¹ ۱۔ تُساں میڈی طرح بنو جیویں میں مسیح دی طرح بن دا ویندا ہاں۔ ² ۲۔ میں تہاڈی تعریف کریندا ہاں کہ تساں ہر گال وچ میکوُں یاد رکھیندے ہو اَتے جیویں میں تہاکوں رویاتاں پہنچا ڈیتن تُساں اوویں ہی اُنہاں کوُ برقرار رکھیندے ہو۔ ³ ۳۔ پس میں تہاکوں ایہہ ڈسنا چاہندا ہاں کہ ہر مرد دا سر مسیح تے عورت دا سر مرد تے مسیح دا سر خدا ہِے۔ ⁴ ۴۔ جیہڑا بندا سر تے کپڑا گھن کے دعا یا نبوت کریندے اوہ اپنے سر کوُ بے حرمت کریندے۔ ⁵ ۵۔ اَتے جیہڑی عورت دعا کریندے ویلے اپنے سر تے کپڑا نہ گھنے تے دعا یا نبوت کرے اوہ اپنے سر کوُ بے حرمت کریندی ہِے کیوں جو اوہ سر منڈاون دے برابر ہِے۔ ⁶ ۶۔ اگر عورت دوپٹہ نہ گھنے تاں وال وی کٹواوے۔ اگر عورت دا وال کٹواونا یا سر منڈواونا شرم دی گال ہِے تاں دوپٹہ وی گھنے ۔ ⁷ ۷۔ ہاں بندے کوُں اپنے سر تے کپڑا نئیں گھننا چاہیدا کیوں جو اوہ خدا دی صورت اَتے اوندا جلال ہِے پر عورت بندے دا جلال ہِے۔ ⁸ ۸۔ ایں کیتے کہ بندہ عورت تھوں نئیں بلکہ عورت بندے تھوں ہِے۔ ⁹ ۹۔ ایویں بندہ عورت کیتے نئیں بلکہ عورت بندے کیتے پیدا کیتی گئی ہِے۔ ¹⁰ ۱۰۔ پس فرشتیاں دے پاروں عورت کوُ چاہیدا ہِے کہ اپنے سر تے تابعداری دی ہوون دی علامت رکھے۔ ¹¹ ۱۱۔ تاں وی خداوند اِچ نہ عورت بندے تھوں بغیر ہِے نہ بندہ عورت تھوں بغیر۔ ¹² ۱۲۔ کیونکہ جیویں عورت بندت تھوں ہِےاوویں ہی بندہ وی عورت دے وسیلے نال ہِے۔ پر ساریا ں شئیاں خدا دی طرفوں ہن۔ ¹³ ۱۳۔ تساں آپ ہی انصاف کرو کیا عورت دا سر تے کپڑا نہ گھن کے خدا تھوں دعا منگنا چنگاہِے؟ ¹⁴ ۱۴۔ کیا تہاکوُ طبعی طور تے وی پتا نئیں کہ اگر بندہ لمبے وال رکھے تاں اوندی بےعزتی ہِے؟ ¹⁵ ۱۵۔ اَتے اگر عورت دے لمبے وال ہوؤن تاں اوُں دے کیتے اے عزت دی گال ہِے کیوں جو وال اوُندے پردے کیتے ڈِتے گیئن۔ ¹⁶ ۱۶۔ پر اگر کوُئی بحث کرن آلا ہووے تاں ایہہ جان گھنے کہ نہ ایہہ ایہو جیا دستور ہِے نہ خداوند دی کلیسیا دا۔ ¹⁷ ۱۷۔ لیکن ایہہ حکم جیہڑا میں ڈیندا ہاں ایندے وچ تہاڈی تعریف نئیں کریندا۔ ایں کیتے کہ تہادے جمع تھیون نال فائدہ نئیں ہتھوں نقصان تھیندا ہِے۔ ¹⁸ ۱۸۔ کیونکہ پہلے تاں میں ایہہ سندا ہاں کہ جئیں ویلے تہاڈی کلیسیا جمع تھیندی ہِے تاں تہاڈے وچ فرقے تھیندے ہن اَتے میں کافی حد تائیں ایندا یقین وی کریندا ہاں۔ ¹⁹ ۱۹۔ کیونکہ تہاڈے وچ بدعتاں دا وی ہوونا ضرار ہِے۔ تاں جو ظاہر تھی ونجے کہ تہاڈے وچوں مقبول کیہڑے ہن۔ ²⁰ ۲۰۔ پس جیہڑے ویلے تساں کٹھے تھیندے ہو تاں تہادا اوہ کھانا عشائے ربانی نئیں تھی سگدا۔ ²¹ ۲۱۔ کیونکہ کھاون ویلے ہر بندہ ڈوجھے تھوں پہلے اپنا عشا کھا گھندے اَتے کوُئی تاں بھکا رہ ویندے اَتے کئی کوُ نشہ تھی ویندے۔ ²² ۲۲۔ کیوں؟ کھاون پیون کیتے تہاڈے گھر نئیں؟ یا خدا دی کلیسیا کوُ کئی شئے نئیں سمجھدے اَتے جنہاں کول نئیں اوُنہاں کوُ شرمسار کریندے ہو؟ میں تہاکوں کیا آکھاں؟ کیا ایں گال وچ تہاڈی تعریف کراں؟ میں تعریف نئیں کریندا۔ ²³ ۲۳۔ کیونکہ ایہہ گال میکوُ خداوند تھوں پہنچی اَتے میں تہاکوُ وی پہنچا ڈِتی کہ خداوند یسوع نے جیہڑی رات اوہ پکڑوایا گئیے روٹی گھنی۔ ²⁴ ۲۴۔ اَتے شکر کر کے توڑی تے آکھے اے میڈا بدن ہِے جیہڑا تہاڈے کیتے ہِے۔ میڈی یادگاری کیتے ایویں ای کیتا کرو۔ ²⁵ ۲۵۔ ایویں ہی اوُں نے کھاون دے بعد پیالہ وی گِدے اتے آکھے اے پیالہ میڈے خون وچ نواں عہد ہِے۔ جڈاں کڈائیں وی پیو میڈی یادگاری کیتے ایویں ہی کیتا کرو۔ ²⁶ ۲۶۔ کیونکہ جڈاں کڈائیں وی تساں اے روٹی کھاندے او تے ایں پیالے وچوں پیندے ہو تاں خداوند دی موت دا اظہار کریندے ہو جڈاں تائیں اوہ نہ آوے۔ ²⁷ ۲۷۔ ایں کیتے جیہڑا کوُئی نامناسب طریقے نال خداوند دی روٹی کھاوے یا اوندے پیالے وچوں پیوے اوہ خداوند دے بدن تے خون دے بارے وچ قصوروار ٹھہرسی۔ ²⁸ ۲۸۔ پس بندہ اپنے آپ کوُ آزما گھنے اَتے ایں طرح اوُں روٹی وچوں کھاوے تے اوُں پیالے وچوں پیوے۔ ²⁹ ۲۹۔ کیوں جو کھاون پیون ویلے خداوند دے بدن کوُ نہ سنجھانے اوہ ایں کھاون پیون تھوں سزا پاسی۔ ³⁰ ۳۰۔ ایں دے پاروں تہاڈے وچوں بہوں سارے کمزور تے بیمار ہن اَتے بہوں سارے سو وی گئے۔ ³¹ ۳۱۔ اگر اساں اپنے آپ کوُ جانچتے تاں سزا نہ پاندے۔ ³² ۳۲۔ پر خداوند ساکوُ سزا ڈے کے ساڈی تربیت کریندے تاں جو اساں دُنیا دے نال مجرم نہ ٹھہروں۔ ³³ ۳۳۔ پس اے میڈے بھراؤ! جڈاں تساں کھاون کیتے جمع تھیوؤ تاں ہک ڈوجھے دی راہ ڈیکھو۔ ³⁴ ۳۴۔ اگر کوُئی بھکا ہوئے تاں اپنے گھر وچ کھا گھنے تاکہ تہاڈا جمع تھیونا سزا دا باعث نہ تھیوے اَتے باقی گالہیں کوُں میں آ کے ٹھیک کر ڈیساں۔