاسوساں کوُ حفاظت نال رکھیا ہا۔
32
۳۲۔ وَل بئیا میں کیا آکھاں؟ اتنا ویلہ کتھاں ہِے کہ جدعون تے برق تے سمسون تے افتاہ تے داؤد تے سموئیل تے بئے نبیاں دا حال ڈساواں؟۔
33
۳۳۔ اُنہاں نے ایمان ہی دے پاروُں بادشاہاں کوُ مغلوب کیتے۔ راستبازی دے کم کیتے۔ وعدہ کیتی ہوئیاں شئیاں کوُ حاصل کیتے۔ شیراں دے مُنہ بند کیتے۔
34
۳۴۔ بھا کوُ بہوُں جلدی نال بُجھائے۔ تلوار دی دھار توں بچ نکلے۔ کمزوری اِچ زور اور تھئے۔لڑائی اِچ بہادر بنے۔ ڈوُجھیاں فوجاں کوُ مار بھگائے۔
35
۳۵۔ عورتاں نے اپنے مُدیاں کوُ وَلا زندہ ڈَٹھے۔ بہوُں سارے مار کھاندے کھاندے مَر گئے پر رہائی منظور نہ کیتی تاں جو اُنہاں کوُ چنگی قیامت نصیب تھیوے۔
36
۳۶۔ بہوُں سارے بندیاں دا مذاق اُڑایا گئے تے کوڑے کھاون بلکہ زنجیراں اِچ بدھے ونجن تے قید اِچ پوون تے آزمائے گئے ہِن۔
37
۳۷۔ سنگسار کیتے گئے۔ آرے نال چیرے گئے آزمایش اِچ پاتے گئے۔ تلوار نال مارے گئے۔بھیڈاں تے بکریاں دی کھل پاکے مُحتاجی اِچ ۔ مصیبت اِچ۔ بدسلوکی دی حالت اِچ جہ جہ تے پھر دے راہے۔
38
۳۸۔ دُنیا اُنہاں دے لائق نہ ہا۔ اوہ جنگلاں تے پہاڑاں تے غاراں تے زمین دے ٹویاں اِچ آوارہ پھردے راہے۔
39
۳۹۔ اَتے اگرچہ اِنہاں ساریاں دے حق اِچ ایمان دے پاروُں چنگی گواہی ڈِتی گئی تاں وی اُنہاں کوُ وعدہ کیتیاں ہوئیں شئیاں نہ مِلیاں۔
40
۴۰۔ اِیں کیتے کہ خدا نے احتیاط کر کے ساڈے کیتے کوُئی چنگی شئے دا فیصلہ کیتے تاں جو اوہ ساڈے بغیر کامل نہ کیتے ونجن۔