آگو گویّئے جوگی داؤد دا مزمور اوہدے بت سبع کول جاؤن تھوں مگروں جد ناتن نبی اوہدے کول آیا ¹ ۱۔ ائے رب آپنی شفقت دے حساب نال میرے اُتے رحم کر آپنی رحمت دی چوکھ دے حساب نال میری خطاؤاں مٹا دے ² ۲۔ میری بریائی نوں میرے اُتوں دھؤ دے اتے میرے گناہ تھوں مینوں پاک کر ³ ۳۔ کیوں جو میں آپنی خطاؤاں نوں من دا ہاں اتے میرا گناہ ہمیشاں میرے اگے رہندا اے ⁴ ۴۔ میں نِرا تیرا ای گناہ کیتا اے اتے اوہ کم کیتا اے، جہڑا تیری نگاہ وچ برا اے تاں جو توں آپنی گلاں وچ راست گِنیا جاؤیں اتے آپنی عدالت وچ بے عیب رہؤیں ⁵ ۵۔ ویکھ! میں بریائی وچ شکل پھڑی اتے میں گناہ دے حال وچ ماں دی کُکھے پئیا ⁶ ۶۔ ویکھ!توں اندر دی سچیائی نوں چنگا جان دا ایں اتے من اندر ای مینوں دانائی سکھاؤیں گا ⁷ ۷۔ زوفے نال مینوں صاف کر تاں میں پاک ہؤاں گا مینوں دھؤ اتے میں برف نالوں چوکھا چِٹا ہؤاں گا ⁸ ۸۔ مینوں خوشی دی خبر سنا تاں جو اوہ ہڈیاں جہڑیاں توں بھن دِتیاں نیں، خوش ہون ⁹ ۹۔ میرے گناہواں ولوں آپنا مونھ پھیر لے اتے میری سبھے بریائی مٹا سُٹ ¹⁰ ۱۰۔ ائے رب! میرے اندر پاک دل پیدا کر اتے میرے اندر نویں سِریوں قائم رہن والی روح پا۔ ¹¹ ۱۱۔ مینوں آپنے حضوروں نا کڈھ اتے آپنی روح نوں میتھوں وکھ نا کر ¹² ۱۲۔ آپنی نجات دی خوشی مینون فیر بخش دے اتے سجری روح نال مینوں سمبھال ¹³ ۱۳۔ تد میں گناہیاں نوں تیری راہ سکھاؤاں گا اتے گناہی تیرے ول پھِرن گے ¹⁴ ۱۴۔ ائے رب! ائے میرے نجات دین والے رب! مینوں لہؤ دے گناہ تھوں چھڈا تاں میری جیبھ تیری سچیائی دا گیت گاؤے گی ¹⁵ ۱۵۔ ائے خداوند! میرے بُلھاں نوں کھول دے تاں میرے مونہوں تیری وڈیائی بیان ہؤے گی ¹⁶ ۱۶۔ کیوں جو قربانی وچ تیری خوشی نئیں نئیں تاں میں دیندا سوختنی قربانی تھوں تینوں کجھ خوشی نئٰں ¹⁷ ۱۷۔ ٹُٹی روح رب دی قربانی اے ائے رب! توں ٹُٹے دل نوں حقیر نا جانیں گا ¹⁸ ۱۸۔ آپنے کرم نال صیون دے نال بھلیائی کر یروشلیم دی کندھ نوں بنا ¹⁹ ۱۹۔ تد توں سچیائی دی قربانیاں اتے سوختنی قربانی اتے پوری سوختنی قربانی نال خوش ہؤیں گا اتے اوہ تیرے مذبحے اُتے وچھے چاڑھن گے