¹ ۱۔ میں پولس جیہڑا تہاڈے سامنے مجبور تے کنڈ پچھے تہاڈے تے دلیر ہاں مسیح دا حِلم تے نرمی یاد ڈیوا کے آپ تہاڈے اگے التماس کریندا ہاں۔ ² ۲۔ بلکہ منت کریندا ہاں کہ میکو ونج کے اوُں بہادری دے نال دلیر نہ تھیونا پووے جیندے نال میں کجھ بندیاں تے دلیر تھیون دی نیت رکھیندا ہاں جیہڑے ساکوُ ایویں سمجھدین کہ اساں جسم دے مطابق زندگی گزریندے پئے ہئیں۔ ³ ۳۔ کیوں جو اساں جسم دے مطابق حیاتی گزریندے پئے ہئیں پر جسم دےطور تے لڑدے نئیں۔ ⁴ ۴۔ ایں کیتے کہ ساڈی لڑائی دے ہتھیار جسمانی نئیں بلکہ خدا دے نیڑے قلعاں کوُ ڈھا ڈیون دے قابل ہن۔ ⁵ ۵۔ ہر اُچی شئے ڈھا ڈیندے ہئیں جیہڑی خدا کوُ جانن دے خلاف کھڑی تھی ونجے اَتے ہر ہک خیال کوُ قید کر کے مسیح دا فرمانبردار بنا ڈیندے ہئیں۔ ⁶ ۶۔ اَتے اساں تیار ہئیں کہ جڈاں تہاڈی فرمانبرداری پوری تھی ونجےتاں ہر طرح دی نافرمانی دا بدلہ گھنوں۔ ⁷ ۷۔ تساں تاں اُنہاں شئیاں کوُ ڈیدھے او جیہڑیاں اکھیاں دے سامنے ہن۔ اگر کئیں کوُ اپنے اُتے اے بھروسہ ہِے کہ اوہ مسیح دا ہِےتاں اپنے دل اِچ اِے وی سوچ گھنے کہ جیویں اوہ مسیح دا ہِے اوں ویں ایں اساں وی ہئیں۔ ⁸ ۸۔ کیوں جو اگر میں ایں ختیار تے کجھ زیادہ فخر وی کراں جیہڑا خداوند نے تہاڈے بناون کوُ ڈِتا ہِے ناں کہ وگاڑن کیتے تاں میں شرمسار نہ تھیساں۔ ⁹ ۹۔ ایہہ میں ایں کیتے آدھا ہاں کہ پتَراں دے نال تہاکو ڈراون آلا ناں ٹھہراں۔ ¹⁰ ۱۰۔کیونکہ آدھے ہن کہ اوُں دے پَتر تاں ضرور تاثیر کرن آلے زبردست ہن پر جڈاں آپ کول ہوندے تاں ماڑا جیہا معلوم تھیندے اَتے اوندی تقریر بے عزتی آلی ہِے۔ ¹¹ ۱۱۔ پس ایویں آکھن آلا سمجھ ونجے کہ جیویں کنڈ پیچھوں پَتراں اِچ ساڈا کلام ہِے اوُںویں ہی موجودگی دے ویلے ساڈا کلام وی ہوسی۔ ¹² ۱۲۔ کیوں جو ساڈی ایہہ جرات نئیں کہ اپنے آپ کوُ اُنہاں تھوڑے بندیاں دے وچ گنوُں یا اُنہاں دے نال کجھ تعلق داری کڈھوُں جیہڑے اپنی نیک نامی جتاندے ہِن پر اوہ خود اپنے آپ کوُ آپس اِچ تول کے اَتے اپنے آپ کوُ ہک ڈوجھے نال تعلق داری کڈھ کے بیوقوف ٹھہردِن۔ ¹³ ۱۳۔ پر اساں اندازے تھوں زیادہ فخر نہ کریسوں بلکہ اوُں جا دے اندازہ دے موافق جیہڑا خدا نے ساڈے کیتے مقرر کیتا ہِے۔ جیندے وچ تُساں وی آ گئے ہیوے۔ ¹⁴ ۱۴۔ کیوں جو اساں اپنے آپ کوُ حد تھوں زیادہ نئیں ودھاندے جیویں کہ تہاڈے تائیں نہ پہنچن دی صورت اِچ تھیندے بلکہ اساں مسیح دی کوشخبری ڈیندے ہوئے تہاڈے تائیں پہنچ گئے ہاسے۔ ¹⁵ ۱۵۔ اَتے اساں اندازے کولوں زیادہ یعنی ڈوجہیاں دی محنتاں تے فخر نئیں کریندے پر اُمید رکھیندے ہیں کہ جڈاں تُہاڈے ایمان اِچ ترقی تھیوے تاں اساں تُہاڈے پاروں اپنی جا دے موافق زیادہ ودھ ونجوں۔ ¹⁶ ۱۶۔ تاکہ تُہاڈی سرحد تھوں پرے خوشخبری پہنچا ڈیوؤں نہ کہ غیر دے علاقے اِچ بنی بنائی شئیاں تے فخر کروں۔ ¹⁷ ۱۷۔ غرض جیہڑا فخر کرے او خداوند تے فخر کرے۔ ¹⁸ ۱۸۔ کیونکہ جیہڑا اپنی نیک نامی جتاندے او مقبول نئیں بلکہ جئیں کوُں خداوند نیک نام ٹھہراندے اوؤ مقبول ہِے۔