¹ ۱۔ اے بھراؤ! میں نئیں چاہندا کہ تہاکوں روحانی نعمتاں دے بارے وچ پتا نہ لگے۔ ² ۲۔ تساں جان دے ہو کہ جڈاں تساں غیر قوم ہاسے تاں گونگے بتاں دے پچھے جیویں کوُئی تہاکو گھن ویندا ہائی اوویں ہی لگے ویندے ہاوے۔ ³ ۳۔ پس میں تہاکوں ڈسیندا ہاں کہ جو کوُئی خدا دے روح دی ہدایت نال بولیندے اوہ نئیں آدھا کہ یسوع ملعون ہِے اَتے نہ ہی کوُئی روح القدس دے بغیر آکھ سگدے کہ یسوع خداوند ہے۔ ⁴ ۴۔ نعمتاں تاں طرح طرح دیاں ہن پر روح ہک ای ہِے۔ ⁵ ۵۔ اَتے خدمتاں وی طرح طرح دیاں ہن پر خداوند ہک ای ہِے۔ ⁶ ۶۔ اَتے تاثیراں وی طرح طرح دیاں ہن پر خدا ہک ای ہِےجیہڑا ساریاں وچ ہر طرح دا اثر پیدا کریندے۔ ⁷ ۷۔ لیکن ہر بندے وچ روح دا اظہار فائدہ پُچاون کیتے تھیندا ہِے۔ ⁸ ۸۔ کیونکہ ہک کوُ روح دے وسیلے نال حکمت دا کلام ملدے اَتے ڈوجھے کوُ اوُں روح دی مرضی دے وسیلے علمیت دا کلام۔ ⁹ ۹۔ کئیں کوُ اوُں روح تھوں ایمان تے کئیں کوُ اوُں ہک روح تھوں شفا ڈیون دی توفیق ملدی ہِے۔ ¹⁰ ۱۰۔ کئیں کوُ معجزیاں دی قدرت۔ کئیں کوُ نبوت۔ کئیں کوُ روحاں دا امتیاز۔ کئیں کوُ طرح طرح دیاں زباناں۔ کئیں کوُ زباناں دا ترجمہ کرنا۔ ¹¹ ۱۱۔ لیکن ایہہ ساریاں تاثیراں اوُو ہک روح کریندے اَتے جئیں کوُ چاہندے ڈیندے۔ ¹² ۱۲۔ کیونکہ جیویں بدن ہک ہِے اَتے اوندے حصے بہوں سارے ہن تے بدن دے سارے حصے گو بہوں سارے ہن پر مل کے ہک ای بدن ہِے اوُویں ای مسیح وی ہِے۔ ¹³ ۱۳۔ کیونکہ اساں ساریاں نے خواہ یہودی ہوون خواہ یونانی۔ خواہ غلام خواہ آزاد۔ ہک ای روح دے وسیلے نال ہک بدن ہوون کیتے بپتسمہ گِدے اَتے اساں ساریاں کوُ ہک ای روح پیوایا گئے۔ ¹⁴ ۱۴۔ چنانچہ بدن اِچ ہک ہی حصہ نئیں بلکہ بہوں سارے ہن۔ ¹⁵ ۱۵۔ اگر پیر آکھے چونکہ میں ہتھ نئیں ایں کیتے بدن دا نئیں تاں او ایں دے پاروں بدن تھوں کڈھا تاں نئیں گیا۔ ¹⁶ ۱۶۔ اَتے اگر کن آکھے چونکہ میں اَکھ نئیں ایں کیتے بدن دا نئیں تاں اوہ ایں پاروں بدن تھوں کڈھا نئیں گیا۔ ¹⁷ ۱۷۔ اگر سارا بدن اَکھ ای ہوے ہا تاں کِتھوں سنوں ہا؟ اگر سننا ای سننا ہوئے ہا تاں سونگھوں کِتھوں ہا؟۔ ¹⁸ ۱۸۔ پر حقیقت اِچ خدا نے ہر ہک حصے کوُ بدن اِچ اپنی مرضی دے موافق رکھے۔ ¹⁹ ۱۹۔ اگر اوہ سارے ہک ای حصہ ہوون ہا تاں بدن کِتھاں ہوئے ہا؟۔ ²⁰ ۲۰۔ پر ہن حصے تاں بہوں سارے ہن لیکن بدن ہک ای ہِے۔ ²¹ ۲۱۔ اَکھ ہتھ کو نئیں آکھ سگدی کہ میکوُ تیڈی ضرورت نئیں اَتے نہ سر پیر کوُ آکھ سگدے کہ میکوُ تیڈی ضرورت نئیں۔ ²² ۲۲۔ بلکہ بدن دے اوہ حصے جیہڑے ڈوجیاں کولوں کمزور لگدے ہن بہوں ای ضروری ہن۔ ²³ ۲۳۔ اَتے بدن دے اوہ حصے جنہاں کوُں اساں ڈوجیاں دی نسبت حقیر جان دے ہئیں اُنہاں کوُں ہی زیادہ عزت ڈیندے ہئیں اَتے ساڈے اوہ حصے جنہاں کوُں اساں پسند نئیں سے کریندے پسند آون لگ پوندین۔ ²⁴ ۲۴۔ حالانکہ ساڈے پسند آون آلے حصے محتاج نئیں پر خدا نے بدن کوُ ایں طرح ترتیب ڈِتی ہِے کہ جیہڑا حصہ محتاج ہِے اوُں کوُ زیادہ عزت ڈِتی ونجے۔ ²⁵ ۲۵۔ تاں بدن اِچ تفرقہ نہ پووے بلکہ حصے ہک دوجھے دی برابر فکر رکھن۔ ²⁶ ۲۶۔ اگر ہک حصے کوُ ڈکھ ملدے تاں ساریاں حصیاں کوں ڈکھ ملدے اَتے اگر ہک حصہ عزت پاندے تاں سارے حصے اوُندے نال خوش تھیندین۔ ²⁷ ۲۷۔ ایں طرح تساں مل کے مسیح دا بدن ہو اَتے ہک ہک حصے ہو۔ ²⁸ ۲۸۔ خدا نے کلیسیا اِچ الگ الگ بندے مقرر کیتے ہن۔ پہلے رسول ڈوجھے نبی تریجھے استاد۔ وَل معجزے ڈکھاون آلے۔ وَل شفا ڈیون آلے۔ مدد کرن آلے۔ انتظام کرن آلے۔ طرح طرح دیاں زباناں بولن آلے۔ ²⁹ ۲۹۔ کیا سارے رسول ہن؟ کیا سارے نبی ہن؟ کیا سارے استاد ہن؟ کیا سارے معجزہ ڈکھاون آلے ہن؟۔ ³⁰ ۳۰۔ کیا ساریاں کوُ شفا ڈیون دی طاقت ملی ہِے؟ کیا سارے طرح طرح دیاں زباناں بولیندین؟ کیا سارے ترجمہ کریندین؟ ³¹ ۳۱۔ تُساں وڈی تھوں وڈی نعمتاں دی آرزو رکھو لیکن میں تہاکوُ ایندے کولوں وی ہک اعلیٰ طریقہ ڈسیندا ہاں۔