¹ ۱۔ ہن اے بھراؤ! اساں تہاکوُ خدا دے اوُں فضل دی خبر ڈیندے ہئیں جیہڑا مکدُنیہ دی کلیسیا تے تھیا ہِے۔ ² ۲۔کہ مصیبت دی وڈی آزمائش اِچ اُنہاں دی وڈی خوشی تے سخت غریبی نے اُنہاں دی سخاوت کوُ حد تھوں زیادہ غریب کر ڈِتے۔ ³ ۳۔ اَتے میں گواہی ڈیندا ہاں کہ اُنہاں نے اپنی طاقت دے موافق بلکہ اپنی طاقت تھوں وی زیادہ اپنی خوشی نال ڈِتے۔ ⁴ ۴۔ اَتے ایں خیرات تے مقدساں دی خدمت دی شراکت دے پاروں ساکوں وڈی منت دے نال درخواست کیتی۔ ⁵ ۵۔ اَتے ساڈی اُمید دے موافق ای نئیں ڈِتے بلکہ اپنے کوُ پہلے خداوند دے اَتے وَل خدا دی مرضی دے حوالے کیتے۔ ⁶ ۶۔ ایں کیتے اساں طِطس کوُ نصیحت کیتی ہائی کہ جیویں اوُں نے پہلے شروع کیتا ہائی اوُں وے ای تساں اِچ ایں خیرات دے کم کوُ پورا وی کریسیں۔ ⁷ ۷۔ پس جیویں تساں ہر گال اِچ ایمان تے کلام تے علم تے پوری سرگرمی اَتے اوُں محبت اِچ جیہڑی ساڈے نال رکھندے ہو ودھ دے ونجو۔ ⁸ ۸۔ میں حکم دے طور تے نئیں آدھا بلکہ ایں کیتے کہ ڈوجھیاں دی سرگرمی تھوں تہاڈی محبت دی سچائی کوُ آزماؤں۔ ⁹ ۹۔ کیوں جو تساں ساڈے خداوند یسوع مسیح دے فضل کوُ جان دے ہیوے کہ اوہ اگرچہ امیر ہائی پر پر تہاڈی کیتے غریب بن گئے تاں جو تساں اوُں دی غریبی دے پاروُں امیر بن ونجو۔ ¹⁰ ۱۰۔ اَتے میں ایں گل وچ اپنی صلاح ڈیندا ہاں کیوں جو اے تہاڈے کیتے بہوں چنگی ہِے ایں کیتے کہ تساں پچھلے سال تھوں نہ صرف ایں کم اِچ بلکہ ایں ارادے کرن اِچ وی اول ہاوے۔ ¹¹ ۱۱۔ ہن اوُں کم کوُ پورا وی کرو تاکہ جیویں تساں ارادہ کرن اِچ تیار ہاوے اوُں ے ای حیثیت دے موافق پورا وی کرو۔ ¹² ۱۲۔کیوں جو اگر نیت ہووے تاں خیرات وی اوُں دے موافق مقبول تھیسی جو کجھ بندے دے کول ہِے نہ اوندے موافق جو کجھ اوندے کول نئیں۔ ¹³ ۱۳۔ اے نئیں جو بئے بندیاں کوُ آرام ملے تے تہاکوُ تکلیف تھیوے۔ ¹⁴ ۱۴۔ بلکہ برابری دے طور تے ایں ویلے تہاڈی دولت نال اُنہاں دا گھاٹا پورا تھیوے تاں جو اُنہاں دی دولت دے نال تہاڈا گھاٹا وی پورا تھیوے اَتے ایں طرح برابری تھی ونجے۔ ¹⁵ ۱۵۔ چنانچہ لکھا لاتھے کہ جئیں نے بہوں جمع کیتے اوندا کجھ وی ڈھیرنہ نکلے اَتے جئیں نے گھٹ جمع کیتے اوندا کجھ وی گھٹ نہ نکلے۔ ¹⁶ ۱۶۔ خدا دا شکر ہِے جیہڑا طِطس دے دل وچ تہاڈے کیتے اوہو جئی سرگرمی پیدا کریندا ہِے۔ ¹⁷ ۱۷۔ کیوں جو اوُں نے ساڈی نصیحت کوُ من گِدے بلکہ بڑا سرگرم تھی کے اپنی خوشی دے نال تہاڈے پاسے ٹُر پئے۔ ¹⁸ ۱۸۔ اَتے اساں اوندے نال اوندے بھرا کوُ بھیجے جیندی تعریف خوشخبری دے پاروُں ساری کلیساواں وچ تھیندی ہِے۔ ¹⁹ ۱۹۔ اَتے صرف ایہو نئیں بلکہ اوہ کلیساواں دی طرفوں ایں خیرات دے بارے وچ ساڈا سفری ساتھی مقرر تھیئے اَتے اساں اے خدمت ایں کیتے کریندے ہئیں جو خداوند دا جلال اَتے ساڈا شوق ظاہر تھیوے۔ ²⁰ ۲۰۔ اَتے اساں بچدے راہندے ہاں کہ جیہڑی وڈی خیرات دے بارے وچ خدمت کریندے ہئیں اوندے پاروُں کوُئی ساڈے تے انگلی نہ چاوے۔ ²¹ ۲۱۔ کیوں جو اساں ایہو جئی شئیاں دی سوچ وچار کریندے ہئیں جیہڑیاں نہ صرف خداوند دے نیڑے چنگیاں ہن بلکہ بندیاں دے نیڑے وی۔ ²² ۲۲۔ اَتے اساں اُنہاں دے نال اپنے اوُں بھرا کوُ گھلے جئیں کوُ اساں بہوں ساری گالہیں وچ بہوں واری آزما کے سرگرم پاتے پر چونکہ اوُں کوُ تہاڈے تے بڑا بھروسہ ہِے ایں کیتے ہن بہوں زیادہ سرگرم ہِے۔ ²³ ۲۳۔ اگر کوُئی طِطس دے پاروُں پُچھے تاں اوہ میڈا ساتھی اَتے تہاڈے کیتے میڈے نال خدمت کرن آلا ہِے۔ اگر ساڈے بھراواں دے بارے پُچھا ونجے تاں اوہ کلیساواں کوُ پیغام پچاون آلے تے مسیح دا جلال ہِن۔ ²⁴ ۲۴۔ وَل ساڈی محبت تے ساڈا اوہ فخر جیہڑا تہاڈے تے ہِے کلیساواں دے سامنے اُنہاں تے ثابت کرو۔