خلاصی دے مگروں شُکر گُذاری میِر مُغنی دے لئی ۔ گیِت ۔ زبُور۔ ¹ ۱۔ اَے سارے دیسو۔ خُدا دے لئی خُوشی دا نعرہ مارو۔ ² ۲۔ او ہدے ناں دے جلال د ا گیِت گاؤ اوہدے لئی اِک ودھیا تعریف دا گیِت سُناؤ ۔ ³ ۳۔ خُدا نُوں آکھو پئی تیرے کَم کیِہڈے وَڈے نیں ۔ تیرے وَڈے کماں دے سببوں تیرے ویری تیری تعریف کردے نیں ۔ ⁴ ۴۔ ساری دھرتی تیرے اَگے مَتھا ٹیکے تے گیِت گاوے تیرے ناں دا گیِت گاوے ⁵ ۵۔ آ کے ربّ دے کماں نُوں ویکھو ۔ دھرتی دے لوکاں چہ اوہنے کِہنے وَڈے وَڈے کَم کیِتے نیں ⁶ ۶۔ اوہنے سمُندر نُوں سُکا دِتا اے اوہنے دریا نُوں پیریں ٹُر کے پار کیِتا اے ایس لئی آؤ اسیں سا رے اوہدے چہ خُوشی منایئے ۔ ⁷ ۷۔ اوہ اَپنے وَڈے کماں نال سدا تیِکر راج کردا اے اوہدیاں اَکھاں قوماں نُوں ویہندیاں رہندیاں نیں۔ تاں جو باغی ہو کے مان ناں کرن ⁸ ۸۔ اے قومو! ساڈے رَب ّ نُوں بھَلا آکھو تے اوہدی تعریف دا بول بالا اُچا کرو ⁹ ۹۔ اوہنے ساڈی جان نُوں حیاتی دِتی اے تے سڈے پیراں نُوں تِلکن نئیں دِتا ¹⁰ ۱۰۔ کیوں جو اے رَبّ تُوں ساہنوں پَرکھیا اے تُو ساہنوں اَگ نال اینج تایا اے جیویں چاندی تائی جاندی اے ¹¹ ۱۱۔ تُوں ساہنوں پھاہی چہ پھسایا اے ۔ تُوں تے ساڈے لکاں تے بھار دی پنڈ رکھی اے ¹² ۱۲۔ تُوں لوکاں نُوں ساڈے سراں اُتے چڑھا دِتا اے ۔ اسیں اَگ تے پانی چوں لنگھے ۔ پَر تُوں فیر وی ساہنوں آرام دِتا اے ¹³ ۱۳۔ میں سوختنی قُربانیاں لَے کے تیری بارگاہ وِچ وڑاں گا ۔ تے اَپنیا ں مَنتّاں تیرے اَگے چڑھاواں گا ۔ ¹⁴ ۱۴۔ اوہ جیہڑیاں تنگی وِچ میرے مُونہوں نِکلیاں۔ تے اوہ جیہڑیاں میں اَپنے مُونہوں مَنیاں۔ ¹⁵ ۱۵۔ میں تگڑیاں تگڑیاں بھیڈاں دیاں سوختنی قُربانیاں وَچھیاں دی چَربی دے نال تیرے اَگے چڑھاوں گا ۔ میں ڈھگے تے بکرے چڑھاواں گا ۔ ¹⁶ ۱۶۔ تُسیں سارے جیہڑے رَبّ توں ڈردے او آکے سُنو میں تُہانُوں دَساں گا پئی اوہنے میرے لئی کیِہ کیِہ کیِتا اے۔ ¹⁷ ۱۷۔ میں اَپنے مُونہوں اوہنوں ای واجاں ماریاں تے اَپنی جیِبھ نال اوہدے تعریِف کیِتی ¹⁸ ۱۸۔ جے میں اَپنے اَندروں بدی کرن لئی سوچدا تے رَبّ میری ناں سُندا ¹⁹ ۱۹۔ پَر رَبّ نے مَن لئی اوہنے میری دُعا دی گَل اُتے دھیان دِتا ²⁰ ۲۰۔ رَبّ بھلا اے جِہنے میری دُعا نُوں ردیا نئیں تے ناں اَپنی بھلیائی نُوں میرے توں پراں رَکھیا