آگو گویّئے جوگی داؤد دا زبور ¹ ۱۔ دھن اے اوہ، جہڑا ماتڑ دی دا خیال رکھدا اے خداوند مصیبت دے دیہاڑے اوہنوں چھڈاؤے گا ² ۲۔ خداوند اوہنوں بچاؤے گا اتے جیوندا رکھے گا اتے اوہ دھرتی اُتے دھن ہؤے گا توں اوہنوں اوہدے ویرِیاں دی منشا اُتے نا چھڈ ³ ۳۔ خداوند اوہنوں بیماری دے بسترے اُتے سمبھالے گا توں اوہدی بیماری وچ اوہدے سبھے بسترے نوں چنگا کردا ایں ⁴ ۴۔ میں آکھیا ائے خداوند! میرے اُتے رحم کر میری جان نوں شفا دے کیوں جو میں تیرا گناہی ہاں ⁵ ۵۔ میرے ویری ایہہ آکھ کے میری بریائی کردے نیں پئی اوہ کدوں مرے گا اتے اوہدا ناں کدوں مِٹے گا؟ ⁶ ۶۔ جد اوہ مینوں مِلن آؤندا اے تاں جھوٹِیاں گلاں کردا اے اوہدا دل آپنے اندر بدی سمیٹدا اے اوہ باہر جا کے اوسے دا ای کھِلما کردا اے ⁷ ۷۔ میرے نال ویر رکھن والے سبھے کٹھے ہو کے میری بریائی کردے نیں اوہ میرے برخلاف میرے نقصان دے منصوبے بنھدے نیں ⁸ ۸۔ اوہ آکھدے نیں ایہنوں تاں بُرا روگ لگئیا اے ہون جہڑا ایہہ پئیا اے تاں فیر نئیں اُٹھ سکدا ⁹ ۹۔ سگوں میرے جانی یار نے، جہدے اُتے مینوں بھروسا سی، اتے جہڑا میرا ٹُکر کھاؤندا سی میرے اُتے لت چُکی اے ¹⁰ ۱۰۔ پر توں اے خداوند! میرے اُتے رحم کر کے مینوں کھلاہر تاں جو میں اوہناں نوں بدلا دؤاں ¹¹ ۱۱۔ ایس پاروں میں جان گئیا پئی توں میتھوں خوش ایں پئی میرا ویری میتھوں بھارو نئیں ہوندا ¹² ۱۲۔ مینوں تاں توں ای، میری راستی وچ کھلاہر بخشدا ایں اتے مینوں ہمیشاں آپنے حضور قائم رکھنا ایں ¹³ ۱۳۔ خداوند اسرائیل دا رب ازل تھوں ابد تیکر دھن ہؤے آمین! فیر آمین