¹ ۱۔ (سُلیمان وَلوں) یارَبا ۔بادشاہ نُوں اپنا نیاں ۔ تے شہزادے نُوں اپنی سچائی بخش۔ ² ۲۔ تے اوہ تیری سچائی نال تیری قوم اُتے۔ تے نیاں نال تیرے غریباں اُتے حُکمران ہووے گا ۔ ³ ۳۔ قوم دی سلامتی لئی پہار ۔ تے ٹیلے سچائی دا پھَل پیدا کرن گے ۔ ⁴ ۴۔ اوہ قوم دے غریباں دے حقوق سنبھال کے رکھے گا ۔ اوہ مسَکیناں دی اولاد نُوں بچالے گا ۔ تے ظالم نُوں چِکنا چور کر دے گا ۔ ⁵ ۵۔ جدوں تیک سورج تے چان نیں ۔ اوہ پیڑھیوں پیڑھی قائم رہوے گا ۔ ⁶ ۶۔ اوہ بارِش وانگ چرن والیاں تھانواں اُتے نازل ہووےگا ۔ جھَڑیاں وانگ جیہڑی دھرتی تے پانی پانی کر دیاں نیں ۔ ⁷ ۷۔ اوہدے دیہاڑیاں وچ راستی نرم ہووے گی ۔ تے جدوں تیک چَن قائم اے اَمن دی بہتات رہوے گی۔ ⁸ ۸۔ اوہ سمندر تَوں سمندر تیک ۔ تے دریا تَوں لے کے دھرتی دے اَخیر تیک حکومت کرے گا۔ ⁹ ۹۔ اوہدے ویری اوہدے اَگے جُھکن گے ۔ تے اوہدے مخالف مِٹی چٹن گے۔ ¹⁰ ۱۰۔ شاہانِ تر شیشؔ تے جزیرے نذراں چڑھان گے ۔ شاہانِ عربؔ تے سَبا ؔ دے ہدیئے لیاؤن گے ۔ ¹¹ ۱۱۔ تے سارے بادشاہ اوہنوں سجدہ کرن گے۔ ساریاں قوماں اوہدیاں خدمت کرن گِیاں ۔ ¹² ۱۲۔ کیوں جو اوہ متھاج نُوں جدوں اوہ فریاد کر ے۔ تے غریب نُوں جہدا کوئی مدد کرن والا نہ ہووے چُھڈائے گا ۔ ¹³ ۱۳۔ اوہ مَسکین تے متھاج اُتے ترس کھاوے گا ۔ تے متھاجاں دی جاناں بچائے گا ۔ ¹⁴ ۱۴۔ اوہ اوہناں نُوں ظلم تے جَبر تَوں خلاصی دیوے گا ۔ تے اوہناں دا لَہو اوہناں دے نیڑے بڑا قیمتی ہووے گا ۔ ¹⁵ ۱۵۔ سو اوہ زندہ رہووے گا تے عربؔ دا سونا اوہنوں دِتا جاوے گا ۔ تے اوہدے لئی دُعا کیتی جاوے گی ۔ اوہ ہر ویلے دھن اَکھوائے گا ۔ ¹⁶ ۱۶۔ دھرتی اُتے ودھیرا غلہ ہووےگا ۔ اوہدی پیداوار پہاڑاں دی چوٹی اُتے لُبنانؔ وانگوں لہلائے گی۔تے جیہڑے شہراں وچ وسدے نیں اوہ دھرتی دی گھاہ وانگ سر سبز ہون گے ۔ ¹⁷ ۱۷۔ اوہدا ناں ہمیشاں تیک دھن رہووے گا ۔ جدوں تیک آفتا ب اے اوہدا ناں قائم رہووے گا ۔ اوہدے وچ دھرتی دے سارے قبیلے برکت پاؤن گے۔ ساریاں قوماں اوہنوں دھن آکھن گِیاں ۔ ¹⁸ ۱۸۔ رَب اسرائیل دا خُدا دھن ہووے ۔ صرف اوہو ای عجیب عجیب کم کر دا اے۔ ¹⁹ ۱۹۔ تے اوہدا جلالی ناں ہمیشاں تیک دھن ہووے۔ تے ساری دھرتی اوہدے جلال نال بھر جاوے ۔آمین ثُم آمین ۔ ²⁰ ۲۰۔ ختم یسیؔ دے پُتر داؤد دی عرضی ختم ۔