¹ ۱۔ ایہہ گالہہ سچ ہِے کہ جو بندہ نگہبان دا عہدہ چاہندے اوہ چنگے کم دی خواہش کریندے۔ ² ۲۔ پس نگہبان کوُ بےالزام۔ ہِک ذال دا پئے۔ پرہیزگار۔ خدا توں ڈرن آلا۔ بااخلاق۔ مسافرپرور تے تعلیم ڈیون دے لائق ہووے۔ ³ ۳۔ نشہ اِچ شور مچاون آلا یا مارپیٹ کرن آلا نہ ہووے بلکہ حلیم ہووے۔ نہ جھگڑن آلا نہ پیسے نال پیار کرن آلا۔ ⁴ ۴۔ اپنے گھر دا پوری طرح بندوبست کریندا ہووے اَتے اپنے بالاں کوُ بہوُں زیادہ سنجیدگی دے نال تابع رکھیندا ہووے۔ ⁵ ۵۔ ( جڈاں کوُئی اپنے گھر ہی دا بندوبست کرنا نئیں جان دا تاں خدا دی کلیسیا دی خبرگیری کیویں کریسی؟)۔ ⁶ ۶۔ نَو مرید نہ تھی تاں جو تکبر کر کے کتھائیں ابلیس جیہی سزا نہ پاویں۔ ⁷ ۷۔اَتے باہر آلیاں دے نیڑے وی نیک نام تھیونا چاہیدا ہِے تاں جو ملامت اِچ تے ابلیس دے پھندے اِچ نہ پھنسن۔ ⁸ ۸۔ ایویں ای خادماں کوُ وی سنجیدہ تھیونا چاہیدے ڈوُ زبان تے شرابی تے ناجائز نفع دے لالچی نہ ہوون۔ ⁹ ۹۔ اَتے ایمان دے بھید کوُ پاک دِل اِچ حفاظت نال رکھن۔ ¹⁰ ۱۰۔ ا۔تے اِے وی پہلے آزمائے ونجن۔ اِیں دے بعد اگر بےالزام ٹھہرن تاں خدمت دا کم کرن۔ ¹¹ ۱۱۔ ایویں ای زنانیاں کوُ وی سنجیدہ تھیونا چاہیدے۔ تُہمت لاون آلیاں نہ ہوون بلکہ پرہیزگار تے ساریاں گالہیں وِچ ایمان دار ہوون۔ ¹² ۱۲۔ خادم ہِک ہِک ذال دے پئے ہوون اَتے اپنے اپنے بالاں تے گھراں دا چنگی طرح بندوبست کریندے ہوون۔ ¹³ ۱۳۔ کیونکہ جو خدمت دا کم چنگی طرح کریندِن اوہ اپنے کیتے چنگا مرتبہ تے اوُں ایمان وِچ جو مسیح یسوع تے ہِے وڈی دلیری حاصل کریندِن۔ ¹⁴ ۱۴۔ میں تیڈے کول جلدی آون دی اُمید کرن تے وی ایہہ گالہیں تیکوُ ایں کیتے لکھدا ہاں۔ ¹⁵ ۱۵۔ کہ اگر میکوُ آون اِچ دیر تھی ونجے تاں تیکوُ پتا لگ ونجے کہ خدا دے گھر یعنی زندہ خدا دی کلیسیا اِچ جو حق دا کھمبا تے بُنیاد ہِے کیویں برتاؤ کرنا چاہیدے۔ ¹⁶ ۱۶۔ اِیں دے وِچ کلام نئیں جو دین داریدا بھید وڈا ہِے یعنی اوہ جو جسن اِچ ظاہر تھیا اَتے روُح اِچ راستباز ٹھہرے تے فرشتیاں کوُ ڈِکھائی ڈِتے اَتے غیر قوماں اِچ اوُں دی مُنادی تھئی تے دُنیا اِچ اوُں دے تے ایمان گھِن آئے تے جلال اِچ اُتے چاتا گیا۔