آسف دا مزمور ¹ ۱۔ رب خداوند نے ککلام کیتا اتے چڑھدے تھوں لہندے تیکر لوکائی نوں سدیا ² ۲۔ صیون وچوں، جہڑا سوہن پنے دا انت اے خدا نظریں آیا ³ ۳۔ ساڈا رب آؤے گا اتے چُپ نئیں رہؤے گا اگ اوہدے اگے اگے ساڑدی جاؤے گی اتے اوہدے چواں پاسے چوکھی نھیری جھُلے گی ⁴ ۴۔ آپنی امت دا نئیاں کرن جوگی اوہ عرش اتے فرش نوں سدے گا ⁵ ۵۔ پئی میرے پاک لوکاں نوں میرے حضور کٹھا کرو جنہاں نے قربانی نال دے راہیں میرے نال عہد بنھیا اے ⁶ ۶۔ اتے عرش اوہدی سچیائی بیان کرن گے کیوں جو رب آپ ای نئیاں کرن والا اے (سِلاہ) ⁷ ۷۔ ائے میری امت سُن۔ میں کلام کراں گا اتے ائے اسرائیل! میں تیرے اُتے گواہی دؤاں گا رب، تیرا رب میں ای ہاں ⁸ ۸۔ میں تینوں تیری قربانیاں پاروں طعنے نئیں ماراں گا اتے تیری سوختنی قربانیاں برابر میرے سامنے رہندِیاں نیں ⁹ ۹۔ نا میں تیرے گھروں ڈھگے لؤاں گا نا تیرے واڑے وچوں بکرے ¹⁰ ۱۰۔ کیوں جو جنگل دا اک اک ڈنگر اتے ہزاراں پہاڑاں دے چوپائے میرے ای نیں ¹¹ ۱۱۔ میں پہاڑاں دے سبھے پکھیرؤاں نوں جان دا ہاں اتے میدان دے درندے میرے ای نیں ¹² ۱۲۔ جیکر میں بھُکا ہوندا تاں تینوں نا آکھدا کیوں جو دھرتی اتے اوہدی سبھے بھروائی میری ای اے ¹³ ۱۳۔ کیہ سنڈیاں دا گوشت کھاؤاں گا؟ یاں بکریاں دا لہؤ پیؤاں گا؟ ¹⁴ ۱۴۔ رب جوگی شکر گزاری دی قربانی کر اتے اوہدے جوگی آپنی منتاں پورِیاں کر ¹⁵ ۱۵۔ اتے مصیبت دے دیہاڑے میتھوں فریاد کر میں تینوں چھڈاؤاں گا اتے توں میری وڈیائی کریں گا ¹⁶ ۱۶۔ پر رب شریر نوں آکھدا اے تینوں میرے حکم بیان کرن نال کاہدا واسطا؟ اتے توں میرے عہد نوں آپنی جیبھ اُتے کیؤں لئیاؤنا ایں؟ ¹⁷ ۱۷۔ جد پئی تینوں سِکھن نال ویر اے اتے میریاں گلاں نوں کنڈ پچھے سُٹ دینا ایں ¹⁸ ۱۸۔ توں چور نوں ویکھ کے اوہدے نال رل گئیا اتے زنا کرن والیاں دا شریک رہیا ¹⁹ ۱۹۔ تیرے مونہوں بریائی نکلدی اے اتے تیری جیبھ دھوکھا گھڑدی اے ²⁰ ۲۰۔ توں بیٹھا بیٹھا آپنے بھرا دی بریائی کرنا ایں تے آپنی ای ماں دے پُتر اُتے تہمت لاؤنا ایں ²¹ ۲۱۔ توں ایہہ کم کیتے اتے میں چُپ رہیا تینوں جاپئیا پئی میں تیرے جہیا ای ہاں پر میں تینوں ملامت کر کے ایہناں نوں تیری اکھاں اگے چون کر کے رکھاں گا ²² ۲۲۔ ہون ائے رب نوں بھُلن والیو! سوچ لؤ انج نا ہؤے پئی میں تہانوں پاڑ دیؤاں اتے کوئی چھڈاؤن والا نا ہؤے ²³ ۲۳۔ جہڑا شکر گزاری دی قربانی کردا اے اوہ میری وڈیائی کردا اے اتے جہڑا آپنا چال چلن چنگا رکھدا اے اوہنوں یں رب دی نجات وکھاؤاں گا