لِکھے ہوئے ایمان دے لئی قوماں اُتے بَرکت ۔ میِر مُغنی دے لئی ۔ تارد ار سازاں دے نال ۔ زبُور ۔ گیِت۔ ¹ ۱۔ رَبّ ساڈے تے رحم کرے تے ساہنوں بَرکت دیوے اوہ اَپنا مُکھڑا ساڈے اُتے چمکاوے ² ۲۔ تاں جو دھرتی اُتے اوہدی راہ دی تے ساریاں قوماں وِچ اوہدی رہائی پچھان ہووے ۔ ³ ۳۔ یا رَبّ ۔ قوماں تیری تعریِف کَرن تے ساریاں قوماں تیری وڈیائی کرن ۔ ⁴ ۴۔ اُمتّاں وَسدیاں رہن تے خُوش ہون کیوں جو تُوں سچیائی نال قوماں اُتے راج تے دھرتی تے اُمتّاں نُوں مَتّاں دینا ایں ⁵ ۵۔ یا رباّ! قوماں تیریا وڈیائی کرن تے ساریاں قوماں تیری تعریف کرن ⁶ ۶۔ دھرتی نے اَپنا اناج دے دِتا اے رَبّ ساڈے خُدا نے ساہنوں بَرکت دِتی اے ⁷ ۷۔ رَبّ ساہنوں بَرکت دیوے تے ساری دھرتی اوہدا ڈَر منان یا رَبّا! قوماں تیری وڈیائی کرن تے ساریاں قوماں تیری تعریِف گان ۔