¹ ۱۔ پولُس دربے تے لُسترہ وِچ وی پہنچیا اَتے ڈیکھو! تیمتھیس ناں دا شاگرد وی اُتھاں ہا، جیہڑا ہک ایماندار یہودی عورت دا پُتر ہا، اوندا پیو یونانی ہا۔ ² ۲۔ اوہ لُسترہ تے اُکینم دے بھراواں وِچوں نیک ناں ہا۔ ³ ۳۔ پولُس چاہندا ہا کہ اوہ اوندے نال سفر کرے، پس اوں نے اوُں کوُ نال گھن کے یہودیاں دی وجہ تھوں اوُں دا طہور کیوں جو اوُں علاقے دے لوگ جان دے ہَن کہ اوں دا پیو یونانی ہِے۔ ⁴ ۴۔ جڈاں اوہ شاہراں وِچوں لنگھدے ہوئے گئے تاں اُنہاں نے کلیسیاواں کوُ حکم ڈِتا جو اُنہاں ہدایات تے عمل کرن جو رسولاں تے یروشلیم دے بزرگاں ڈِتیاں گیاں ہِن۔ ⁵ ۵۔ پس کلیسیاواں ایمان وِچ مضبوط تھیاں تے روز بروز ودھدیاں گئیاں۔ ⁶ ۶۔ پولُس تے اوندے ساتھی فروگیہ تے گلتیہ دے علاقے وِچوں تھی کے گزرے کیونکہ روح القدس نے اُنہاں کوُ آسیہ دے صوبے وِچ کلام سُناون تھوں منع کیتا ہا۔ ⁷ ۷۔ جڈاں اوہ مُوسیہ دے نیڑے آئے، تاں اُنہاں نے بتونیہ اِچ ونجن دی کوشش کیتی، پر یسوع دے روح نے اُنہاں کوُ اُتھاں ونجن تھوں روکے۔ ⁸ ۸۔ مُوسیہ دے رستے چوں لنگھدے ہوئے اوہ تروآس دے شاہر اِچ آئے۔ ⁹ ۹۔ رات دے ویلے پولُس تے رویا ظاہر تھئی کہ ہک بندہ جو مکدونیہ تھوں ہا اُتھاں کھڑا اوُں کوُ سڈیندا پئے اَتے آدھے، " مکدونیہ وِچ آتے ساڈی مدد کر"۔ ¹⁰ ۱۰۔ جڈاں پولُس نے ایہہ رویا ڈیکھی تاں فوراً اساں مکدونیہ ونجن کیتے تیار تھی گئے کیونکہ خدا نے ساکوُ اُتھاں انجیل دی مُنادی کیتے سڈیا ہِے۔ ¹¹ ۱۱۔ تروآس تھوں جہاز تے روانہ تھی کے اساں سِدھے سمترا دے علاقے وِچ آئے اَتے اگلے ڈِیں اساں نیا پُلس وِچ آئے۔ ¹² ۱۲۔اُتھوں اساں فلپی وِچ لگے گئے جو کہ مکدُنیہ دا ہک شاہر ہِے جیہڑا اِیں ضلعے دا بہوں اہم شاہر تے رومی وستی ہِے، اَتے اساں کئی ڈِیں ایِں شہر اِچ ٹھہرے۔ ¹³ ۱۳۔سبت آلے ڈیِں اساں شاہر دے دروازے دے باہر دریا تے آئے، جتھاں اساں سوچیا ہا کہ دعا کرن کیتے جاہ ہِے۔ اساں بیٹھ گئے اَتے اُنہاں عورتاں نال کلام کیتا جیہڑیاں اُتھاں آیاں ہَن۔ ¹⁴ ۱۴۔ لُدیہ ناں دی ہک عورت جو تھواتیرہ شاہر تھوں آئی ہائی اَتے قرمز وچیندی ہا، جئیں نے خدا دی عبادت کیتی، اَتے ساڈی سُنی۔ خدا نے اوندے دِل کو کھولیا جواوہ اُنہاں گالہیں کوُ سُنے جو پولُس نے آکھیاں ہَن۔ ¹⁵ ۱۵۔ جیہڑے ویلے اوں نے اَتے اوں دےخاندان نے بپتسمہ گِدے تاں اوُں نے ساکوں مجبور کیتا کہ اگر میکوُ خدا دی ایماندار بندی جان دے ہیوے تاں میڈے گھر وَچ آؤ اَتے اُتھاں راہو۔ اوں نے ساکوُ مجبور کیتے۔ ¹⁶ ۱۶۔ وَل ایویں تھیا کہ اساں دعا آلی جاہ تے ویندے پئے ہاسے، ہک جوان عورت جیندے وِچ غیب دا علم جانن دی روح ہائی ساکوں مِلی۔ اوہ غیب دے علم تھوں اپنے مالکاں کیتے بہوں کماندی ہا۔ ¹⁷ ۱۷۔ ایہہ عورت ساڈے تے پولُس دے پیچھے آئی اَتے ایہہ آدھے ہوئے اوچی آواز نال بولی، ایہہ بندے خدا تعالیٰ دے خادم ہِن. جو تہاکوُ نجات دی راہ دی تعلیم ڈیندے ہِن۔ ¹⁸ ۱۸۔ اوُں نے بہوں ڈیہاڑے ایویں کیتا، لیکن پولُس اوندے تے بہوُں غصے تھیا، اوں دے ولے ڈیکھ کے اوُں روح کوُ آکھیا، میں تیکوُ یسوع مسیح دے ناں اِچ حکم ڈیندا ہاں ایندے وِچوں باہر نکل آ، اَتے اوہ اوں ویلے ای باہر نکل آئی ۔ ¹⁹ ۱۹۔ جڈاں اوں دے مالکاں نے ڈیکھیا جو اُنہاں دے کماون دی اُمید ویندی راہی، تاں اُنہاں نے پولُس تے سیلاس کوُ پکڑے اَتے اُنہاں کوُ بازار اِچ حاکماں دے سامنے گھسیٹ کے گھن گئے۔ ²⁰ ۲۰۔ جڈاں اوہ اُنہاں کوُ حاکم دے سامنے گھن آئے، اُنہاں نے آکھیا ایہہ بندے یہودی ہِن اَتے ساڈے شاہر اِچ بہوں پریشانی پیدا کریندے پئے ہِن۔ ²¹ ۲۱۔ اوہ ساکوُ ایہو جیہاں گالہیں سکھاندے پئے ہَن جو رومی تھیندے ہوئے شریعت دے مطابق نئیں کہ اِنہاں کوُ قبول کیتا ونجے یا اِنہاں تے عمل کیتا ونجے۔ ²² ۲۲۔ وَل ہجوم پولُس تے سیلاس دے خلاف اُٹھ کھڑا تھیا ؛ حاکم نے اُنہاں دے کپڑے پھاڑے تے حکم ڈِتا جو اِنہاں کوُ بینت لائے ونجن۔ ²³ ۲۳۔ جیہڑے ویلے اوہ اُنہاں کوُ بُری طرح مار چُکے تاں اُنہاں کوُ قید خانے وِچ سَٹ ڈِتا اَتے دروغے کُو حکم ڈِتا کہ اُنہاں دی حفاظت کرے۔ ²⁴ ۲۴۔ حکم گھن کے دروغے نے اُنہاں کوُ اندر دے قید خانے وِچ سَٹ چھوڑے اَتے اُنہاں دے پیر کاٹھ اِچ ٹھونک ڈِتے۔ ²⁵ ۲۵۔ ادھی رات دے ویلے پولُس تے سیلاس دعا کریندے پئے ہَن اَتے خدا دی حمد دے گیت گاندے پئے ہَن تے ڈوجھے قیدی اُنہاں کوُ سُن دے پئے ہَن۔ ²⁶ ۲۶۔ اَبڑ گت ہک وڈا بھونچال آیا جئیں دی وجہ تھوں جیل ہل گیا اَتے فوراً سارے دروازے گئے اَتے ساریاں دیاں سنگلیاں کھل گئیاں۔ ²⁷ ۲۷۔ دروغے دی اَکھ کھل گئی اَتے جیل دے کھلے دروازے ڈیکھے تاں قیدیاں دے بھج ونجن دے ڈر تھوں اوُں نے اپنی تلوار کڈھی تے اپنے آپ کوُ مارن لگا۔ ²⁸ ۲۸۔ پر پولُس نے اوُچی آواز نال سڈیا تے آکھیا اپن آپ کوُ نی مار کیوں جو اساں اِتھائیں ہئیں۔ ²⁹ ۲۹۔ دروغے نے چراغ منوایا اَتے اندر آن کے ڈیکھیا تے ڈر نال کمنبدا ہویا پولُس تے سیلاس دے سامنے ڈھے پیا۔ ³⁰ ۳۰۔ اُنہا کوُ باہر گھن آیا تے آکھنا لگا، " جنابمیں کیا کراں کہ بچ ونجاں؟۔ ³¹ ۳۱۔ اُنہاں نے آکھیا خداوند یسوع تے ایمان گھن آ تے توں تے تیڈا گھرانہ نجات پاسی"۔ ³² ۳۲۔ اُنہاں نے اوندے تے سارے گھر آلیاں دے سامنے خدا دا کلام سنایا۔ ³³ ۳۳۔ تاں دروغہ رات دے اوں ویلے ای اُنہاں کوُ گھن گیا اَتے اُنہاں دے زخماں کوُ صاف کیتا اَتے اوہ تے اوندے گھر آلے اوں ویلے ای بپتسمہ گِدے۔ ³⁴ ۳۴۔ اوپ پولُس تے سیلاس کوُ اُتے اپنےگھرگھن گیا تے اُنہاں دے اگے ٹُکر رکھیا۔ اوں نے اپنے سارے گھر آلیاں دے نال وڈی خوشی کیتی۔ کیوں جو اوہ سارے خدا تے ایمان گھن آئے ہَن۔ ³⁵ ۳۵۔ جیہڑے ویلے ڈِیں تھیا حاکماں تے نگراناں دے ذریعے حکم بھیجیا، " اُنہاں بندیاں کوُ ونجن ڈیوؤ"۔ ³⁶ ۳۶۔ دروغہ نے اِیں حکم دی پولُس کوُ خبر ڈِتی کہ حکماں نے آکھیا ہِے جو اِنہاں بندیاں کوُں ونجن ڈیوؤ، ہن باہر آؤ تے سلامتی نال ونجو۔ ³⁷ ۳۷۔ لیکن پولُس نے اُنہاں کوُ آکھیا، اُنہاں نے ساکوُ بغیر مقدمے دے ساریاں دے سامنے مارے حالانکہ اساں رومی ہئیں اَتے ساکوُ قید خانے وِچ سَٹے اَتے ہُن آدھے ہِن کہ اِتھوں چپ تھی کے لگے ونجو؟ بالکل نئیں اوہ آپ آون تے ساکوُ اِتھوں باہر گھن ونجن۔ ³⁸ ۳۸۔ سپاہیاں نے اے خبر حاکماں کوُ ڈِتی: حاکم ڈر گئے جیہڑے ویلے اُنہاں نے ایہہ سُنیا کہ اوہ بندے رومی ہِن۔ ³⁹ ۳۹۔ حاکم ائے اَتے اُنہاں کولوں معافی منگی، اُنہاں کوُ جیل وِچوں باہر گھن آئے اَتے اُنہاں کوُ آکھیا کہ شاہر چھوڑ کے لگے ونجن۔ ⁴⁰ ۴۰۔ وَل پولُس تے سیلاس جیل وِچوں باہر آئے تے لُدیہ دے گھر گئے۔ جیہرے ویلے پولُس تے سیلاس نے بھراواں کوُ ڈیکھیا، تاں اُنہاں دا حوصلہ ودھیا تے شاہر تھوں لگے گئے