آگو گویّئے جوگی داؤد دا زبور ¹ ۱۔ میں صبر نال خداوند اُتے آس رکھی اوہنے میرے ول دھیان کر کے میری فریاد سُن لئی ² ۲۔ اوہنے مینوں ڈوہنگے کھڈے اتے دلِدر وچوں کڈیا اتے اوہنے میرے پیر چٹان اُتے جمائے اتے میری واٹ مِتھی ³ ۳۔ اوہنے میرے مونھ وچ ساڈے رب دی وڈیائی دا نواں گیت پائیا بتھیرے ویکھن گے اتے ڈرن گے اتے خداوند اُتے بھروسا کرن گے ⁴ ۴۔ دھن اے اوہ بندہ جہڑا خداوند اُتے بھروسا کردا اے اتے گھمنڈِیا اتے جھوٹ دے یاراں ولے دھیان نئیں دیندا ⁵ ۵۔ ائے خداوند میرے رب! جہڑے انوکھے کم توں کیتے اتے تیرے خیال جہڑے ساڈے ول نیں، بتھیرے نیں میں اوہناں نوں تیرے حضور چون نئیں کر سکدا جیکر میں اوہناں دا کھِلما اتے بیان کرنا چاہؤاں تاں اوہ گِنتری تھوں باہر نیں ⁶ ۶۔ قربانی اتے نذر نوں توں چنگا نئیں جان دا توں میرے کن کھل دِتے نیں سوختنی قربانی اتے خطا دی قربانی توں نئیں منگی ⁷ ۷۔ تد میں آکھیا ویکھ! میں آیا ہاں کتاب دے طومار وچ میرے پاروں لکھیا اے ⁸ ۸۔ ائے میرے رب! میری خوشی تیری مرضی پوری کرن وچ اے سگوں تیری شریعت میرے من وچ اے ⁹ ۹۔ میں وڈی منڈلی وچ سچیائی دی خوش خبری سنائی اے ویکھ! میں آپنا مونھ بند نئیں کراں گا اے خداوند! توں جان دا ایں ¹⁰ ۱۰۔ میں تیری سچیائی آپنے من اندر لُکا نئیں رکھی میں تیری وفا اتے نجات نوں ظاہر کیتا اے میں تیری شفقت اتے سچیائی وڈی منڈلی تھوں نئیں لُکائی ¹¹ ۱۱۔ ائے خداوند! توں میرے اُتے ترس کھان تھوں مونھ نا موڑ تیری شفقت اتے سچیائی نال نال میری راکھی کرن ¹² ۱۲۔ کیوں جو اگِنت برائیاں نے مینوں گھیر لئیا اے میری بدی نے مینوں آ پھڑیا اے۔ اجہیا پئی میں اکھ نئیں چُک سکدا اوہ میرے سِر دے والاں نالوں وی چوکھیاں نیں۔ اخیر میرا چھُٹ گئیا ¹³ ۱۳۔ ائے خداوند! مہربانی کر کے مینوں چھُڈا ائے خداوند! میری مدد جوگی چھیتی کر ¹⁴ ۱۴۔ جہڑے میری جان مُکاؤن جوگی ویردے نیں اوہ سبھے شرمندے اتے کھجل ہون جہڑے میرے نقصان تھوں خوش نیں اوہ ہار کے پچھاں ہٹن اتے بدنام ہون ¹⁵ ۱۵۔ جہڑے میرے اُتے ہسدے نیں اوہ آپنی بدنامی پاروں ناس ہو جاؤن ¹⁶ ۱۶۔ تیرے سبھے چاہؤن والے تیتھوں خوش ہون تیری نجات دے عاشق ہمیشاں آکھن خداوند دی وڈیائی ہؤے ¹⁷ ۱۷۔ پر میں ماتڑ اتے محتاج ہاں خداوند میری فکر کردا اے میرا مدد کرن والا اتے چھڈاؤن والا توں ای ایں