آگو گویّئے جوگی تار والے سازاں نال داؤد دا مشکیل ¹ ۱۔ ائےے خداوند میری دعا اُتے کن دھر اتے میری منت تھوں مونھ نا پھیر ² ۲۔ میرے ول دھیان کر اتے مینوں جواب دے میں دکھ نال بے چین ہو کے ہاواں بھرناں ³ ۳۔ ویری دی للکار نال اتے شریر دے ظلم پاروں کیوں جو اوہ میرت اُتے بریائی لد دے اتے قہر وچ مینوں ستاؤندے نیں ⁴ ۴۔ میرا من میرے اندر بے چین اے اتے موت دا ہؤل میرے اُتے چھا گئیا اے ⁵ ۵۔ ڈر اتے کنبنی میرے اُتے چڑھ گئے ہیبت نے مینوں آ نپئیا اے ⁶ ۶۔ اتے میں آکھیا کاش پئی کبوتر وانگ میرے پر ہوندے تاں میں اُڈ جاندا اتے مینوں آرام ملدا ⁷ ۷۔ فیر تاں میں کدرے دور نکل جاندا اتے جنگل جا ڈیرا لاؤندا (سِلاہ) ⁸ ۸۔ میں نھیری دے جھُلے اتے طوفان تھوں کسے لُکن دی تھاں وچ نس جاندا ⁹ ۹۔ ائے خداوند! اوہناں نوں مار اتے اوہناں دی جیبھ وچ فرق پا کیوں جو میں شہر وچ ظلم اتے جھگڑا ویکھیا اے ¹⁰ ۱۰۔ دنے راتیں اوہ شہر دی کندھ اُتے پھِردے نیں بریائی اتے فساد اوہدے اندر نیں ¹¹ ۱۱۔ شرارت اوہدے بی وچ وسی ہوئی اے ظلم اتے فریب اوہدی گلیاں وچوں دور نئیں ہوندے ¹² ۱۲۔ جنہے مینوں ملامت کیتی اوہ میرا ویری نئیں سی نئیں تاں میں اوہنوں برداشت کر لیندا اتے جنہے میرے برخلاف گھمنڈ کیتا کیہ اوہ میرے نال ویر رکھن والا نئیں سی نئیں تاں میں اوہدے تھوں لُک جاؤندا ¹³ ۱۳۔ سگوں اوہ تاں توں ای سیں جہڑا میرے ساہمنے سی میرا مِتر اتے میرا جانی یار سی ¹⁴ ۱۴۔ ساڈی گل بات مِٹھی سی اتے منڈلی دے نال رب دے گھر وچ پھردے ساں ¹⁵ ۱۵۔ اوہناں نون موت یکدم آن نپے گی اوہ جیوندے جی پاتال وچ جا لتھن گے کیوں جو شرارت اوہناں دے مسکناں وچ اتے اوہناں دے اندر اے ¹⁶ ۱۶۔ پر میں تاں رب نوں واج ماراں گا اتے خداوند مینوں بچا لؤے گا ¹⁷ ۱۷۔ سرگھی اتے دھمی اتے دوپہر ویلےنوں میں فریاد کراں گا اتے ہاؤاں بھردا رہاں گا اتے اوہ میری واج سُن لؤے گا ¹⁸ ۱۸۔ اوہنے اوس لڑائی نال جہڑی میرے برخلاف سی، میری جان نوں سلامت چھڈا لئیا کیوں جو میرے نال لڑن والے بتھیرے سن ¹⁹ ۱۹۔ رب، جہڑا ازلاں تھوں اے سُن لؤے گا اتے اوہناں نوں جواب دؤے گا (سِلاہ) ایہہ اوہ نیں، جنہاں جوگی پلٹا نئیں اتے جہڑے رب تھوں نئیں ڈردے ²⁰ ۲۰۔ اوس شخص نے اجہیاں اُتے ہتھ ودھایا اے، جہڑے اوہدے نال صلح رکھدے سن اوہنے آپنے عہد نوں بھن دِتا اے ²¹ ۲۱۔ اوہدا مونھ مکھن وانگ چِکنا سی پر اوہدے دل اندر جنگ سی اوہدیاں گلاں تیل نالوں چوکھیاں نرم پر ننگی تلواراں سن ²² ۲۲۔ آپنا بھار خداوند اُتے سُٹ دے۔ اوہ تینوں سمبھالے گا اوہ سچے نوں کدی ہُلار نا کھاؤں دؤے گا ²³ ۲۳۔ پر ائے رب! توں اوہناں نوں موت دے کھڈے وچ لاہؤیں گا خونی اتے دغا باز آپنی ادھی حیاتی تیکر وی جیوندے نا رہن گے پر میں تیرے اُتے بھروسا کراں گا