1
۱۔ اے تُوں جیہڑا حق تعالیٰ دی لُکن دی تھاں وچ رہناںایں۔ تے قادرِمُطلق دے سائے وچ ٹھہرناایں ۔
2
۲۔ رَب نُوں آکھ "اے میری لُکن دی تھاں تے میرے قعلے ۔ اے میرے خُدا جہدے اُتے میرا بھروسہ اے ۔
3
۳۔ کیوں جو اوہ تینوں شکار کرن والے دے جال تَوں ۔ تے خطرناک وَبا تَوں رہائی دے گا ۔
4
۴۔ اوہ تیرے اُتے اپنے کھنباں دی چھاں کرے گا ۔ تے اوہدیاں بانہاں ہیٹھاں تینوں لُکن دی تھاں مِلے گی۔ اوہدی سچائی تیرے لئی سِپر تے ڈھال اے۔
5
۵۔ ناں رات دی دہشت تَوں تینوں ڈرنا پَوے گا ۔ تے ناں ای دِن وچ اُڈن والے تیر تَوں ۔
6
۶۔ نہ اوس وَبا ای تَوں جیہڑی ہنیرے وچ چلدی اے۔ تے ناں ایں اوس ہلاکت تَوں جیہڑی اَدھی دپہر دے ویلے اُجاڑ کر دی اے۔
7
۷۔ تیرے آسے پاسے ہزار وی ڈِگ جان ۔ تے دس ہزار تیرے سَجے ہتھ وَل۔ پَر تیرے نیڑے اوہ نئیں آوے گی۔
8
۸۔ سو تُوں اپنیاں ای اَکھاں نال ایہہ ویکھیں گا ۔ تے شریراں دے انجام نُوں جانیں گا ۔
9
۹۔ کیوں جو رَب تیری لُکن دی تھاں اے۔ تے تُوں حق تعالیٰ نُوں اپنا حفاظت کرن والا بنایااے۔
10
۱۰۔ کوئی آفت تیرے اُتے نئیں آوے گی ۔ تے ناں کوئی بَلا ای تیرے خیمے دے نیڑے آوے گی۔
11
۱۱۔ کیوں جو اوہنے اپنے فرشتیاں نُوں تیرے بارے حکم دِتا اے ۔ پئی تیریاں سب راہواں وچ تیری حفاظت کرن۔
12
۱۲۔ اوہ تینوں اپنے ہتھاں اُتے چُک لین گے ۔ اینج ناں ہووے پئی تیرے پیراں نُوں رَوڑے نال ٹھیڈا لگ جاوے۔
13
۱۳۔ تُوں شیر ببر تے سَپ نُوں لتاڑیں گا ۔ جوان شیر تے اَژدہے نُوں مدھولیں گا ۔
14
۱۴۔ " جیوں کے اوس نیں میرے نال تعلق رکھیا اے میں اوہنوں نجات دیواں گا میں اوہدی حفاظت کراں گا ایس لئی اوہنے میراں ناں سیہانیاں اے۔ اوہ مینوں بُلائے گا ۔ تے میں اوہدی سُناں گا ۔
15
۱۵۔ مصیبت دے ویلے میں اوہدے نال رہواں گا ۔ میں اوہنوں چُھڈواں گا تے اوہنوں جلال بخشاں گا ۔
16
۱۶۔ میں اوہنوں لمی عمر دیواں گا۔ تے اپنی نجات اوہنوںوَکھاواں گا ۔